Ko Hono Langaʻi Hake ʻa e Tui ki he Toko Taha Fakatupu ʻo e Kakaí
1 Ko e kakai tokolahi ʻoku nau tui ki he pehē ʻi he hili ʻa e maté te nau ʻalu ki hēvani. Ka ko e meʻa pangó, ko e tokolahi kuo tākiekina halaʻi ʻe he ngaahi akonaki fakalotu ʻo fekauʻaki mo e meʻá ni. ʻOku fakahā mahino ʻe he polosiua ko e “Vakai!” ʻa e moʻoni mei he Tohi Tapú ʻi ha founga faingofua. Ko e hā te tau fai ke tokoniʻi ʻa e faʻahinga loto-totonu ʻoku hā mai ʻoku nau fie fanongó? ʻAki ʻa e toe ʻaʻahi. ʻI heʻetau toe ʻaʻahí, ʻoku lelei maʻu pē ke ʻi ai ha meʻa pau te tau leaʻaki ke ne langaʻi hake ʻa e tui kia Sihova ko hotau Toko Taha Fakatupú.
2 Kapau naʻá ke talanoa mo ha toko taha ʻo fekauʻaki mo e moʻoniʻi meʻa ko e maté ko ha fili, ko e founga eni ʻe taha ʻe ʻaonga nai ke kamata ai hoʻo fetalanoaʻakí:
◼ “ʻI heʻeku ʻaʻahi fakamuimui maí, naʻe langaʻi hake ai ʻa e fehuʻi, Ko e maté ko ha kaumeʻa pe ko ha fili? Naʻe fakatupu tokanga kiate kitaua ke ʻilo ʻa e anga ʻo e vakai ʻa e Tohi Tapú ko e moʻoni ko e maté ko ha fili ia. Ka ko e hā moʻoni ʻa e maté? [Lau ʻa e palakalafi 32 ʻi he peesi 16 ʻo e “Vakai!” pea tuku ke ne tali.] Ka ko e hā ʻa e ʻamanaki kiate kinautolu kuo nau maté? Te tau sio angé pe ko e hā ʻa e lau ʻa hotau ʻEiki ko Sīsuú ʻi he Sione 5:28, 29.” Lave ki he palakalafi 41 ʻi he peesi 21 ʻo e polosiua ko e “Vakai!”, pea ʻohake ha toe ngaahi ʻuhinga ke tui ai ki he ʻamanaki ʻo e toe tuʻú.
3 Te ke lava nai ʻo kamata hoʻo fetalanoaʻakí ʻaki ha meʻa ʻo hangē ko ʻení:
◼ “ʻI he taimi fakamuimui taha naʻá ta fetaulaki aí naʻá ta talanoa ai ʻo kau ki he vavé ni mai ke fakangata ʻe Sihova ʻa e fulikivanú ʻi heni tonu ʻi he māmaní. Naʻá ku tuku atu foki ʻa e fehuʻi, Ko e hā ʻa e kahaʻu ʻo e tangatá pea mo e māmaní? Fakatokangaʻi ʻa e tali ki he fehuʻi ko iá ʻi he polosiua naʻá ku tuku atú.” Huke ki he peesi 29 ʻo e polosiua ko e “Vakai!” pea fakalototoʻaʻi ia ke ne lau ʻa e palakalafi 57 mo e 58. Kapau ʻoku hā mai ʻokú ne fie fanongo ʻo lahi ange, te ke ʻeke nai: “ʻOkú ke fakakaukau, ko e hā ʻa e ngaahi liliu lahi fakaʻulia ʻe hoko ki he māmaní?” Kapau ʻe feʻunga, ʻe lava ke fai ha talanoa ki he poini ko iá ʻi he taimi pē ko iá pe ʻi hoʻo toe ʻaʻahi hono hokó ʻaki hoʻo hoko atu ʻi ha toe ngaahi palakalafi ʻi he polosiuá ni.
4 Ko e toe founga ʻe taha ʻe lava ke kamata ai ha toe ʻaʻahí ko hoʻo lea pehē ni nai:
◼ “Kuo faingataʻaʻia ʻa e faʻahinga ʻo e tangatá ʻi he ngaahi meʻa fakamamahi mo e loto-mamahi koeʻuhi ko e koví mo e fulikivanú. Naʻe talaʻofa mai ʻe Sihova ko e Toko Taha Fakatupu ʻo e māmani ko ení, ʻe ngata ʻa e ngaahi tuʻungá ni. [Lau Palōvepi 2:21, 22.] Ko kinautolu ʻoku nau lāuʻilo ia ko honau Toko Taha Ngaohí pea fai hono finangaló ʻoku nau fakatuʻamelie atu ki he ngaahi tāpuaki fakaofo.” Kapau ʻoku feʻunga ʻi he taimi ko iá, hoko atu ʻa e talanoá ki he Fakahā 21:4, 5 ʻi he peesi 29-30.
5 Ko e kau malanga taukeí kuo nau ʻilo ko e meʻa lelei tahá ke vaheʻi ʻa e taimi pau ki he ngaahi toe ʻaʻahí. ʻI hono fai ʻa e ngaahi fokotuʻutuʻu pau ki he ngāué ni ʻe tokoniʻi ai kitautolu ke vave ange ai ʻa e toe foki ki he faʻahinga ʻoku nau fie fanongó. Fakapapauʻi ʻa e taimi ʻe lelei taha kiate koé pea pehē ki he kakai ʻoku nofo ʻi he feituʻu ʻokú ke ngāue aí. ʻI hoʻo kau maʻu ai pē ki he ngāué ni, te ke maʻu ai ʻa e fiefia ʻi hono fakahoko ʻa e ngāue kuo vaheʻi mai ko e “ngaohi ākonga.”—Mt. 28:19, 20, NW.