Langaʻi Hake ʻa e Mahuʻingaʻiá ʻAki Hono Fai ha Ngaahi Toe Foki Ola Lelei
1 ʻOku fakakau ki he ngaahi malanga ʻosi teuteu lelei kotoa pē ʻa e lea kamata ke langaʻi hake ʻa e mahuʻingaʻiá, ko e sino ʻo e malangá ʻokú ne ʻomai ʻa e ʻilo pea ko hono fakaʻosí ke fakaueʻiloto. ʻOku maʻu mai ʻa e tokanga ʻa e kau fanongó ʻe he lea kamata, ka ʻo ka ʻikai ke ʻi ai ha sino ʻo e malangá mo ha lea fakaʻosi, ʻe ʻikai ke kakato ʻa e malangá. ʻOku kaungatonu ʻa e tefitoʻi moʻoni tatau pē ki heʻetau ngāue fakamalangá. Ko e meʻa lelei ia ke langaʻi hake ʻa e mahuʻingaʻia ʻa e tokotaha-ʻapí ʻi he ʻuluaki ʻaʻahí, ka kuo pau ke tau toe langaʻi hake ʻa e ʻuluaki mahuʻingaʻia ko iá ʻaki hano fai ha ngaahi toe foki ola lelei.
2 Ko e hā ʻoku fakangofua ai ʻe he ʻOtuá ʻa e faingataʻaʻiá? Ko ha fehuʻi fakatupu fakakaukau lahi ē! ʻIkai ʻokú ke loto-taha ki he pehē ko e kaveinga ko ʻení ʻoku faʻa fakakaukau ki ai ʻa e kakai tokolahi ʻi he ʻahó ni? Ko e ʻuhinga ia ʻoku fokotuʻu mai ai ʻi he kupu ʻi ʻolungá ke ke langaʻi ʻa e fehuʻi ko ʻení ʻi he fakaʻosi ʻa hoʻo ʻuluaki ʻaʻahí ʻi he taumuʻa ke tali ia ʻi haʻo fai ha toe foki.
3 Te ke lea pehē ni nai:
◼ Mālō e lelei. Ko ʻeta talanoa fakamuimuí naʻe ʻohake ai ʻa e kaveinga ʻo kau ki hono fakangofua ʻe he ʻOtuá ʻa e faingataʻaʻiá, pea naʻá ku fakapapauʻi atu te u toe foki mai mo ha ngaahi fakamatala kiate koe. ʻOku pehē ʻe he kakai tokolahi kapau ʻoku tokanga moʻoni mai ʻa e ʻOtuá kiate kitautolu, te ne fakangata ʻa e faingataʻaʻiá. Mahalo pē ʻoku pehē pē mo e anga ʻo hoʻo fakakaukaú. [Tuku ʻa e tokotaha-ʻapí ke ne tali.] ʻOku fakapapauʻi mai ʻe he Tohitapú kiate kitautolu ʻoku tokanga moʻoni mai ʻa e ʻOtuá. [Lau 1 Sione 4:8.] ʻOku ʻi ai ʻa e ngaahi ʻuhinga lelei kuo fakangofua ai ʻe he ʻOtuá ʻa e faingataʻaʻiá ke hokohoko mai ʻo aʻu ki he taimi ní. Ko e taha ʻo e ngaahi ʻuhinga ko ʻení ʻoku fakamatalaʻi ʻia 2 Pita 3:9. [Lau.] ʻOku fakahā ʻi he kiʻi tohi ko ʻení ha toe ngaahi ʻuhinga kehe.” Pea hukeʻi ki he palakalafi 7 mo e 8 ʻi he tohi ʻOtua ʻOku Tokanga Mai ʻo fai ha fetalanoaʻaki ki ha poini mahuʻinga.
4 ʻE mahuʻingaʻia ʻa e kakai ʻe niʻihi ki ha fakamatala fakaikiiki ange, pea ʻe fiemaʻu ke fai ha ngaahi toe foki ki muʻa pea nau toki fiemālie lelei ki he talí. ʻE lava ke ngāueʻaki ʻa e vahe 11 mo e 12 ʻi he tohi Moʻui Taʻengata ke fakatuʻunga ai ha toe fetalanoaʻaki ʻe taha ki he kaveinga ko iá.
5 ʻI hoʻo fakaʻosi ʻa e fetalanoaʻakí, langaʻi hake ha toe fehuʻi ʻe taha pea tala ange ki he tokotaha-ʻapí te ke fiefia ke fakahā atu ha ngaahi fakamatala fakatupu tokanga kiate ia ʻi hoʻo toe foki maí. ʻOku tokolahi ʻa e kakai te nau saiʻia ke ʻilo pe ko e hā ʻa e meʻa ʻoku hoko ki ha taha ʻi he maté. Fēfē ke ke fai ai ha fokotuʻutuʻu ke fai ha talanoa ki he kaveinga ko iá ʻi ha taimi ʻe faingamālie?
6 ʻE tokoni lahi kiate koe kapau te ke faʻa fakakaukau ki he ngaahi moʻoniʻi meʻa tefito ʻe tolu. ʻAi ke maliliungofua. ʻOku ʻikai anga nai ʻa e tokotaha-ʻapí ke ne vaheʻi ha taimi pau ki ha fetalanoaʻaki faka-Tohitapu. ʻAi ke fuonounou. ʻOua ʻe fuʻu nofo fuoloa pe lave ki ha ngaahi poini lahi ʻi he ʻuluaki ʻaʻahí pē. ʻI he ngaahi taimi lahi, ʻe lelei ange ʻa e anga ʻo e tali mai ki hoʻo ngaahi ʻaʻahí kapau te ke fai pē ha fakamatala ki ha ngaahi poini siʻisiʻi ʻi he vahaʻa taimi nounou. ʻAi ke anga-fakakaumeʻa. Fakahāhā ki he tokotaha-ʻapí ʻokú ke mahuʻingaʻia ʻiate ia tonu.
7 Ko ʻetau taumuʻá leva ke ʻai ʻa e tokotaha-ʻapí ke kau ki he fetalanoaʻaki faka-Tohitapú. Pea te tau saiʻia ke kamata ha ako Tohitapu ola lelei ʻi ha tohi ʻoku feʻunga, hangē ko e tohi Moʻui Taʻengata. Te ke maʻu ʻa e fiefia ko ení ʻo kapau te ke anga-kātaki ʻo langaʻi hake ʻa e mahuʻingaʻia naʻe ʻuluaki haá ʻaki hano fai ha ngaahi toe foki ola lelei.