Puha Fehuʻi
◼ Ko e hā ʻa e fakakaukau ʻoku totonu ke tau maʻu ʻo fekauʻaki mo e ngāue ko ha taaimuʻa fakataimí?
ʻOku totonu ke fakakaukau atu ki he ngāue taaimuʻa fakataimí ko ha monū pea mo ha fatongia mamafa ia. ʻOku laui mano ʻa e kau malanga ʻi he māhina taki taha ʻoku fakanofo ke nau ngāue ko ha kau taaimuʻa fakataimi, pea ʻoku fai hokohoko pehē ʻe he niʻihi. ʻOku tau fakaongoongoleleiʻi ʻa e kau malanga faivelengá ni ʻa ia ʻoku fakaʻatā kinautolu ʻe honau ngaahi tuʻungá ke nau ngāue ki he houa ʻe 60 ʻoku fiemaʻu ʻi he ngāue fakamalangá ʻi he māhina taki taha ʻi heʻenau ngāue ko ha kau taaimuʻa fakataimí. ʻOku totonu ki he kau mātuʻá pea pehē ki ha niʻihi kehe, ke nau fakalototoʻaʻi ʻa e kau malanga ʻoku nau tohi kole ki he ngāue ko ha taaimuʻa fakataimí ke nau fai fakamātoato honau ngafa kuo vaheʻi atú pea fakaʻehiʻehi mei ha faʻahinga hehema pē ki ha fakakaukau fāinoa.
Ko e faʻahinga ʻoku nau pole ke hoko ko ha kau taaimuʻa fakataimi ʻi ha māhina ʻe taha pe lahi ange ʻoku totonu ke nau ʻuluaki fatu ʻa e fakamolé ʻo tatau pē mo ia ʻoku fai ʻe he kau taaimuʻa tuʻumaʻú. (Luke 14:28) ʻOku kau ki heni ʻa hono fakapapauʻi ki muʻa ʻa e taimi ʻe lava ke nau ʻamanekina ke fakamoleki ki he taimi ʻoku fiemaʻu ʻi he ngāue fakamalangá ʻo ʻikai siʻaki ai mo e ngaahi fatongia kehe faka-Kalisitiané. Ko ha fili ʻa ha taha ke hoko ko ha taaimuʻa fakataimi ʻoku totonu ke fai ia ʻi he hili haʻane fakakaukau mo faʻa lotu ʻo fekauʻaki mo e ngaahi tuʻunga ʻokú ne ʻi aí. ʻOku ʻikai totonu ke fakavaveʻi ʻa e fili ko iá ʻe he ngaahi ongoʻi koeʻuhi ʻoku fai pehē ʻa e niʻihi kehe. ʻOku totonu ko e fili ke faí ko ha fili kuo ʻosi fakakaukauʻi lelei, kau ki ai mo hano ʻosi hiki ha taimi-tēpile ke fakalatoʻaki ʻa e ngaahi fiemaʻú. ʻOku mahuʻinga ke lau fakalelei ʻa e tohi kolé pea fai ʻete filí ʻi hoto loto tonu ʻa ia ko e lava ke moʻoni ʻa hoʻo pehē ʻio ki he meʻa ʻoku fiemaʻú.
Ko hono moʻoní, ʻoku kau ki he meʻá ni ha toe fakamālohituʻu ʻo kita. ʻOku ʻi ai ʻa e ngaahi māhina he lolotonga ʻo e taʻú ʻoku faingofua ange ke ke hoko ʻo “moʻua” lahi ai ʻi hono malangaʻi ʻo e ongoongoleleí. (Ng. 18:5) ʻOku kau ki he ngaahi māhina ko ʻení ʻa e faʻahitaʻu Fakamanatu ʻi Māʻasi mo ʻEpeleli pea mo e ngaahi māhina ʻa ia ʻoku ʻaʻahi ai ʻa e ʻovasia fakafeituʻú ki he fakatahaʻangá. ʻOku akoʻi lelei ʻe he kau malanga tokolahi ʻa kinautolu ke nau muimui ʻi ha taimi-tēpile ʻoku kiʻi mamafa koeʻuhi kae lava ke kau lahi ange ʻi he ngāue fakamalangá ʻi he lolotonga ʻo e ngaahi vahaʻa taimi ngāue makehe ko ení, ʻo nau ʻilo ʻoku faʻa iku ia ki he ngaahi tāpuaki fakakoloa. (2 Kol. 9:6) ʻOku fai ʻe he kau malanga tokolahi ha ngaahi feinga makehe ke ngāue taaimuʻa he lolotonga ʻo e ngaahi māhina mālōloó pea mo ha māhina pē he lolotonga ʻo e taʻú ʻa ia ʻoku faʻa aʻu ʻo nima ai ʻa e fakaʻosinga ʻo e uiké. Kae ʻi heʻenau fakamoʻoni ʻa e foomu kolé, ʻoku nau ʻilo ʻa e fiemaʻu ke pīkitai ki he tefitoʻi moʻoni ‘Ke ke ʻIo ʻi hoʻo ʻIo’ ʻaki ʻenau fai honau lelei tahá ke maʻu ʻa e houa ʻe 60 pe lahi ange ʻi he māhina taki taha ʻi heʻenau ngāue ko ha kau taaimuʻa fakataimi.—Mt. 5:37.
Ko e kau malanga ʻoku ʻikai malava nai ke nau taaimuʻá ʻoku malava ke nau tokoni ʻaki ʻenau fakaʻatā kinautolu ke nau ngāue fakataha mo e kau taaimuʻa fakataimí, ʻo fokotuʻutuʻu ha ngaahi taimi pau ke nau ngāue ai mo kinautolu. ʻOku tokoni lahi ʻa e ngāue ʻo fuoloa ange mo e kau taaimuʻa ʻi he lolotonga ʻo e ngāue fakamalangá ʻo ka malava. ʻE tautefito ʻa e houngaʻia ʻa e kau taaimuʻá ʻi hono maʻu ʻa e poupou ʻa e kau malanga kehé ʻi he lolotonga ʻo e houa pongipongí, houa efiafí, pe ki muʻa ʻoku teʻeki ai ke poʻulí. ʻOku fiefia ʻa e kau taaimuʻa fakataimí ʻi hono fakaafeʻi kinautolu ke ngāue fakataha mo e niʻihi kehé ʻi hono fai ʻa e ngaahi toe foki pea mo hono kamata ha ngaahi ako Tohitapu ʻi ʻapi. Ko e faʻahinga ko ia ʻoku malava ke nau tokoni ki he kau taaimuʻa fakataimí te nau maʻu ha fiefia lahi ange tupu mei hono fai ʻa e foaki atú.—Ng. 20:35.
ʻOku mātuʻaki fakahoungaʻi ʻaupito ʻa e tōtōivi ʻoku fai ʻi he ngāué ʻe he kau taaimuʻa fakataimi tokolahi. Ko e faʻahinga ʻoku malava ke nau kau fakataha mo kinautolú ʻoku malava ke ʻamanekina te nau maʻu ʻa e ngaahi tāpuaki. (Pal. 10:4) Ko ʻafē te ke hoko ʻo kau ai ʻi he fiefia ʻo hono fakatupulekina ʻa e ngāué ʻi he tuʻunga ko ha taaimuʻa fakataimi?