Ko Hono Ngāue-ola-lelei-ʻaki ʻa e Ngaahi Polosiuá ʻi Siulai
1 Ke fakavave ʻa e ngāue ngaohi ākongá, kuo tokonaki anga-ʻofa mai ʻe he kautahá ʻa e ngaahi tohi kehekehe kuo pulusi. ʻI he lotolotonga ʻo e ngaahi tohi ko iá ʻoku ʻi ai ʻa e ngaahi polosiua ʻoku lave ki he ngaahi kaveinga tefitó, ʻo hangē ko e taumuʻa ʻa e ʻOtuá ki he māmaní, ko e Tolu-tahaʻi-ʻotuá, ko e huafa ʻo e ʻOtuá, ko e founga-pule Puleʻanga-Fakatuʻí, mo e fakangofua ʻe he ʻOtuá ʻa e anga-fulikivanú. ʻE lava fēfē ke tau ngāue-ola-lelei-ʻaki ʻa e ngaahi polosiuá ke tokoni ki he kakai ʻi hotau kauhalá?
2 Ko e polosiua ko e “Vakai! ʻOku Ou Fakafoʻou ʻa e Meʻa Kotoa Pe” ʻokú ne fakamatala ʻuhinga lelei mai ʻoku ofi ʻa e māmani foʻou ʻa ia ʻe ʻataʻatā ia mei he mamahí. ʻE fēfē nai haʻatau fakamatala ke tataki atu ki ai? ʻE lava ke maʻu ha ngaahi fokotuʻu ʻi he tohi Reasoning ʻi he ʻuluʻi kaveinga ko e “Suffering,” ʻo kamata ʻi he peesi 393, pe te ke saiʻia ʻi he lea kamata ʻi he kaveinga ko e “Injustice/Suffering” ʻi he peesi 12.
3 Te ke lea pehē ni nai:
◼ “Kuó ke fifili nai: ‘ʻOku tokanga moʻoni mai ʻa e ʻOtuá ki he hokosia ʻe he kakaí ʻa e taʻefaitotonú mo e mamahí?’” Tuku ke ne tali. Lau ʻa e Sāme 72:12-14. Pea hukeʻi ki he peesi 25 ʻo e polosiua ko e “Vakai! ʻOku Ou Fakafoʻou ʻa e Meʻa Kotoa Pe” pea fai ha fetalanoaʻaki ki he palakalafi 49 mo e 50. Kapau heʻikai ke tali ʻa e polosiuá, fēfē ke tuʻuaki ha tuleki, ʻo hangē ko e Fakafiemālie ki he Kau Loto-Mafasiá pe Moʻui ʻi ha Māmani Foʻou Melino?
4 Ko e founga-pule ʻoku leleí ko e meʻa ia ʻoku fai ha tokanga lahi ki ai he ʻaho ní. ʻOku fifili ʻa e tokolahi pe ʻe malava ʻe he pule ʻa e tangatá ke fakafāʻūtahaʻi ʻa e māmaní. ʻOku maʻu ʻa e fakamatala lelei ʻi he kaveinga ko e “Government,” ʻoku kamata ʻi he peesi 152 ʻo e tohi Reasoning.
5 Te ke ʻeke nai:
◼ “ʻE malava ʻe he faʻahinga ʻo e tangatá ke fokotuʻu ha founga-pule te ne fakahoko moʻoni mai ha fiefia tuʻuloa?” Tuku ke ne tali, pea toki ʻeke: “Ko e hā ʻoku fakahā mai ʻe he ngaahi fakamoʻoni ʻo kau ki he hisitōlia ʻo e faʻahinga ʻo e tangatá?” Sio ki he tohi Selemaia 10:23, pe huke ki he peesi 152 ʻo e tohi Reasoning pea lau ʻa e ngaahi konga Tohitapu mo e ngaahi fakamatala ʻoku feʻungá. Hili ia, huke ki he peesi 24 mo e 25 ʻi he polosiua ko e Puleʻanga pea fakamatalaʻi ʻa e ngaahi fakatātā mo e ngaahi konga Tohitapú. Fakamatalaʻi ʻa e founga ʻe fakatahatahaʻi ai ʻe he founga-pule ʻa e ʻOtuá ʻa e kakai ʻi māmani lahí. Kapau ʻe ʻikai ke tali ʻe he tokotaha-ʻapí ʻa e polosiuá, te ke tuʻuaki nai ʻa e tuleki ʻE Kei Tuʻu ʻa e Māmani ko Ení?
6 Kapau ʻoku manavahē ʻa e kakai ʻi hoʻo feituʻú ki he faihiá, ʻe fakamānako nai kiate kinautolu ʻa e fakamatala ko ʻeni ʻoku hokó.
7 Te ke lea nai ʻo pehē:
◼ “ʻOku fifili ʻa e kakai tokolahi, ‘Kapau ko e ʻOtuá ko e ʻofa, ko e hā ʻokú ne fakangofua ai ʻa e anga-fulikivanú?’ Kuó ke fifili ʻo kau ki he meʻá ni?” Tuku ke ne tali, pea te ke pehē: “Fakatokangaʻi ʻoku fai fakatokanga mai ʻe he Palōvepi 19:3 ʻo kau ki hono tukuakiʻi ʻa e ʻOtuá ki he ngaahi meʻa ʻoku kovi ʻoku fai ʻe he kakaí.” ʻI he ʻosi hono lau ʻa e konga tohí, fakahanga ʻa e tokangá ki he peesi 15 ʻo e polosiua ko e “Vakai! ʻOku Ou Fakafoʻou ʻa e Meʻa Kotoa Pe” pea lau ʻa e palakalafi 27. ʻE tataki atu nai ʻeni ki ha fetalanoaʻaki ki he ngaahi palakalafi ʻoku hokó.
8 ʻE lava ʻa kitautolu kotoa ke ngāueʻaki ʻa e ngaahi polosiuá ke akoʻi ʻa e kakai hangē ha sipí ʻo kau ki he ongoongo leleí. ʻE lava ke tau tokoni ki he kakai mei he ngaahi ʻātakai kotoa pē ke nau feohi mo e kautaha ʻa e ʻOtuá. Ko hotau monū ia ke kau ki he ngāue fakamalangá ʻo ngāue-ola-lelei-ʻaki ʻetau ngaahi polosiua faingatonú.