Fakahā ʻa Hoʻo Tokangá ʻAki Hono Fai ʻa e Ngaahi Toe ʻAʻahí
1 ʻI he kumi ki he faʻahinga mahuʻingaʻiá mei he matapā ki he matapaá ʻokú ne fakahāhaaʻi ʻa hoʻo holi ke ʻoatu ha faingamālie ki he niʻihi kehé ke nau fanongo ki he pōpoaki ʻo e Puleʻangá. Ko ia fakapapauʻi ke ke foki ki he niʻihi naʻa nau tuku ʻi he lolotonga ʻo e māhina Sanualí, he ko e founga lelei ʻeni ke fakahā ai ʻa hoʻo tokanga ʻo fekauʻaki mo e niʻihi kehé.
2 ʻI hono fai ha toe ʻaʻahi ʻi he ʻosi hono tuku ʻa e polosiua ko e “Vakai! ʻOku Ou Fakafoʻou ʻa e Meʻa Kotoa Pe,” te ke kamata nai ʻaki haʻo fakaʻaliʻali ʻa e fakatātā ʻi he takafí pea ke ʻeke ʻa e fehuʻí ni:
◼ “Okú ke fakakaukau ʻe anga-fēfē ha moʻui ʻi ha māmani haohaoa? [Tokanga ki he fakamatala ʻa e tokotaha ʻapí.] Ko e meʻa ko ʻeni ʻokú ke sio ki ai ʻi he fakatātā ko ʻení ʻoku ʻikai ko ha fakasino mai pē ia ʻo ha fakakaukau; ka ʻoku makatuʻunga ia ʻi he ngaahi talaʻofa papau kuo fakahā ʻi he Tohi Tapú. [Lau ʻa e Fakahā 21:4 mo e Sāme 37:11, 29.] ʻOku ou fie fakamatala atu kiate koe ʻa e founga te ke maʻu ai mo ho fāmilí ʻa e tāpuaki ko ʻení.” Kapau ʻoku hā mei he tokotaha ʻapí ha mahuʻingaʻia, hoko atu ʻa e fetalanoaʻakí, pea tuʻuaki ha ako Tohi Tapu.
3 Ko ha founga ʻe taha, kapau naʻá ke tuku ʻa e polosiua ko e “Vakai!,” te ke pehē nai:
◼ ʻI heʻeku ʻaʻahi mai ki muʻa atú, naʻá ta lau ai ʻi he Tohi Tapú ʻo fekauʻaki mo e talaʻofa ʻa e ʻOtuá te ne ngaohi ʻa e māmaní ko ha palataisi, ʻo hangē pē ko ia kuo fakatātaaʻi ʻi he takafi ʻo e polosiua naʻá ku tuku atú. ʻE malava ke tau maʻu ʻa e tāpuaki ko ʻení ʻi haʻatau ako ke lahi ange ʻo fekauʻaki mo e finangalo ʻo e ʻOtuá pea mo e anga ʻo ʻene kaunga ʻi heʻetau moʻuí.” Lau ʻa e Sione 17:3, pea huke ki he palakalafi 52 mo e 53 ʻi he peesi 27. Fakamatalaʻi fuonounou ʻa e ʻuhinga ʻoku fiemaʻu ai kiate kitautolu ke tau maʻu ʻa e ʻilo kānokano ki he Folofola ʻa e ʻOtuá.
4 ʻI hoʻo toe ʻaʻahi ʻi he ʻosi ʻa hono tuku ʻa e kiʻi tohi ko e “ʻOku ʻI Ai Ha ʻOtua ʻOku Tokanga Mai?,” mahalo ko ha meʻa ʻe hangē ko ʻení ʻe ola lelei:
◼ “ʻI heʻeku ʻaʻahi mai ki muʻá, naʻá ta fetalanoaʻaki ai ki he fehuʻi, ʻOku ʻi ai ha ʻOtua ʻoku tokanga mai? ʻOkú ke fakakaukau ʻoku feʻunga ʻa e tokanga mai ʻa e ʻOtuá kiate kitautolú ke ne fakangata ʻa e faingataʻaʻiá mo e fakamalohí? [ʻI he ʻosi ʻa ʻene talí, sio ki he palakalafi 32, pea ke hoko atu.] Kuo talaʻofa ʻe he ʻOtuá ke fetongi ʻa e māmani anga-fulikivanu ko ʻení ʻaki ha māmani foʻou ʻe nofoʻi ʻe he kakai lelei ʻa ia ʻe malava ke nau moʻui melino. [Lau Sāme 37:11.] Te ta malava foki ʻo maʻu ʻa e moʻui ʻi he māmani foʻou ko iá ʻo kapau te ta tui ki he Tohi Tapú mo ngāueʻaki ʻene enginakí.” Fakamatala ki heʻetau fokotuʻutuʻu ke tokoni ki he kakaí ke nau ako ʻa e Tohi Tapú.
5 Kuo fokotuʻu ʻe Sihova ha faʻifaʻitakiʻanga haohaoa ko ha Tauhi-sipi anga-ʻofa ʻokú ne tokangaʻi ʻa ʻene fanga sipí. (ʻIsi. 34:11-14) ʻOku fakahōifua kiate ia ʻa ʻetau feinga fakamātoato ke faʻifaʻitaki ki heʻene tokanga anga-ʻofá, mo fakahāhā ʻa ʻetau ʻofa, pea ʻe maʻu ai ʻe he niʻihi kehé ʻa e ngaahi tāpuaki.