ʻAi ke Nau Ongoʻi ʻOku Talitali Lelei Kinautolu ʻi he Fakamanatú
1 ʻI he ngaahi taʻu siʻi kuo maliu atú, ko e toko 1 pē mei he toko 3 ʻo e kau maʻu Fakamanatú ko ha toko taha malanga ʻo e ongoongo leleí. ʻOku ngalingali ʻe toe pehē pē mo e taʻú ni. ʻE haʻu nai ha niʻihi koeʻuhi ko hano fakalototoʻaʻi fakamātoato ʻe ha kāinga pe ko ha maheni ʻoku nofo ʻi ha kolo kehe, pea ko e niʻihi kehe kuo ʻosi fakaafeʻi nai ia ʻe he kau malanga fakalotofonuá. Ka ʻoku ʻi ai ʻa e niʻihi kehe ʻoku nau haʻu, neongo kuo nau ʻosi papitaiso, ka ʻoku ʻikai te nau kei longomoʻui ʻi he ngāue fakamalangá. ʻOku tau talitali lelei loto-moʻoni ʻa e faʻahinga kotoa ʻoku nau fakahāhā ʻa e ʻapasia ki he fekau ʻa Sīsū: “Mou fai pehe mōku fakamanatu.”—1 Kol. 11:24; Loma 15:7.
2 ʻOku totonu ke tokanga ʻa e kau fakanofonofo kuo vaheʻí ke nau talitali lelei ʻa e toko taha kotoa pē, tautefito ki he faʻahinga foʻoú, ʻi heʻenau aʻu mai ki he Kingdom Hall. Kae kehe, ko kitautolu kotoa ʻoku lava ke tau muimui ki he ʻalunga ko e anga-ʻofa ʻi he tali kakaí ʻi he Fakamanatú. (Loma 12:13) ʻE lava fēfē ke tau fai ʻeni?
3 ʻE fuʻu femoʻuekina nai ʻi he efiafi ko iá ʻa e kau malanga ʻe niʻihi ʻi hono uta mai ʻa e kakai ʻoku fie fanongó. ʻE malava nai ʻe ha niʻihi kehe ke nau aʻu tōmuʻa mai pea kau ki hono talitali ʻo e kau ʻaʻahi ʻa ia ʻoku ʻikai te nau haʻu mo ha toko taha malanga fakalotofonuá. ʻI he hū mai ki he holó ha toko taha foʻou, talitali loto-māfana ia pea kamata ha fetalanoaʻaki. ʻEke kiate ia pe ʻokú ne ʻiloʻi ha taha ʻo e kau Fakamoʻoni fakalotofonuá. Kapau ʻoku pehē, tokanga kiate ia kae ʻoua kuo aʻu mai ʻa e toko taha ko iá. (Fakafehoanaki mo Luke 10:35) Kapau ʻoku ʻikai te ne ʻiloʻi ʻe ia ha taha, fēfē ke fakaafeʻi ia ke tangutu fakataha mo koe he lolotonga ʻa e fakatahá? Fakamatalaʻi kiate ia ʻa e founga ʻe ngāueʻaki ai ʻa e uainé mo e maá ʻi he lolotonga ʻo e polokalamá. ʻOku fie maʻu nai kiate ia ʻa hoʻo tokoní ʻi he kumi ki he ngaahi konga Tohi Tapu ʻoku lave ki ai ʻa e toko taha malangá.
4 ʻI he ʻosi ʻa hono fai ʻo e Fakamanatú, ʻai ke ne ʻiloʻi naʻá ke fiefia ʻi heʻene haʻú. ʻOkú ne maʻu nai ha ngaahi fehuʻi fekauʻaki mo ʻetau ngāué ʻa ia ʻe lava ke ke fai ha tali ki ai. Ko hoʻo houngaʻia ʻiate iá ʻe iku nai ki ha fetalanoaʻaki ʻi ha tuʻunga-lea faka-Tohitapu, ʻo fai ia ʻi he Kingdom Hall pe ko ha feituʻu kehe. Kuo kamata nai ha ngaahi ako lelei ʻaupito ʻe niʻihi ʻe he ngaahi tokoua tokanga pehē ʻa ia naʻa nau fai ʻe kinautolu ʻa e tomuʻa feinga lelei pehē ni. Ki muʻa ke mavahe atu ʻa e toko taha foʻoú mei he Kingdom Hall, fakafeʻiloaki ia ki he niʻihi kehé, pea fakaafeʻi loto-māfana ia ke toe haʻu.
5 Ko ha meʻa fakafiefia lahi ē ke tau talitali lelei ʻa siʻotau ngaahi tokoua mo e ngaahi tuofāfine kuo ʻikai te nau maʻu maʻu pē ʻa e ngaahi fakatahá pe kuo ʻikai te nau longomoʻui ʻi he ngāue fakamalangá ʻi ha vahaʻa taimi! ʻI he lelei ange ke ʻoua ʻe ʻeke ha ngaahi fehuʻi ʻo fekauʻaki mo e ʻuhinga kuo ʻikai te nau maʻu ai ʻa e ngaahi fakatahá, fakahāhā pē ʻa hoʻo fiefia ʻi hoʻo toe sio kiate kinautolú. Mahalo pē ʻoku ʻi ai ha meʻa te nau fanongo ai ʻi he lolotonga ʻo e malanga Fakamanatú ʻe ueʻi ai kinautolu ke nau toe fakakaukau lelei ki he ʻuhinga ʻo honau vahaʻangatae fakatapui mo Sihová. Ko e talitali lelei loto-māfana ʻoku tau faí pea mo e tokanga moʻoni ʻoku tau fakahāhaá ʻe aʻu nai ia ki honau lotó. ʻAi ke nau ʻilo ʻokú ke fakatuʻamelie atu ke toe fesiofaki mo kinautolu.—Loma 1:11, 12.
6 ʻE fai ha malanga fakahāhā makehe ʻi he lahi taha ʻo e ngaahi fakatahaʻangá ʻi ʻEpeleli 10 ʻa ia ʻoku fakakaveinga ko e “ʻOku Fakalato ʻe he Lotu Moʻoní ʻa e Ngaahi Fie Maʻu ki he Kakaí.” Fakapapauʻi ʻoku fakaafeʻi ki ai ʻa e faʻahinga kotoa ʻoku nau haʻu ki he Fakamanatú pea tokoniʻi kinautolu ke nau haʻu. Ko ʻetau ʻamanakí ia ʻe ongoʻi ʻe he faʻahinga kotoa ʻoku nau maʻu ʻa e ngaahi fakataha makehé ni ʻa e talitali lelei pea nau maʻu mo e loto-māfana ʻo e feohi ʻi he lotolotonga ʻo e kakai ʻa Sihová.—Sāme 133:1.