Leaʻaki ʻa e Moʻoní ki Ho Kaungāʻapí
1 Ko e taha ʻi he ongo fekau lahi tahá ko e: “Te ke ʻofa ki ho kaungaʻapi ʻo hange ko hoʻo ʻofa kiate koe.” (Mt. 22:39) Ko e faʻahinga ʻofa peheé te ne ueʻi kitautolu ke ʻinasi mo hotau kaungāʻapí ʻi he meʻa lelei taha ʻoku tau maʻú—ko e moʻoni ko ia ʻoku tau maʻu ʻi he Folofola ʻa e ʻOtuá. Koeʻuhi ʻoku fakalahi atu ʻi he ongo makasini Taua Leʻo mo e Awake! ʻa e pōpoaki ʻo e moʻoni ʻi he Tohitapú, ko hono tufaki ʻo e ongo makasini ko ʻení ʻi he lolotonga ʻa e māhina ko Meé ko e founga ia ʻe taha kiate kitautolu ke tau ‘lea moʻoni ʻi he feangai mo hotau kaungaʻapí.’—ʻEf. 4:25.
2 ʻOku totonu ke tufa ʻa e Awake! ʻo ʻEpeleli 22 kae ʻoua ke ʻosi. ʻE lava ke ke kamata hoʻo tuʻuakí ʻaki hono ʻeke ange:
◼ “Ko e hā hoʻo tali ki ha māmani ʻe ʻikai toe ʻi ai ha tau? [Tuku ke ne tali.] Naʻá ke ʻilo ko e ngaahi lotu ʻo e māmaní ʻoku nau poupouʻi moʻoni ʻa e ngaahi taú mo e fetāmateʻakí? [Tuku ke ne tali.] ʻI hono mātuʻaki kehe ʻaupitó, fakatokangaʻi ʻa e meʻa ʻoku leaʻaki ʻe he Tohitapú ʻe fai ʻe he kau lotu moʻoni ʻa e ʻOtuá.” Lau ʻa e ʻAisea 2:2-4 mei ʻolunga ʻi he peesi 4 ʻo e makasiní, pea ʻi he peesi 10 foki lau leva ʻa e palakalafi ʻuluakí ʻi he kaveinga tokoni ko e “Ui ki he Kau ʻOfa ki he Melinó.” Ko hono hokó, ʻeke ange: “ʻOkú ke ʻiloʻi ʻa e founga ʻe fai ai ia ʻe he ʻOtuá? Ko e talí ʻe maʻu ia ʻi he makasini ko ʻení, pea ko hoʻo tatau ʻena ke ke lau.”
3 ʻI hono tuʻuaki ʻa e “Taua Leʻo” ʻo Sune 1, feinga ke lave ki ha ngaahi ongoongo ʻo ha meʻa ʻoku hoko ki muí ni ʻa ia kuó ne uesia ʻa e kakaí ke nau ongoʻi ʻoku ʻikai ha maluʻanga, pea toki ʻeke ange:
◼ “Ko e hā hoʻo fakakaukau ki he meʻa ʻe lava ke fai ke ʻai kitautolu ke tau ongoʻi malu moʻoni ai ʻi he moʻui ko ʻení? [Tuku ke ne tali.] ʻI he lea faitotonu, ʻoku totonu ke falala ki he tangatá ke nau solova ʻa e ngaahi palopalema ʻoku fehangahangai mo e faʻahinga ʻo e tangatá? [Tuku ke ne tali; pea toki lau ʻa e Sāme 146:3.] ʻOku hoko atu hono ʻomai ʻe he tokotaha-tohi-sāmé kiate kitautolu ʻa e ʻuhinga ke tau hoko ai ʻo falala pau ʻi he fekauʻaki mo e kahaʻú. [Lau ʻa e Sāme 146:5, 6.] Ko e kupu ko ʻení, ‘Maluʻanga Moʻoní, he Taimí Ni pea Taʻengata,’ ʻoku fakamatalaʻi mai ai ʻa e ʻuhinga ʻe lava ke tau falala ai kia Sihova ko e ʻOtuá ke ne ʻomai ha ngaahi tuʻunga lelei ange ki he māmaní.” Tuʻuaki ke tuku ʻa e ongo makasiní pea toe foki ke fetalanoaʻaki ki he founga ʻe malava ai ke fiefia ʻi ha moʻui malu he taimí ni.
4 ʻI he vakai atu ki he mafola ʻa e hohaʻa fekauʻaki mo e ngafa ʻo e ngaahi founga-pulé, ʻe ʻikai ha toe veiveiua ʻi he lelei ʻa hono maʻu ʻa e “Taua Leʻo” ʻo Mē 1. ʻE Lava ke ke kamata ʻaki hono ʻeke ange:
◼ “ʻOku totonu ke fēfē ʻa e vakai ʻa e kau Kalisitiané ki he ngaahi founga-pule fakamāmaní? [Tuku ke ne tali.] Naʻe tali ʻe Sīsū ʻa e fehuʻi ko iá maʻatautolu ʻia Mātiu 22:21. [Lau.] Ka ko e hā hono ʻuhinga ko iá? Naʻe faʻu ʻa e makasini ko ʻení ke ne tali ʻa e fehuʻi ko iá.” Tuʻuaki ke tuku ʻa e makasiní, ʻi hoʻo fokotuʻu atu: “Ko e ʻaʻahi hoko maí, te u saiʻia ai ke vahevahe mo koe ʻa e tefitoʻi moʻoni ʻe taha ʻi he Tohitapú, ʻa ia ʻi hono ngāueʻakí, ʻe lava ke tokoniʻi ai kitautolu ke nofo maʻu ʻi hotau tuʻunga totonu ʻi he fokotuʻutuʻu ʻa e ʻOtuá.”
5 Kapau te ke fiefai ha tuʻuaki nounou pē, te ke ʻahiʻahi nai ʻeni:
◼ “Ko e tokolahi ʻoku nau ongoʻi ko e lahi taha ʻo e ngaahi makasini manakoa ʻo e ʻaho ní ʻoku nau fakaeʻa lahi ʻa e meʻa fakakomēsialé, fehokotaki fakasinó, pe fakamālohí. [Fakaʻaliʻali ʻa e Taua Leʻo mo e Awake!] ʻOku mau tufaki ʻa e ongo makasini leleí ni ʻa ia ʻoku makatuʻunga ʻi he Tohitapú. ʻOkú na fuʻu mataotao ʻaupito pea ʻoku akoʻi ai kitautolu ke tau lotu ki he ʻOtuá, ʻofa ki hotau kaungāʻapí, pea tauhi maʻu ʻa e ʻulungaanga leleí. Kapau te ke manako ʻi he faʻahinga nāunau ko ʻení ki he lau tohí, ʻoku ou ʻiloʻi te ke fiefia ʻi he meʻa te ke maʻu ʻi he ongo tataú ni.”
6 Kapau ʻoku tau faivelenga ʻi hono leaʻaki ʻa e moʻoní ki hotau ngaahi kaungāʻapí, te tau malava nai ai ke ʻoatu ʻa e fiefia lahi ki he tokolahi.—Ng. 8:4, 8.