Ko ha Monū Lelei ʻo e Ngāué
1 Naʻe pehē ʻe ha tokotaha lau tohi naʻá ne ako ʻa e meʻa lahi ange ia ʻo e ngaahi meʻa mahuʻinga moʻoní ʻi heʻene lau ʻa e Ko e Taua Leʻo mo e Awake! ʻi he meʻa naʻá ne ako he lolotonga ʻo e taʻu ʻe ono ʻo ʻene ako ʻi he ʻunivēsití. ʻOku ʻikai ko ha meʻa foʻou ke fakahā loto-māfana pehē ʻe he kau lau tohi loto-totonú ʻa ʻenau houngaʻia ʻi he hili ʻa ʻenau lau ʻa e ongo makasini ko ʻení ʻi ha kiʻi vahaʻa taimi siʻi pē. Ko ha monū lahi ē kiate kitautolu ke tau tufa atu maʻu pē ʻa ʻetau ngaahi makasiní ki he faʻahinga ʻoku nau fakamahuʻingaʻiaʻi moʻoní!
2 ʻOku tokolahi ʻa e kakai, neongo ʻoku ʻi ai haʻanau mahuʻingaʻia ʻi he moʻoní, ʻoku ʻikai te nau fakalakalaka ke aʻu ki he tuʻunga ʻo tali ke fai mo kinautolu ha ako Tohitapu ʻi ʻapi. Ka ʻe lava nai ke fakatupulekina ʻenau mahuʻingaʻiá ʻo kapau ʻe toutou foki ki ai mo e ngaahi tatau foʻou taki taha ʻo e Ko e Taua Leʻo mo e Awake! ʻIo, ko hono ʻoatu maʻu pē ʻa e ngaahi makasiní ʻi ha tufaʻanga makasini pau kuo tokoniʻi ai ʻa e kakaí ke faifai atu ʻo nau loto ke fai ha ako Tohitapu tuʻumaʻu.
3 ʻOku tau maʻu ʻa e ʻaonga fakafoʻituitui ʻi hono maʻu ha tufaʻanga makasini pau ʻo kapau ʻoku tau ʻuluaki lau ʻa e ngaahi makasiní pea fakatokangaʻi ha ngaahi poini tefito ʻa ia ʻe ʻi ai ʻene mahuʻinga makehe ki he tokotaha taki taha ʻoku ʻi heʻetau fakahokohoko kuo tau hikí.
4 Manatuʻi ko hono lahi ʻo e mahuʻingaʻia ʻa e tokotaha-ʻapí, ka ʻoku ʻikai ko e lahi ʻo ʻene tokoni fakaesenití, ʻoku fakapapauʻi ai pe ʻoku totonu ke fakakau hono hingoá ʻi hoʻo fakahokohoko ʻo e ngaahi toe foki ki he tufaʻanga makasini paú. Kapau ʻoku fakahaaʻi ʻe ha tokotaha ʻa ʻene mahuʻingaʻia moʻoní ʻi heʻene tali ʻa e ngaahi makasiní, ʻe lava ke ke fakamatalaʻi ʻa e ngaahi kupu tuʻu-ki-muʻa ʻoku hā ʻi heʻetau ngaahi makasiní ʻi he uike ua kotoa pē pea te ke fiefia ke ke faʻa ʻoatu ia. Fakapapauʻi ke fai tuʻumaʻu ʻeni, ʻo ngāueleleiʻaki ʻa e ngaahi faingamālié ke fetalanoaʻaki mo e tokotaha-ʻapí ʻi ha ngaahi kaveinga faka-Tohitapu. ʻOku mau ʻilo te ke fiefia ʻi he monū lelei ko eni ʻo e ngāué.