Fakamaau ʻa e ʻOtuá​—ʻOkú Ne ʻOmai Maʻu Pē ha Fakatokanga Feʻunga?

ʻOKU vakaiʻi ʻe ha tokotaha fakamatala ʻea ʻa e anga ʻo e tuʻu ʻa e ʻeá. ʻOkú ne sio ki ha matangi mālohi fakatupu maumau ʻoku ngaʻunu vave mai ki ha feituʻu ʻoku tokolahi ai e kakaí. Koeʻuhi ʻokú ne tokanga ki he malu ʻa e kakaí, ʻokú ne toutou fakatokanga kiate kitautolu ki muʻa ke fuʻu tōmui.

ʻI ha founga meimei tatau, ko Sihova he taimí ni ʻokú ne fakatokanga ki he faʻahinga ʻi he māmaní fekauʻaki mo ha “matangi mālohi” ʻoku toe fakatupu maumau ange ia ʻi ha meʻa pē kuo nau fanongo nai ki ai ʻi ha fakamatala ʻea. ʻOku anga-fēfē ʻene fai ení? Pea ʻe lava fēfē ke tau fakapapauʻi ʻokú ne ʻoange ki he kakaí ha taimi feʻunga ke mateuteu ai? Ke tali iá, tau ʻuluaki lāulea angé ki he ngaahi fakatokanga ʻe niʻihi ʻa Sihova ʻi he kuohilí.

TAIMI NAʻE ʻOMAI AI ʻE HE ʻOTUÁ HA FAKATOKANGA TOKAMUʻA

ʻI he taimi ʻo e Tohi Tapú, naʻe fakatokanga ʻa Sihova ki ha “ngaahi matangi mālohi,” pe ngaahi ngāue fakaefakamaau, ʻa ia te ne ʻomai ki he faʻahinga talangataʻa ʻiloʻilo pau ki heʻene fekaú. (Pal. 10:25; Sel. 30:23) ʻI he tuʻunga taki taha, naʻá ne fakatokanga tokamuʻa ki he kakai talangataʻá pea fakahinohino ke nau fai ha liliu naʻe fehoanaki mo hono finangaló. (2 Tuʻi 17:12-15; Nehe. 9:29, 30) Ke fakalototoʻaʻi ke nau liliú, naʻá ne faʻa ngāueʻaki ʻene kau sevāniti mateaki ʻi he māmaní ke fanongonongo ʻene ngaahi fakamāú pea ke fai ia ʻi ha founga fakavavevave.—ʻĒm. 3:7.

Naʻe kau ʻa Noa ʻi he kau sevāniti faitōnunga ko iá. ʻI he laui taʻu, naʻá ne fakatokanga taʻemanavahē ki he kakai ʻulungaanga taʻetaau mo fakamālohi ʻi hono ʻahó fekauʻaki mo e Lōmaki naʻe teu ke hoko. (Sēn. 6:9-13, 17) Naʻá ne toe tala ange ʻa e meʻa ne fiemaʻu ke nau fai ke hao aí—ko ia ki mui ai naʻe ui ia “ko ha tokotaha malangaʻi ʻo e māʻoniʻoní.”—2 Pita 2:5.

Neongo ʻa e feinga ʻa Noá, ko e kakai ʻi he māmani ki muʻa he Lōmakí naʻa nau tukunoaʻi ʻa e pōpoaki fakaʻotuá. Naʻa nau fakahāhā ʻa e tui vaivai. Ko e olá, naʻa nau mate ʻi he “hoko mai ʻa e Lōmakí ʻo tafiʻi kotoa atu kinautolu.” (Māt. 24:39; Hep. 11:7) ʻI he ofi ki hono fakaʻauha kinautolú, naʻe ʻikai lava ke nau pehē naʻe ʻikai fakatokanga ange ʻa e ʻOtuá kiate kinautolu.

ʻI he taimi ʻe niʻihi, naʻe fakatokanga ʻa Sihova ki he faʻahinga taautaha ki muʻa pē ke hoko mai ʻa e “matangi mālohi” ʻene fakamāú. Naʻa mo ia, naʻá ne fakapapauʻi ke ʻoatu ha taimi feʻunga ki he faʻahinga talangataʻá ke nau liliu. Ko e fakatātaá, naʻá ne ʻoatu tokamuʻa ʻa e ngaahi fakatokanga lolotonga ʻa e Mala ʻe Hongofulu naʻe tō ki ʻIsipité. Ko e fakatātaá, naʻe fekau ʻe Sihova ʻa Mōsese mo ʻĒlone ke fakatokanga kia Felo mo ʻene kau sevānití fekauʻaki mo e mala hono fitú, ko ha ʻuha-ʻaisi fakatupu maumau. Koeʻuhi ko e ʻuhá ʻe tō ʻi he ʻaho hono hokó, naʻe ʻoatu ʻe he ʻOtuá ha taimi feʻunga ke nau kumi ha maluʻanga pea hao ʻi he fakatamakí? ʻOku pehē ʻe he Tohi Tapú: “Ko ha taha pē ʻi he lotolotonga ʻo e kau sevāniti ʻa Feló naʻe manavahē ki he folofola ʻa Sihová naʻá ne fakahū fakavave ʻene kau sevāniti ʻaʻaná mo ʻene fanga monumanú ki he ngaahi falé, kae ʻilonga ʻa ia naʻe ʻikai tokanga ki he folofola ʻa Sihová naʻá ne tuku pē ʻene kau sevānití mo ʻene fanga monumanú ʻi he vaó.” (ʻEki. 9:18-21) ʻOku hā mahino, naʻe ʻoatu ʻe Sihova ʻa e fakatokanga feʻunga, ko ia ko e faʻahinga naʻa nau ngāue vavé naʻa nau hao mei he nunuʻa fakamamahi ʻo e mala ko iá.

