ʻOku Akoʻi Kitautolu ʻe Sihova ki he Ngāue ko Ení

1. ʻI hono ʻoange ʻe Sihova ki he faʻahinga ʻo e tangatá ha vāhenga-ngāué, ko e hā ʻokú ne toe faí?

¹ ʻI hono ʻoange ʻe Sihova ki he faʻahinga ʻo e tangatá ha vāhenga-ngāué, ʻokú ne toe ʻoange kia kinautolu ʻa e tokoni ʻoku nau fiemaʻu ke fakahoko ʻaki iá. Ko e fakatātaá, ʻi hono tala ange ʻe Sihova kia Noa ke faʻu ha ʻaʻaké, ʻa e meʻa naʻe teʻeki ʻaupito ke fai ki muʻa ʻe Noá, naʻá Ne toe tala ange kiate ia mo e foungá. (Sen. 6:14-16) ʻI hono vaheʻi ange ki he tauhi-sipi anga-vaivai ko Mōsesé ke ne lea ki he kau mātuʻa ʻo ʻIsilelí mo Feló, naʻe fakapapauʻi ange kiate ia ʻe Sihova: “Te u ʻi ho ngutu ʻe au, pea te u fakahinohino kiate koe ʻa e lea te ke fai.” (Eki. 4:12) ʻI he taimi ʻoku haʻu ai ki hotau vāhenga-ngāue ke malangaʻi ʻa e ongoongo leleí, kuo ʻikai ke siʻaki kitautolu ʻe Sihova. ʻOkú ne akoʻi kitautolu ki he ngāue ko ení fakafou ʻi he Ako Fakafaifekau Fakateokalatí mo e Fakataha Ngāué. ʻE lava fēfē ke tau maʻu ʻaonga mei he ako ko ení?

2. ʻE lava fēfē ke tau maʻu ʻaonga mei he Ako Fakafaifekau Fakateokalatí?

² Ko e Ako Fakafaifekau Fakateokalatí: Vakaiʻi ʻa e fakamatala kuo fakataimitēpileʻí ki muʻa ke maʻu ʻa e fakataha taki taha. ʻI hoʻo sio leva ki he anga hono ngāueʻaki ʻe he kau akó ʻa e fakamatala ko ení ʻi heʻenau ngaahi kongá, ʻe fakamāsilaʻi ai ʻa hoʻo mahino ki he founga ke faiako aí. (Pal. 27:17) ʻOmai hoʻo tohi Ako Fakafaifekau ki he fakatahá pea ngāueʻaki ia ko ha tohi-ako. ʻI he lave ki ai ʻa e ʻovasia akó hili ʻa e konga ʻa e tokotaha ako taki taha, laineʻi ʻa e ngaahi poini tefito ʻokú ke fie ngāueʻakí, pea ngāueʻaki ʻa e tafaʻakí ke hiki ai ha ngaahi nouti. Kae kehe, ko e founga lelei taha ke maʻu ʻaonga ai mei he ako ko ení, ko e kau ki ai. ʻOkú ke kau ki ai? ʻI hoʻo maʻu ha konga, teuteu lelei pea ngāueʻaki ʻa e akonaki ʻokú ke maʻú. ʻI he ngāue fakafaifekaú, ngāueʻaki ʻa e meʻa kuó ke akó.

3. Ko e hā te ne tokoniʻi kitautolu ke maʻu ʻaonga ai mei he Fakataha Ngāué?

³ Ko e Fakataha Ngāué: Te tau manatuʻi lelei ange ʻa e ngaahi fokotuʻu naʻe fai lolotonga ʻa e fakataha ko ení ʻi hono lau ki muʻa ʻa e fakamatalá pea mateuteu ke fai ha tali. Kapau ʻe tauhi ke nounou ʻetau ngaahi talí, ʻe malava ai ke kau ki ai ʻa e tokolahi ange. Tokanga lelei ki he ngaahi fakahāhaá, pea ngāueʻaki ha ngaahi fokotuʻu pē ʻokú ke ongoʻi ʻe ʻai ai ke ola lelei ange ʻa hoʻo ngāue fakafaifekaú. Tauhi ha tatau ʻo e ngaahi kupu tefito mei he Ko ʻEtau Ngāue Fakafaifekau ke ngāueʻaki ʻi he kahaʻú.

4. Ko e hā ʻoku totonu ai ke tau ngāueleleiʻaki ʻa e ako fakateokalatí?

⁴ Hangē ko e vāhenga-ngāue naʻe ʻoange kia Noa mo Mōsesé, ko e fekau kuo tuku mai ke tau malangaʻi ʻa e ongoongo leleí ʻi he māmani kuo nofoʻí kotoa ko ha pole ia. (Mt. 24:14) ʻE lava ke tau lavameʻa kapau te tau falala kia Sihova, ʻa ʻetau Faiako Maʻongoʻongá, pea ngāueleleiʻaki ʻa e ako kuó ne ʻomaí.—Ai. 30:20, NW.