Ngāueleleiʻaki ʻa e Polosiua “Vakai!”
1 Kuo tokonaki mai ʻe Sihova kiate kitautolu ʻo hulu ʻa e ngaahi meʻakai lelei fakalaumālié. Ko e lahi ʻi he ngaahi meʻá ni kuo ʻomai ia ʻi he ngaahi tohi iiki mo e ngaahi polosiua kuo pulusi ʻi he ngaahi taʻu ki mui ní. ʻI he lolotonga ʻo Sanualí te tau tuʻuaki atu ai ʻa e taha ʻo e ngaahi tohí ni, ko e polosiua “Vakai! ʻOku Ou Fakafoʻou ʻa e Meʻa Kotoa Pe.” ʻE lava nai ke tau tuʻuaki ko hano fetongi ʻa e kiʻi tohi ko e ʻOku ʻIa Ai Ha ʻOtua ʻOku Tokanga Mai? ʻE lelei ke toe vakai ki he ngaahi meʻa ʻi he ongo tohí ni pea filifili ha ngaahi poini mahuʻinga ʻe lava ke ke ngāueʻaki ʻi hoʻo tuʻuakí.
2 Ko e polosiua ko e “Vakai!” ʻe malava ke tuʻuaki ʻatu ia ʻaki hono fakaʻaliʻali ʻa e fakatātā ʻi he takafí fakakātoa pea ʻeke ange:
◼ “Ko e hā ʻokú ke fakakaukau ʻe fiemaʻu ki hano ʻai ʻa e māmaní ke hangē ko ʻení? [Tuku ke ne tali.] Ko e tokotaha kotoa pē ʻi he fakatātā ko ʻení ʻoku ʻi ai hono ʻapi mo e ngāue fakatupu-fiefia. ʻOku ʻi ai ʻa e melino pea lahi ʻa e meʻa ke kaí, pea ko e māmani ia ʻoku ʻikai ke ʻuliʻi. Neongo kuo fai ʻe he ngaahi puleʻanga ʻo e tangatá ha feinga lahi ʻaupito, ʻoku nau pehē ʻoku ʻikai te nau malava ke fakahoko mai ha māmani pehē. Kae kehe, ʻoku fakapapauʻi mai kiate kitautolu ʻe he Tohi Tapú ʻe ‘fakafoʻou ʻa e ngaahi meʻa kotoa pē’ ʻe he ʻOtuá. [Huke ki he peesi 30, pea lau ʻa e Fakahā 21:3, 4.] Ko e polosiua ko ʻení ʻe malava ke ne tokoniʻi koe ke ke ako ki he meʻa ʻoku fiemaʻu kiate koe ke ke fai ka ke nofo ʻi he māmani foʻou ko iá.” Kapau ʻoku feʻunga ʻa e fie fanongo ʻoku hā maí, huke ki he peesi 3, mo fakahāhā ʻa e anga ʻo ʻetau fai ʻa e ako Tohi Tapú.
3 Ko e taha ʻeni ʻo e founga ʻoku malava nai ke ke ngāueʻaki ai ʻa e kiʻi tohi ko e “ʻOku ʻI Ai Ha ʻOtua ʻOku Tokanga Mai?”:
◼ “Kuo ʻeke ʻe he kakai tokolahi ʻa e fehuʻi ʻoku hā ʻi he ʻuluʻitohi ʻi lalo ʻi he ongo fakatātā ko ʻení. [Lau ʻa e fehuʻi ʻi he tafaʻaki ki lalo ʻo e peesi 6 mo e 7, pea tuku ke ne tali.] Pea koeʻuhi ko ha ʻOtua ʻofa ʻoku ʻikai te ne poupouʻi fakatouʻosi ʻa e lelei mo e koví ʻi he taimi tatau pē, ko e hā ʻa hoʻo fakakaukau ki heʻene talaʻofa kuo hiki ʻi he ʻAisea 65:21-24?” Kapau te ke maʻu ha fakamatala ʻoku hā mei ai ha mahuʻingaʻia, sio ki he palakalafi 37, pea fakamatala ki he meʻa ʻe fakahoko ʻe he Puleʻanga ʻo e ʻOtuá.
4 Ko ʻetau ngaahi tohí kuó ne ueʻi ʻa e kakai ʻe laui afe ke sivisiviʻi ke toe ofi ange ʻa e Tohi Tapú. Ko e meʻa naʻa nau akó kuo nau maʻu ai ʻa e ʻamanaki ki ha kahaʻu fiefia. (Sāme 146:5) Ko hotau monū ia ke tokoni kiate kinautolu.