Ko Felo mo ʻene kau sevānití naʻa nau maʻu foki ha fakatokanga ki muʻa ʻi he mala hono hongofulú. Kae kehe, naʻa nau fakavalevale ʻo talitekeʻi ʻa e fakatokangá. (ʻEki. 4:22, 23) Ko e olá, naʻa nau sio ki he mate honau ʻuluaki fohá. He fakamamahi ē! (ʻEki. 11:4-10; 12:29) Naʻe ʻi ai ha taimi feʻunga ke nau talangofua ki he fakatokangá? ʻIo! Naʻe fakatokanga vave ʻa Mōsese ki he kau ʻIsilelí fekauʻaki mo e mala hono hongofulu naʻe teu ke toó pea fakahinohino kinautolu ki he founga ke fakahaofi ai honau ngaahi fāmilí. (ʻEki. 12:21-28) Ko e toko fiha naʻe fanongo ki he fakatokangá? Fakatatau ki he fakafuofua ʻe niʻihi, ko e toko tolu miliona, kau ai ʻa e kau ʻIsileli mo ha “fuʻu tokolahi kehe” naʻe ʻikai ko e kau ʻIsileli pea mo e kau ʻIsipite, naʻa nau hao ʻi he fakamaau ʻa e ʻOtuá pea mavahe mei ʻIsipité.—ʻEki. 12:38; fkm. ʻi lalo.

Hangē ko e ngaahi fakatātā ko ení, naʻe fakapapauʻi maʻu pē ʻe Sihova ke ʻi ai ha taimi feʻunga ki he kakaí ke talangofua ki heʻene fakatokangá. (Teu. 32:4) Ko e hā ʻokú ne ueʻi ʻa e ʻOtuá ke fai peheé? Naʻe fakamatala ʻa e ʻapositolo ko Pitá ko Sihova “ʻoku ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa ʻa e fakatomalá.” (2 Pita 3:9) ʻIo, naʻe tokanga ʻa e ʻOtuá ki he kakaí. Naʻá ne loto ke nau fakatomala pea fai ha ngaahi liliu ki muʻa ke hoko mai ʻene fakamāú.—ʻAi. 48:17, 18; Loma 2:4.

TALI KI HE FAKATOKANGA ʻA E ʻOTUÁ HE ʻAHO NÍ

ʻI he ʻahó ni, ko e kakaí kotoa kuo pau foki ke nau tali ki ha fakatokanga fakavavevave ʻoku talaki he taimí ni ʻi māmani lahi. ʻI he ʻi māmani ʻa Sīsuú, naʻá ne fakatokanga ko e fokotuʻutuʻu lolotongá ʻe faai atu pē ʻo fakaʻauha ʻi he “fuʻu mamahi lahi.” (Māt. 24:21) ʻI he fekauʻaki mo e fakamaau ko ia ʻi he kahaʻú, naʻá ne ʻomai ha kikite fakaikiiki fekauʻaki mo e meʻa ke ʻamanekina ʻe hono kau muimuí ʻe hoko ʻi he fakaofi mai ʻa e taimi ko iá. Naʻe fakamatalaʻi ʻe Sīsū ʻa e ngaahi meʻa tefito ʻe hoko fakamāmanilahi ʻa ia ʻoku tau sio ki ai he ʻahó ni.—Māt. 24:3-12; Luke 21:10-13.

ʻI he fekauʻaki mo e kikite ko iá, ʻoku ekinaki ʻa Sihova he taimí ni ki he tokotaha kotoa ke fakamoʻulaloa ki Heʻene tuʻunga-pule anga-ʻofá. ʻOkú ne fakaʻamu ke maʻu ʻe he kakai talangofuá ha moʻui lelei ange he taimí ni pehē foki ki he ngaahi tāpuaki ʻi he kahaʻú ʻi heʻene māmani foʻou māʻoniʻoní. (2 Pita 3:13) Ke fakalototoʻaʻi ʻa e tui ki heʻene talaʻofá, kuo tokonaki mai ʻe Sihova ha pōpoaki fakahaofi moʻui—ʻa e “ongoongo lelei ko ʻeni ʻo e Puleʻangá,” ʻa ia naʻe tomuʻa tala ʻe Sīsū ʻe “malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē.” (Māt. 24:14) Kuo fokotuʻutuʻu maau ʻe he ʻOtuá ʻene kau lotu moʻoní ke nau fai ʻa e “fakamoʻoni” ko ení pe malangaʻi ʻa e pōpoaki fakaʻotuá ni, ʻi he fonua ʻe 240 nai. ʻOku loto ʻa Sihova ke talangofua ʻa e kakai tokolahi taha ʻe ala lavá ki he fakatokangá pea hao ʻi he “matangi mālohi” ʻo ʻene fakamaau māʻoniʻoní.—Sēf. 1:14, 15; 2:2, 3.

Ko e fehuʻi mātuʻaki mahuʻingá leva, ʻoku ʻikai ko e pehē pe ʻoku ʻomai ʻe Sihova ʻa e taimi feʻunga ki he kakaí ke talangofua ki heʻene ngaahi fakatokangá. Ko e fakamoʻoní ʻoku fakahaaʻi ai ʻokú ne fai pehē maʻu pē. Ka ko e fehuʻi mahuʻingá: ʻE talangofua ʻa e kakaí ki he fakatokanga ʻa e ʻOtuá lolotonga ʻene kei faingamālié? ʻOfa ke tau hokohoko atu ko e kau talafekau ʻa e ʻOtuá, ke tokoniʻi ʻa e tokolahi taha ʻe ala lavá ke hao ʻi he ngataʻanga ʻo e fokotuʻutuʻu ko ení.