Ngāueʻaki ʻa e Ngaahi Polosiuá ke Kumi ʻa Kinautolu ʻOku Mahuʻingaʻiá
1 Ko e ngaahi polosiuá ko e ngaahi meʻangāue mālohi. ʻI he ngaahi peesi pē ʻe 32, ʻoku malava ʻe ha polosiua ke fokotuʻu maʻu ʻa e ngaahi moʻoni faka-Tohitapú mo ne liliu ʻa e ngaahi fakakaukau mo e ngaahi akonaki ʻoku fepaki mo e ʻiloʻi ʻo e ʻOtuá.—2 Kol. 10:5.
2 ʻI he ʻosi hano lau ʻa e polosiua Ko e Kau Fakamoʻoni ʻa Sihova ʻOku Ngāue Fāʻūtaha ki he Finangalo ʻo e ʻOtua ʻi Māmani Lahi, naʻe ueʻi ha tangata ke ne tohi ʻo pehē: “ʻOku teʻeki ai ke u mamata ʻi he fokotuʻutuʻu maau pehē. . . . Ko e meʻa fakaofo ke ʻilo ha kakai ʻoku nau fakamātoato ʻi hono fai ʻa e finangalo ʻo e ʻOtuá ʻi he kuongá ni ʻa ia ʻoku fuʻu lahi ai ʻa e mālualoi fakalotú.” Ko ha tokotaha faitoʻo fakalouʻakau ʻi ʻAfilika naʻá ne ako ʻa e polosiua ko e Moʻui Fiefia ʻI He Mamani ʻO Taʻengata! Ko e hā ʻa e meʻa naʻe hoko kiate iá? Naʻá ne liʻaki ʻene ngāue ko e faitoʻo fakalouʻakaú peá ne tuku ange ʻa e kau fefine naʻa nau nofo fakataha mo iá tukukehe pē hono uaifi motuʻa angé. Pea naʻá ne toki mali fakalao mo ia.
3 ʻI he polosiua ko e ʻOku Totonu Ke Ke Tui ki he Tolu-tahaʻi-ʻotua? ʻoku hiki totonu ai ʻa e ngaahi fakamatala mei he ngaahi tohi kehe, ʻoku fakamatala faituʻunga, pea ko e meʻangāue ola lelei ia ʻo e moʻoní. Naʻe lave ki he polosiua ko ení ʻe ha tokotaha tohi ʻo kau ki he ngaahi lotú ʻi he The Sunday Gleaner ʻi Samaika, West Indies, ʻo ne pehē: “Ko e tohí ni . . . ko e ngāue mātuʻaki poto ʻa e Kau Fakamoʻoní pea ʻi he taimí ni ʻoku ʻikai ke toe lava ke ongoʻi fiemālie ha taha ʻoku tui ki he Tolu-tahaʻi-ʻotuá pe ki he Ua-tahaʻi-ʻotuá. ʻOku lahi ʻaupito ʻi he kiʻi tohí ni ʻa e ngaahi fakamatala kuo hiki mei he ngaahi maʻuʻanga fakamatala fakahisitōlia mo e fakalotu ke fakahā naʻe ʻikai ke tupu ʻa e tokāteline ʻo e Tolu-tahaʻi-ʻotuá mei he Tohitapú. . . . ʻOku mātuʻaki faingataʻa ki he tokotaha tohi ko eni ʻo kau ki he ngaahi lotú ke sio pe ʻe lava fēfē ha mēmipa lau pē pe ha mēmipa mālohi ange ʻo ha siasi ke fai ha tali ki he ngaahi fakaʻuhinga mālohi mo e ʻuhinga totonu ʻoku ngāueʻaki ʻe he Kau Fakamoʻoní ke fakafepaki ʻaki ki he lau ko ia ko Sīsū ko e ʻOtuá.”
4 Ngāueleleiʻaki ʻa e Ngaahi Polosiuá: Ke hoko ʻo ola lelei, kuo pau ke tuku atu ʻa e ngaahi meʻangāue manakoa ko ení ki he kakai te nau lau iá. Koeʻuhi ʻoku tau maʻu ʻa e ngaahi polosiua kehekehe, ʻoku taki taha ʻi ai ʻene lave ki he ngaahi kaveinga kehekehe, ʻoku totonu ke tau feinga ke tuʻuaki ʻa e polosiua ʻoku tau pehē ʻoku feʻungamālie tahá ki he tokotaha ʻoku tau fai fakamoʻoni ki aí. Ko hono ʻiloʻi ʻetau ngaahi polosiuá pea mo toʻo maʻu pē ha ngaahi polosiua kehekehe te ne ʻai ke toe faingofua ange kiate kitautolu ʻa hono ngāueleleiʻaki iá, tatau ai pē pe ko e ʻalu ʻi he ngāue fakamalangá, pe ʻi ʻapi, pe ha feituʻu pē.
5 Ko e fakatātā, kapau ʻokú te lea ki ha taha ʻoku tāfuʻua ʻo kau ki he tokāteline Tolu-tahaʻi-ʻotua ʻo e Puleʻanga-Haʻa-Kalisitiané pe ʻokú ne fakakaukau nai ko e ʻOtuá ko Sīsū, ko e polosiua fē te ke ngāueʻakí? Kapau ʻe fehuʻi ha taha pe ko e hā ʻoku fakangofua ai ʻe he ʻOtua anga-ʻofá ke lahi ʻa e mamahí, ko e polosiua fē ʻe feʻungamālie ki aí? Kapau ko ha taha te ne fakahā ʻene tokanga ki hano fiemaʻu ha puleʻanga ʻe ʻaonga ki he kakaí, ko e fē ʻa e polosiua totonu ki he tokotaha ko iá?
6 ʻOku ʻikai ngata pē ʻi hono ʻiloʻi pe ko e fē ʻa e polosiua ke ngāueʻakí, kae feinga ke langaʻi ʻa e fie lau ʻa e tokotaha ko iá ki he ngaahi meʻa ʻoku ʻasi ʻi he polosiuá. Kapau ʻoku faingamālie ʻa e taimí, fakahanga ʻa e tokangá ki ha fakamatala pe ki ha fakatātā te ne langaʻi nai ʻene mahuʻingaʻia ʻi hono lau ʻa e polosiuá. Pe te ke lau ha palakalafi ʻe taha pe ua fakataha mo ia, pea mo lau mei he Tohitapú ʻa e ngaahi konga Tohitapu ʻoku hā aí, pea fai ha fakamatala ʻo kau ki ai. Kuo lahi ʻa e ngaahi ako Tohitapu lelei kuo kamata ʻi he founga ko ʻení.
7 ʻOku tokonaki mai ʻe heʻetau ngaahi polosiuá ʻa e ngaahi tali faka-Tohitapu pea fakahūhū ʻo fokotuʻu ha ʻamanaki ʻiate kinautolu kuo nau toʻe mo māpuhoi ʻi he ngaahi meʻa fakalielia kuo fai ʻi he māmaní. (Fehoanaki mo ʻIsikeli 9:4.) Ko e kakai ʻoku nau hangē ha sipí ʻe lelei ʻa e anga ʻo ʻenau tali ʻa e pōpoaki ʻa ia ʻoku hā ʻi he ngaahi tohi peheé. Ko hotau monū ia ke ngāueleleiʻaki ʻa e ngaahi polosiuá ʻi he ngaahi tafaʻaki kotoa pē ʻo ʻetau ngāue fakamalangá ʻi heʻetau kumi atu ʻa kinautolu ʻoku mahuʻingaʻiá.