Ngāueʻaki ʻa e Ngaahi Makasiní ke Fakahā ʻa e Moʻoní
1 Kuo fakavaivaiʻi lahi ʻaupito ʻa e mahuʻinga ʻo e lea moʻoní mo e fakamatala fakatuʻunga ʻi he moʻoniʻi meʻá ʻi he anga ʻo e nofo ʻa e kakaí ʻi he ʻahó ni koeʻuhí ko e fuʻu hulu ʻa e fakalahi ʻo e ngaahi tuʻuakí, ko e ngaahi talaʻofa fakapolitikale ʻoku fakatupu takihalaʻí, pea mo e ngaahi fakamatala kākā fakaevahaʻapuleʻangá. ʻOku makehe atu ʻa e Ko e Taua Leʻó mo e Awake! koeʻuhi ko kinaua pē ʻokú na fakahāhā ʻa e moʻoni ʻo fekauʻaki mo e Puleʻanga ʻo e ʻOtuá mo fakamatala ʻa e meʻa kuo pau ke fai ʻe he faʻahinga hono kotoa ke nau maʻu ai ʻa e ngaahi tāpuaki taʻe ngata ʻe fakahoko mai ʻe he Puleʻanga ko iá.
2 ʻI ha fonua ʻe taha ko ha ʻofisa ʻi he potungāue fakamatalá naʻá ne houngaʻia ʻi he mahuʻinga ʻo e ongo makasiní pea naʻá ne tokoni ke vave ʻa hono maʻu ha ngofua ki hono tufakí. Naʻá ne pehē: “ʻOku ou pehē ko e Ko e Taua Leʻó ko e taha ia ʻi he ngaahi makasini lelei tahá; ʻoku ou fiefia ʻaupito ke fai ha tokoni.” Ko hotau monū ia ke tufaki ki he niʻihi kehé ʻa e ongo makasini ko ʻeni ʻokú na ʻoatu ʻa e ʻilo fakatupu-moʻuí. (Sione 17:3) Te ke tuʻuaki fēfē ʻa e ongo makasini mahuʻinga ko ʻení ʻi he lolotonga ʻo Mē? Mahalo ʻe tokoni ʻa e ngaahi fokotuʻutuʻu ʻoku hoko maí.
3 Kapau te ke fakaeʻa ʻa e ongo ʻuluaki kupu ʻi he “Taua Leʻo” ʻo Mē 1, te ke pehē nai:
◼ “ʻOku mau talanoa mo e kakaí ʻo fekauʻaki mo e ngaahi tau lahi ʻi he māmani ko ení. ʻOkú ke fakakaukau ʻe ʻi ai ha taimi ʻe ʻikai ke toe fai ai ha ngaahi tau? [Tuku ke ne tali.] ʻOku lave ʻa e Tohi Tapú ki ha taimi pehē ʻi he ʻAisea 2:4.” ʻI he ʻosi ʻa hono lau ʻo e veesí, fakaeʻa ʻa e ngaahi meʻa feʻunga mālie ʻi he taha ʻo e ongo kupú pea fakahanga ʻa e tokangá ki he fakaleleiʻanga ʻe fai ʻe he Puleʻanga ʻo e ʻOtuá.
4 ʻI hoʻo ngaahi nouti ʻo kau ki he ngaahi toe ʻaʻahí, ʻoku ngalingali ʻoku ʻi ai haʻo fakahokohoko ʻo kinautolu naʻa nau kiʻi fie fanongo pē ʻi he kamataʻangá, ka naʻe ʻikai ke ʻi ai ha ola. Koeʻuhi naʻe siʻisiʻi pē ʻa e fie fanongó, te ke fakakaukau nai ai ʻoku ʻikai fie maʻu ke toutou foki kiate kinautolu. Ka te ke malava nai ke ngāueʻaki ʻa e fakahokohoko ko ʻení ke kamata ʻaki ha tufaʻanga makasini pau. ʻI hoʻo fakatokangaʻi ha kupu ʻokú ke pehē ʻe fakamānako ki ha toko taha, fakapapauʻi ke ke ʻaʻahi ki he toko taha ko iá ʻo tuʻuaki ki ai ʻa e makasiní.
5 Fakamoʻoni ʻIkai ʻi he Founga Mahení: Ko e founga mātuʻaki lelei ʻaupito ʻeni ke fakatupu ai ha mahuʻingaʻia ʻi he ongo makasiní. Ko hano kiʻi fakaʻaliʻali ʻo e ngaahi takafi fakatupu-tokangá ʻe feʻunga nai pē ia ke kamata ai ha fetalanoaʻaki. Naʻe hili ʻe ha tuofefine ha ngaahi tatau ʻe niʻihi ʻi heʻene funga tesí koeʻuhi ke malava ʻo sio ki ai ʻa e kaungāngāué ʻi heʻenau ʻalu haké; naʻe malava ai ke ne tuku atu ha ngaahi makasini ʻe niʻihi. Fakapapauʻi ke toʻo maʻu pē ʻa e ngaahi tatau ʻe niʻihi, pea ke tomuʻa fai ʻe kita ha meʻa ke tuʻuaki ai kinaua ʻi he māhiná ni ʻi hoʻo ʻalu ʻo fai ʻa e fakataú, ʻalu ki he akó, heka ʻi he pasí, pe ʻi hoʻo fetaulaki mo e kakai kehe ʻi he ngaahi feituʻu kehé.
6 ʻI he tokoni ʻa e Ko e Taua Leʻó mo e Awake!, kuo tau maʻu ai ʻa e ngaahi tali ki he ngaahi fehuʻi mātuʻaki mahuʻinga ʻo fekauʻaki mo Sihová mo e lotu kiate iá. ʻOku totonu ke tau ngāueʻaki ʻa e ongo makasini ko ʻení ʻi he ngaahi founga kotoa pē ʻe malava ke tokoni ai ki he niʻihi kehé ke nau ʻilo ʻa “Sihova, ʻa e ʻOtua Moʻoniā.”—Sāme 31:5.