Kumi ki he Faʻahinga ʻOku Hehema Totonú
1 Ko e taumuʻa ʻe taha ʻo e ngāue fakamalangá ko hono kumi ʻa kinautolu “ʻoku hehema totonu ki he moʻui taʻengata.” (Ng. 13:48, NW) Ko hono tufaki atu ʻo e ongo makasini Taua Leʻo mo e Awake! kuo fakamoʻoniʻi ko ha founga lelei ʻaupito ia ki hono fakahoko ʻa e meʻá ni, koeʻuhi ko ʻetau ongo makasiní ʻokú na tohoaki ai ʻa e tokanga ʻa e kakaí ki he ʻamanaki ʻo e Puleʻangá. Te tau fakaeʻa ʻa e ngaahi makasiní ʻi he lolotonga ʻo ʻEpelelí. ʻOku ʻamanekiná, ʻi he maʻu ha mahuʻingaʻia, ʻe lava ke kamata ha ngaahi ako foʻou ʻi he tohi ko e ʻIlo ʻA Ia ʻOku Taki Atu ki he Moʻui Taʻengatá. Ko e ngaahi fokotuʻu ʻeni ʻe ʻaonga nai kiate koe:
2 ʻI hono ngāueʻaki ʻa e “Taua Leʻo” ʻo ʻEpeleli 1, te ke fakaeʻa nai ʻa e “Fakahīkihikiʻi ʻa e Tuʻi ʻo ʻItānití!” ʻa ia naʻe fakahangataha ki ai ʻa e malanga fakahāhā ʻo e fakataha-lahi fakavahe “Kau Fakahīkihiki”ʻo pehē:
◼ “Ko e kakai tokolahi ʻoku mau talanoa ki ai ʻoku nau tui ki he ʻOtuá. ʻOku faingataʻa ki he niʻihi kehe ke tui kiate Ia. ʻOku fēfē hoʻo ongoʻí? [Tuku ke ne tali.] ʻOku takatakaiʻi kitautolu ʻe he ngaahi fakamoʻoni moʻoni ʻo hā ai ʻoku pau pē ʻoku ʻi ai ha ʻOtua. [Lau Sāme 104:24.] ʻI heʻetau sio ki ha meʻa-faitā pe ko ha komipiuta, ʻoku tau ʻiloʻi papau ʻoku pau pē naʻe ngaohi ia ʻe ha tokotaha-faʻu mataotao. ʻIkai ʻoku ʻuhinga lelei ke pehē ko e ngaahi meʻa fihi angé mo faingataʻa ke ngaohí, hangē ko e māmaní mo kitautolu faʻahinga ʻo e tangatá, naʻe hokonoa mai pē?” Ngāueʻaki ha palakalafi mei he kupú ke fakahaaʻi ha ʻuhinga totonu ke tui ai ki he ʻOtuá. Kapau ʻoku hā mai ha mahuʻingaʻia, tuʻuaki ʻa e ngaahi makasiní.
3 Ko e “Taua Leʻo” ʻo Mē 1 ʻokú ne fakaeʻa ʻa e kupu “ʻUhinga ʻOku Maʻu Ai ʻe he Lotu Moʻoní ʻa e Tāpuaki ʻa e ʻOtuá.” Ki muʻa ke fakaʻaliʻali iá, ʻe lava ke ke ʻeke:
◼ “ʻI he ngaahi lotu ʻe laui teau ʻoku ʻi he māmaní, ʻokú ke fakakaukau ʻoku tali kotoa kinautolu ʻe he ʻOtuá? [Tuku ke ne tali.] Naʻe tala ki muʻa ʻe Sīsū neongo ʻa e taukaveʻi ʻe he faʻahinga tokolahi ʻoku nau lotu, ko e faʻahinga ʻoku ʻikai ke fai ki he finangalo ʻo e ʻOtuá ʻe talitekeʻi. [Lau Mātiu 7:21-23.] ʻOku mātuʻaki mahuʻinga ke tau ʻilo fakapapau ʻa e lotu moʻoni naʻe akoʻi ʻe Sīsuú.” Huke ki he kaveinga tokoni “Ko e Hā ʻa e Fua Kuo Pau ke Fakatupu ʻe he Lotu Moʻoní?,” ʻoku kamata ʻi he peesi 14, pea fetalanoaʻaki ʻi ha fakatātā ʻe taha ke fakatātaaʻi ʻa e poiní.
4 Kapau te ke maʻu ha faʻahinga tokolahi ʻoku nau pehē ʻoku nau femoʻuekina, ʻe lava ke ke ʻahiʻahi ʻeni:
◼ “ʻOku mau houngaʻia ke tokoniʻi ʻa e kakai ʻoku femoʻuekina ʻenau moʻuí pea ʻoku nau maʻu ha taimi nounou ke fakalaulauloto ai ki he ngaahi tafaʻaki fakalaumālie ʻo e moʻuí. Ko ʻemau ongo makasiní, ko e Taua Leʻo mo e Awake!, naʻe faʻu iá ke tokonaki ha fakamatala nounou ʻo kau ki he ngaahi meʻa mahuʻinga ʻokú ne uesia koe pea mo ho fāmilí. ʻOku ou saiʻia ke tuku atu ʻa e ongo tataú ni ke ke lau.”
5 Manatuʻi ke ʻoange ha faingamālie kiate kinautolu ʻoku nau tali ʻa e ngaahi makasiní ke nau fai ha tokoni ki heʻetau ngāue ʻi māmani lahí. Te nau maʻu ha ʻaonga moʻoni mei hono lau ʻa e Taua Leʻo mo e Awake!, ʻa ia ʻokú ne ʻomai “ae ogoogolelei oe lelei.”—ʻAi. 52:7, PM.