Puha Fehuʻi
◼ Ko e hā ʻa e ngaahi meʻa ʻoku totonu ke tau ʻave ki he ngaahi fakatahá?
ʻI he uike taki taha ʻoku tau maʻu ai ʻa e fakahinohino ʻaonga mo e fakalototoʻa ʻi he ngaahi fakataha ʻa e fakatahaʻangá. (ʻAi. 48:17; Hep. 10:24, 25) Kae kehe, ko e lahi ʻa e ʻaonga te tau maʻú, ʻoku makatuʻunga lahi ia pe naʻa tau haʻu kuo ʻosi teuteu lelei pe ʻikai.
ʻE lelei ki he mēmipa taki taha ʻi he fāmilí ke ʻi ai haʻane nāunau ako mo e ngaahi meʻa kehe ʻoku fiemaʻu ki he ngaahi fakatahá. ʻE fakakau ki heni ha Tohitapu, ha tohi hiva, ko e ngaahi tohi ʻe fai ai ʻa e akó, ha kiʻi tohi hiki nouti, mo ha peni pe peni-vahevahe.
ʻE fiemaʻu ki he Ako Fakafaifekau Fakateokalatí ʻa e Fakahokohoko Ako Fakafaifekau Fakateokalatí mo e Theocratic Ministry School Guidebook. Ko e ngaahi meʻá ni te nau tokoniʻi kitautolu ke tauhi maʻu ʻi heʻetau fakakaukaú ʻa e kaveinga ʻa e tokotaha ʻokú ne fai ʻa e malangá pea ke tau muimui foki ʻi he akonaki ʻe fai ʻe he ʻovasia ʻo e akó. ʻE malava ke tau ʻai kiate kitautolu fakafoʻituitui ʻa e akonakí mo e ngaahi fokotuʻú ʻi he tuʻunga ke fakaleleiʻi ai ʻetau malanga ʻoku faí pea mo e ngaahi fakamatala ʻi he ngāue fakamalangá. Ko e lahi taha ʻo e ngaahi malanga fakahinohinó ʻoku makatuʻunga ia ʻi he Fāʻūtaha ʻi he Lotu ki he ʻOtua Moʻoni Pē Taha. Ko e mēmipa taki taha ʻe lava ke ʻave haʻane tatau koeʻuhi ʻe alamaʻu ai ʻa e ngaahi fakamatalá.
Ki he Fakataha Ngāué, ʻoku fiemaʻu ke tau maʻu ʻa e tatau lolotonga ʻo ʻEtau Ngāue Fakafaifekau ʻo e Puleʻanga pea mo e tohi Reasoning. ʻAve ʻa e ngaahi tohi ʻe lave ki ai lolotonga ʻa e fakatahá, hangē ko e ngaahi tohi ʻe ngāueʻaki ki hono fai ʻo e ngaahi fakahāhā. ʻOku totonu ki he kau mātuʻá ke ʻi ai haʻanau tatau ʻo e Organized to Accomplish Our Ministry.
ʻOku totonu ki he ngaahi mātuʻá ke nau feinga ke ʻai ʻenau fānaú ke nau tangutu maʻu fakalongolongo pea fanongo tokanga ʻi he ngaahi fakataha ʻa e fakatahaʻangá. ʻI hono ʻoange haʻanau tatau fakafoʻituitui ʻo e Taua Leʻo mo e ngaahi tohi kehé, naʻa mo e ki muʻa ke nau lava ʻo lautohí, ʻoku fakalototoʻaʻi ai kinautolu ke nau mahuʻingaʻia ai. ʻI he taimi ʻoku akoʻi ai ʻa e fānau iikí ke nau fakamahuʻingaʻi ʻa e ngaahi tohi fakateokalatí pea ke ngāueʻaki kinautolú, ʻe fakatupulekina ai ha ʻulungāanga fakalaumālie kakato mo tuʻuloa.
Ko e fiefia mo e fiemālie ʻoku tau maʻu mei he ngaahi fakataha ʻa e fakatahaʻangá, ʻe toe lahi ange ia ʻi heʻetau haʻu kuo ʻosi teuteu kakató. (2 Tīm. 3:17) Ko e founga lelei taha eni ke fakapapauʻi ai kuo “fakafonu akimoutolu aki ae ilo ki hono finagalo [ʻo e ʻOtua] i he boto kotoabe moe ilo fakalaumalie.”—Kol. 1:9, PM.