Ko e Ngaahi Fetalanoaʻaki Anga-Fakakaumeʻá ʻe Lava ke Aʻu ki he Lotó

¹ ʻE lava ke fakaʻuhingaʻi ʻa e fetalanoaʻakí ko ha “fefetongiʻaki fakaelea ʻo e ngaahi fakakaukaú.” Ko hono kamata ha ngaahi fetalanoaʻaki anga-fakakaumeʻa ʻi ha tuʻunga lea ʻa ia ʻoku kau ki he niʻihi kehé te ne maʻu nai ai ʻenau mahuʻingaʻiá pea ʻe lava ke tokoniʻi ai kitautolu ke aʻu ki honau lotó mo e pōpoaki ʻo e Puleʻangá. Kuo hā mei he ngaahi meʻa naʻe hokosiá ʻoku ola lelei mamaʻo ange ke fakakau ʻa e kakaí ʻi ha fetalanoaʻaki anga-fakakaumeʻa mo nonga ʻi hono fai atu kiate kinautolu ha malanga.

² Founga ke Kamata Ai ha Fetalanoaʻaki Anga-Fakakaumeʻa: Ko ʻetau hoko ʻo malava ke fetalanoaʻaki ko ia mo e niʻihi kehé ʻoku ʻikai ʻuhingá ia ke tau ʻoatu ha ngaahi fakakaukau mo e ngaahi konga tohi ʻa ia ʻoku fokotuʻutuʻu ke fakaueʻiloto. ʻOku ʻuhingá pē ko hono ʻai ʻa e tokotaha kehé ke fetalanoaʻaki mo kitautolu. Ko e fakatātaá, ʻi he taimi ʻoku tau fai ai ha fetalanoaʻaki anga-fakakaumeʻa mo hotau kaungāʻapi ofi tahá, ʻoku ʻikai ke fefeka kae fiemālie. ʻOku ʻikai te tau fakakaukau fekauʻaki mo ʻetau ngaahi lea hokó kae tali fakaenatula pē ki heʻene ngaahi fakakaukau ʻoku fakahaá. Ko hono fakahā ʻa e houngaʻia moʻoni ʻi he meʻa ʻokú ne leaʻakí ʻe fakalototoʻaʻi nai ai ia ke hokohoko atu ʻene fetalanoaʻaki mo kitautolú. ʻOku totonu ke tatau moʻoni ia mo e taimi ʻoku tau faifakamoʻoni ai ki he niʻihi kehé.

³ Ko e ngaahi tuʻunga lea hangē ko e faihia, ko e ngaahi palopalema ʻa e kau talavoú, ngaahi fakakikihi fakalotofonuá, ngaahi tuʻunga ʻo e māmaní, pea naʻa mo e ʻeá ʻe lava ke ngāueʻaki ia ke kamata ha ngaahi fetalanoaʻaki anga-fakakaumeʻa. Ko e ngaahi kaveinga ʻokú ne uesia fakahangatonu ʻa e moʻui ʻa e kakaí ʻoku ola lelei ʻaupito ia ʻi hono langaʻi ʻenau mahuʻingaʻiá. ʻI hono kamata pē ha fetalanoaʻaki, ʻe lava ke tau tataki māmalie ia ki he pōpoaki ʻo e Puleʻangá.

⁴ Ko hono fai ha fetalanoaʻaki fiemālie ʻoku ʻikai ʻuhinga ia aí ʻoku ʻikai fiemaʻu ha teuteu ki muʻa. ʻOku fiemaʻu ia. Kae kehe, ʻoku ʻikai ke fiemaʻu ke faʻu ha ʻautilaine fefeka pe ke ako maʻuloto ha malanga, ʻa ia ʻe iku ai ki ha fetalanoaʻaki ʻoku ʻikai ngaofengofua pe māliliungofua ki he ngaahi tuʻunga ʻoku lolotonga hokó. (Fakafehoanaki mo 1 Kolinitō 9:​20-23.) Ko ha founga lelei ʻaupito ki hono fai ʻo e teuteú ko hono fili ha kaveinga Fakatohitapu ʻe taha pe ua, mo ha fakakaukau atu ki hono langaʻi hake ha ngaahi fetalanoaʻaki ʻi ai. Ko hono fakamanatu ʻa e ngaahi kaveinga ʻoku maʻu ʻi he tohi Reasoning ʻe fakamoʻoniʻi ai ʻa ʻene tokoni ki he meʻá ni.

⁵ Ko e Ngaahi ʻUlungaanga Tefito ki ha Fetalanoaʻaki Anga-Fakakaumeʻa: ʻI heʻetau fetalanoaʻaki mo e niʻihi kehé, ʻoku totonu ke tau māfana mo loto-moʻoni. Ko ha malimali mo ha fofonga fiefia ʻe tokoni ia ki hono tapua atu ʻo e ongo ʻulungaangá ni. ʻOku tau maʻu ʻa e pōpoaki lelei taha ʻi he māmaní; ʻoku fakamānako ʻaupito ki he faʻahinga loto-totonú. Kapau te nau ongoʻi ko ʻetau houngaʻia ʻiate kinautolú ʻoku ueʻi ia ʻe ha holi loto-moʻoni ke vahevahe ha ngaahi ongoongo lelei mo kinautolu, ʻe toki ueʻi nai ai kinautolu ke fanongo.​—2 Kol. 2:17.

⁶ Ko e kau ki he fetalanoaʻakí ʻoku totonu ko ha meʻa fakafiefia ia. Ko ia ai, ʻoku totonu ke tau anga-ʻofa mo fakapotopoto ʻi hono ʻoatu ʻa e pōpoaki ʻo e Puleʻangá. (Kal. 5:22; Kol. 4:6) Feinga ke mavahe mei he tokotaha ko iá mo ha maongo haʻane mālieʻia. Ko e foungá ni, neongo kapau ʻoku ʻikai te tau lavameʻa ʻi he ʻuluaki ʻaʻahí ke aʻu ki hono lotó, mahalo te ne fie fanongo ange ʻi he taimi hoko mai ʻe talanoa ai mo ia ha Fakamoʻoní.

⁷ Ko hono kamata ha fetalanoaʻaki anga-fakakaumeʻa, ʻoku ʻikai ko e ola ia ʻo hono fai ha malanga faingataʻa. Ko hono langaʻi pē ha mahuʻingaʻia ʻi ha kupu ʻoku kau ki ha tokotaha. ʻI he ʻosi pē ʻetau teuteu ki muʻá, te tau mateuteu leva ke fakakau ʻa e kakaí ʻi he ngaahi fetalanoaʻaki anga-fakakaumeʻá. ʻOfa ke tau feinga ke aʻu ki he loto ʻo e faʻahinga ko ia ʻoku tau fetaulakí ʻaki ʻa e vahevahe mo kinautolu ʻa e ngaahi ongoongo lelei taha ʻe hoko ʻo ʻiló, ʻa ia ko e ngaahi tāpuaki taʻengata ʻo e Puleʻangá.​—2 Pita 3:13.