Ngāue Fakataha mo ia ʻOkú Ne Fai ʻa e Ako Tohitapu Fakaefakatahaʻangá
1 ʻOku mātuʻaki mahuʻinga ʻa e Ako Tohitapu Fakaefakatahaʻangá ke fakautuutu ʻetau ngaahi malava ko e kau faifekau ʻo e ongoongo leleí. ʻOku ʻai ke tokosiʻi maʻu pē ʻa e ngaahi kulupú koeʻuhi ke fakatupu ai ʻa e feōngoaki māfana hangē ʻi ha fāmilí ki he ako ʻo e Tohitapú mo e taha ʻo e ngaahi tohi ʻa e Sōsaietí. ʻOku toe tokonaki mai ʻe he ngaahi kulupu siʻisiʻi ko ʻení ʻa e tuʻunga lelei taha ke akoʻi ai kitautolu ke toe ola lelei ange ʻi he ngāue fakamalangá. ʻOku ala maʻu ai ha tokanga mo ha fakalototoʻa fakafoʻituitui ki ha taha pē ʻo fakafou ʻi he fokotuʻutuʻu ʻo e ako Tohitapu fakaefakatahaʻangá. ʻE lava fēfē ke kakato ange ʻetau ngāue fakataha mo e tokotaha ʻokú ne fai ʻa e akó pea ke hoko ʻo ʻaonga ʻa e tokonaki lelei ko ʻení?
2 Ko ha Kau Faivelenga ʻi he Ngāue Fakamalangá: Ko e taha ʻo e ngaahi fatongia mahuʻinga lahi taha ʻo e tokotaha ʻokú ne tataki ʻa e ako Tohitapu fakaefakatahaʻangá ko ʻene tokoniʻi ʻa e mēmipa taki taha ʻo e kulupú ke kau tōtōivi ki he ngāue fakamalangá. ʻI he fekauʻaki mo e meʻá ni, ʻoku fakamanatu mai ʻi he tohi ko e Our Ministry ʻi he peesi 44 ko e “kau maʻu pē, ko e faivelenga mo e māfana ʻokú ne fakahā ʻi he ngāue fakamalangá ʻe tapua atu ia ʻi he kau malangá.” ʻI he taimi ʻe niʻihi ko e tokotaha tatakí te ne ngāue mo e kau mēmipa ʻo hono fāmilí tonu ʻi he ngāue fakamalangá, ka te ne toe fiefia ke ngāue mo ha niʻihi kehe ʻi he ngaahi tafaʻaki kehekehe ʻo e ngāue fakamalangá ʻo fakatatau ki he tuʻunga ʻokú ne ʻi aí. Te ke malava ke poupou maʻu pē ki he ngaahi fakataha ki he ngāue fakamalangá? ʻE mātuʻaki houngaʻia ai ʻa e tokotaha ʻokú ne tataki ʻa hoʻo kulupu ako Tohitapú pea pehē ki he kau malanga kehé ʻi hoʻo fai peheé.
3 ʻOku fai ʻa e fokotuʻutuʻu ki he ngāue fakamalanga ki he ngaahi feituʻu ʻoku faingamālié koeʻuhi ke kau faivelenga kotoa ʻi he ngāue fakamalangá. Neongo ʻoku fai ha fakakaukau ki he ngaahi tuʻunga fakalotofonuá, ka ʻe fiemaʻu ʻa e kulupu taki taha ke vave ange ʻenau kamata ʻi he ngāue fakamalangá. ʻOku maʻu ha ola lelei ʻe he kau malanga tokolahi mo e kau taaimuʻá ʻi heʻenau hokohoko atu ʻi he ngāue fakamalangá ʻo laka atu ʻi he hoʻatā-mālie ʻi he fakaʻosinga ʻo e uiké.
4 ʻOku ʻi ai ha tuʻunga ʻo e ngāue fakamalangá ʻokú ke saiʻia ke fai ai ha tokoni? Mahalo pē ko e tokotaha ʻokú ne fai ʻa e ako Tohitapu ʻa e fakatahaʻangá te ne malava ke fokotuʻutuʻu ki ha tokotaha malanga lavameʻa ʻi he kulupú ke ngāue fakataha mo koe. ʻI he ngataʻanga ʻo e māhiná, ke ke fakapapauʻi ʻoku vave ʻa e ʻoatu hoʻo lipooti ngāué. ʻE houngaʻia fakatouʻosi ʻa e tokotaha tataki ʻo e ako Tohitapu ʻa e fakatahaʻangá mo e sekelitalí ʻi hoʻo ngāue fakataha mo kinaua ʻi he tafaʻaki mahuʻinga ko ʻeni ʻo e ngāué.—Fehoanaki mo Luke 16:10.
5 ʻI he ʻAʻahi ʻa e ʻOvasia Ngāué ki he Kulupú: ʻOku faʻa ʻaʻahi ʻa e ʻovasia ngāué ki he taha ʻo e ngaahi kulupu ʻo e ako Tohitapu fakaefakatahaʻangá ʻi he māhina taki taha ke fakalototoʻaʻi ke kau ke lahi ange mo ngāueʻaongaʻaki lahi ange ʻa e taimí ʻi he ngāue fakamalangá. Fanongo tokanga ki heʻene malanga miniti ʻe 15 ʻoku fai ʻi he ʻosi ʻa e ako Tohitapú, he ʻokú ne tokonaki mai ha akonaki pau ʻa ia te ne tokoniʻi ʻa e kulupú ke fakaleleiʻi ʻa e ngaahi tafaʻaki kehekehe ʻo e ngāue fakamalangá. ʻOku toe vēkeveke ʻa e ʻovasia ngāué ke ngāue mo ha ngaahi mēmipa kehekehe ʻo e kulupu ako Tohitapú ʻi he fakaʻosinga ʻo e uiké. ʻAi ke fakapapauʻi ke ngāueleleiʻaki ʻa e tokonaki makehe ko ʻení koeʻuhi ke ke maʻu ha ʻaonga mei heʻene taukei mo e malava ʻi he ngāue fakamalangá.
6 Ko ʻetau faʻifaʻitakiʻanga taautaha ʻi he ngāue fakatahá pea mo ʻetau loto-lelei ke tokoni kiate kinautolu ʻoku ʻikai ke loko taukeí ʻe tokoni ia ke fakatupu ha feōngoaki māfana mo anga-fakakaumeʻa ʻi he kulupu Ako Tohitapu Fakaefakatahaʻangá ʻi heʻetau “ngaue ʻaonga ki he kakai kotoa pe: kae lahi pe kiate kinautolu ʻoku ʻi he famili ʻo e lotu.”—Kalētia 6:10.