Kau ʻi he Ngāue Ko Ia ʻE ʻIkai ʻAupito ke Toe Faí
1 ʻI he ngaahi taimi kehekehe he hisitōlia ʻo e faʻahinga ʻo e tangatá, naʻe fiemaʻu ai ʻe Sihova ke fakahoko ʻa e fakamāú ki hono ngaahi filí. Kae kehe, koeʻuhi ko ʻene meesí, naʻá ne tokonaki mai ai maʻá e faʻahinga loto-totonú ha faingamālie ki he fakahaofí. (Sāme 103:13) Ko ʻenau talí naʻe fakapapauʻi ai honau ikuʻangá.
2 Ko e fakatātaá, ki muʻa ʻi he Lōmaki, he 2370 K.M., ko Noá “naʻa ne malangaʻaki ʻa e maʻoniʻoni.” Ko e faʻahinga naʻe fakaʻauhá ko kinautolu ko ia naʻa nau taʻetokaʻi ʻa e fakatokanga fakaʻotuá. (2 Pita 2:5; Hep. 11:7) Ki muʻa ke fakaʻauha ʻa Selusalema ʻi he 70 T.S., naʻe fakamatalaʻi mahino ʻe Sīsū ʻa e ngāue ʻe fiemaʻu nai ki ha taha ke hao ai mei he fakaʻauha ʻe hoko ki he koló. Ko kinautolu kotoa te nau fakataleʻi ʻa ʻene pōpoaki fakatokangá te nau fuesia ʻa e nunuʻa fakamanavahē. (Luke 21:20-24) Ko e fakatokanga fakaʻotua pea mo e ngaahi fakamaau peheé naʻe toutou fakatokanga mai ia he ngaahi taimi lahi ʻi he kotoa ʻo e hisitōliá.
3 Ko ha Ngāue Fakatokanga ʻi Onopooni: Naʻe fakahā ʻe Sihova ʻi he kuohilí ko hono houhaú ʻe huaʻi hifo ia ki he tuʻu fulikivanu ʻo e ʻaho ní pea ko e kau anga-vaivaí pē ʻe haó. (Sef. 2:2, 3; 3:8) Ko e taimi ki hono malangaʻi ʻo e pōpoaki fakatokanga ko ʻení ʻoku vave ke ngata! Ko e “mamahi lahi” ʻoku tuʻu mei muʻa, pea ko e kau anga-vaivaí ʻoku fai hono tānaki he taimí ni. Ko hono moʻoní, ko e “ngaahi ngoue” ʻoku “fisi hina ia ki he ututaʻu.” Ko ia, ʻoku ʻikai ha ngāue ʻe lava ke fakatatau mo ʻeni ʻi hono mahuʻingá pea mo e fakavavevavé.—Mt. 24:14, 21, 22; Sione 4:35.
4 Kuo pau ke tau kau ʻi hono fakaongo atu ʻa e fakatokanga fakaeonopooní ki he niʻihi kehé, “pe te nau fie fanongo, pe te nau kalofi.” Ko e ngāue ʻeni ia kuo foaki mai ʻe he ʻOtuá ʻa ia kuo pau ke ʻoua te tau taʻetokaʻi. (Isi. 2:4, 5; 3:17, 18) Ko ʻetau kau kakato ʻi he ngāue ko ʻení ʻoku hoko ʻa hono fakahaaʻi ʻi he tui pau ʻa ʻetau ʻofa loloto ki he ʻOtuá, ko ʻetau tokanga moʻoni ki hotau ngaahi kaungāʻapí, pea mo ʻetau tui taʻeueʻia ki hotau Fakamoʻuí, ko Sīsū Kalaisi.
5 Ko e Taimi ʻEni ke Fai ha Ngāue: ʻI he hili ʻa e ʻosi atu ʻa e faifakamaau ʻa Sihová, naʻe tupu hake maʻu pē ʻa e anga-fulikivanú koeʻuhi ko e kei ngāue ʻa Sētane pea mo ʻene kau tēmenioó. Kae kehe, ko e taimi ko ʻení ʻe kehe ʻaupito. ʻE ngata fakaʻaufuli ʻa e tākiekina faka-Sētané. ʻE ʻikai ke toe fiemaʻu ha fakatokanga ʻi māmani lahi ʻo fekauʻaki mo ha “mamahi lahi” ʻe tuʻunuku mai. (Fkh. 7:14; Loma 16:20) ʻOku tau maʻu ʻa e monū makehe ʻo e hoko ko e konga ʻo ha ngāue ʻe ʻikai ʻaupito ke toe fai. Ko ia ko e taimi ʻeni kiate kitautolu ke ngāue lahi taha ʻaki ʻa e faingamālie ko ʻení.
6 ʻI he fekauʻaki mo ʻene ngāue fakamalangá, naʻe fakahā ʻe he ʻaposetolo ko Paulá ʻaki ʻa e tui pau: “Kuo u ʻataʻatā mei homou toto.” (Ng. 20:26) Naʻe ʻikai te ne ongoʻi halaia ʻi he totó mei ha ʻikai ke fakaongo atu ʻa e fakatokangá. Ko e hā ʻa e ʻuhinga naʻe ʻikai pehē aí? Koeʻuhí he naʻá ne leaʻaki fekauʻaki mo ʻene ngāue fakafaifekaú: “ʻOku te fai ke ongosia foki kita, ʻi he fefaʻuhi ke lava ʻa e meʻa ko ia.” (Kol. 1:29) ʻOfa ke tau maʻu ʻa e fiefia tatau ʻi he kau kakato ange ki he ngāue ko ia ʻe ʻikai ke toe faí!—2 Tim. 2:15.