Ko e Hā ʻa e Anga ʻOku Taau mo Kimoutolú?

¹ ʻOku ofi mai ʻa e taimi ke fai ai ha fakamatala ʻe he faʻahinga kotoa pē ʻo e tangatá. ʻOku ui ia ʻi he Tohitapú ko e “aho oe Otua.” Ko e taimi ia ʻe fakahoko ai ʻa e fakamaau ʻa e ʻOtuá ki he anga-fulikivanú; ko e toe taimi foki ia ki hono fakahaofi ʻo e māʻoniʻoní. Ko e faʻahinga kotoa pē ʻe moʻui ʻi he taimi ko iá ʻe fiemaʻu ke nau fai ha fakamatala ki he founga naʻa nau ngāueʻaki ki ai ʻa ʻenau moʻuí. ʻI he fakakaukau ko iá, naʻe langaʻi ai ʻe Pita ha fehuʻi hangatonu: “Koeha ae aga oku tāu mo kimoutolu”? Naʻá ne fakamamafaʻi ʻa e mahuʻinga ʻo e ‘ngaahi ʻulugaaga maonioni, aga faka-Otua [“ngaahi ngāue ʻo e anga-līʻoa ki he ʻOtua,” NW] mo holi atu ki he hoko mai oe aho oe Otua,’ pea pehē ki he fiemaʻu ke ‘melino, tae ha ila mo taehalaia.’​—2 Pita 3:​11-14, PM.

² Ngaahi ʻUlungaanga Māʻoniʻoni mo e Ngaahi Ngāue ʻo e Anga-Līʻoa ki he ʻOtuá: ʻOku kau ki he ʻulungaanga māʻoniʻoní ʻa e ngaahi ngāue ala faʻifaʻitakiʻanga ʻoku hā mei ai ʻa e ʻapasia ki he ngaahi tefitoʻi moʻoni ʻi he Tohitapú. (Tai. 2:​7, 8) Ko ha Kalisitiane kuo pau ke fakaʻehiʻehi mei he ʻulungaanga fakaemāmani ʻoku fakatupu ʻe he ngaahi holi siokita fakaekakanó.​—Loma 13:​11, 14.

³ Ko e “anga-līoa ki he ʻOtuá” ʻoku fakamatalaʻi ko “ha piki fakafoʻituitui ki he ʻOtuá, mei ha loto-houngaʻia loloto ki hono ngaahi ʻulungaanga fakamānakó.” Ko ʻetau faivelenga ʻi he ngāue fakamalangá ko ha founga tuʻu-ki-muʻa ia ʻoku tau fakahāhā ai ʻa e ʻulungaanga ko ʻení. Ko e meʻa ʻokú ne ueʻi hotau lotó ʻi he ō ʻo malangá ʻoku mahulu atu ia mei he ongoʻi ko ha fatongia pē; ʻoku tupu ia mei ha ʻofa loloto kia Sihova. (Mk. 12:​29, 30) ʻI hono ueʻi ʻe he ʻofa peheé, ʻoku tau lau ʻa ʻetau ngāue fakamalangá ko e fakahāhā mohu ʻuhinga ia ʻo ʻetau anga-līʻoa ki he ʻOtuá. Koeʻuhi kuo pau ke tuʻumaʻu ʻa ʻetau anga-līʻoá, ʻoku totonu ke tau kau maʻu ai pē ki he ngāue fakamalangá. ʻOku totonu ko e konga mahuʻinga ia ʻo e taimi-tēpile fakauike ʻo ʻetau ngāué.​—Hep. 13:15.

⁴ Ko e “holi atu ki he hoko mai” ʻa e ʻaho ʻo Sihová ʻoku ʻuhingá ke fakamuʻomuʻa ia ʻi heʻetau ngaahi fakakaukau fakaʻahó, ʻo ʻoua ʻaupito ʻe tuku hifo ia ki ha tuʻunga ʻoku ʻikai ke mahuʻinga. ʻOku ʻuhingá ke hanganaki fakamuʻomuʻa ʻa e ngaahi meʻa mahuʻinga ʻo e Puleʻangá ʻi heʻetau moʻuí.​—Mt. 6:33.

⁵ Taʻe ha ʻIla, Taʻehalaia, mo Melino: ʻI he tuʻunga ko e konga ʻo e fuʻu kakai lahí, kuo tau ‘fō hotau kofu, ʻo fakahinehina ʻi he taʻataʻa ʻo e Lami.’ (Fkh. 7:14) Ko ia, ʻoku ʻuhinga ʻa e “tae ha ila” kuo pau ke tau tuʻumaʻu ʻo maluʻi ʻetau moʻui maʻa naʻe fakatapuí mei hano ʻuliʻi ʻaki ʻa e ngaahi ʻuli mei he māmaní. ʻOku tau tauhi kitautolu ke “taehalaia” ʻaki ʻetau fakafisi ke ʻoua ʻe fakaʻatā ʻa e tulimui anga-taʻefakaʻotua ki he ngaahi meʻa fakamatelié ke nau maumauʻi ʻa hotau ʻulungaanga faka-Kalisitiané. (Sēm. 1:27; 1 Sione 2:​15-17) ʻOku tau fakahāhā ʻoku tau nofo “melino” ʻaki hono tapua atu ʻa e “nonga ʻa e ʻOtua” ʻi heʻetau feangainga kotoa mo e niʻihi kehé.​—Fili. 4:7; Loma 12:18; 14:19.

⁶ Kapau te tau lavameʻa ʻi hono maluʻi kitautolu mei he ʻuliʻi ʻe he māmaní, ʻe ʻikai ʻaupito te tau tuku ‘ke fakaangatatau kitautolu ki he maama ko eni,’ ʻa ia kuo ʻosi fakahalaiaʻi ʻe Sihová. Ka, ko ʻetau ngaahi ngāue leleí ʻe tokoni ia ki he niʻihi kehé ke nau sio ki he “faikehekehe ʻa e taha ʻoku ngaue ki he ʻOtua mo ia ʻoku ʻikai ke ngaue ki ai.” (Loma 12:2; Mal. 3:18) Ko e kau foʻou tokolahi ʻoku nau maʻu he taimí ni ha holi ke fakahāhā ʻa ʻenau anga-līʻoa ki he ʻOtuá. ʻE lava ke tau hoko ko e tāpuaki ʻaki haʻatau tokoniʻi kinautolu ke kau ʻi he ngāue fakamalangá ʻi ʻAokosi.

⁷ ʻOku ngeia ai ʻa e huafa ʻo Sihová, ʻoku mālohi ange ai ʻa e fakatahaʻangá, pea ʻoku maʻu mei ai ha ʻaonga ʻe he niʻihi kehé ʻi heʻetau tauhi maʻu ʻa ʻetau “ngaahi ngaue lelei.” (1 Pita 2:12) ʻOfa ke tau anga pehē maʻu ai pē.