Fēfē Ho Ngaahi Kāingá?
1 Ko e tokolahi taha ʻiate kitautolú ʻoku ʻi ai hotau ngaahi kāinga tokolahi ʻoku ʻikai te nau kau ki he moʻoní. He fakaʻamu lahi ē ʻatautolu ke kau mai mo kitautolu ʻa e faʻahinga pehē ʻoku tau ʻofa aí ʻi he ʻalu ʻi he hala ki he moʻuí! Ko ʻetau tokanga ki honau kahaʻu taʻengatá ʻe lahi ange nai ia ʻi heʻenau hoko ko e ngaahi mēmipa ʻi hotau fāmilí tonu. Neongo kuo tau feinga ʻi he ngaahi taʻu lahi ke mahuʻingamālie kiate kinautolu ʻa e moʻoní, ʻoku totonu ke ʻoua te tau fakaʻosiʻaki ʻo pehē ʻoku ʻikai toe felave ha meʻa.
2 ʻI he taimi naʻe fai ai ʻe Sīsū ʻene malangá, ko “hono ngaahi tokoua naʻe ʻikai te nau tui pikitai kiate ia.” (Sione 7:5) ʻI ha taimi ʻe taha, naʻe fakakaukau hono ngaahi kāingá ʻokú ne fakasesele. (Mk. 3:21) Ka, naʻe ʻikai ke foʻi ai ʻa Sīsū ʻiate kinautolu. ʻI he faai mai ʻa e taimí, naʻe tali ʻe hono ngaahi tokouá ʻa e moʻoní. (Ng. 1:14) Ko hono tokoua faʻē-taha ko Sēmisí naʻe hoko ko ha pou ia ʻi he fakatahaʻanga Kalisitiané. (Kal. 1:18, 19; 2:9) Kapau te ke saiʻia nai ke maʻu ʻa e fiefia ʻo e sio ki ho ngaahi kāingá ʻoku nau mahuʻingaʻia ʻi he moʻoní, ʻoua ʻe taʻofi ʻa e feinga ke aʻu kiate kinautolu mo e ongoongo lelei ʻo e Puleʻangá.
3 Hoko ʻo Fakaivi Foʻou, ʻIkai ko Hono Lōmekina: ʻI he taimi naʻe malanga ai ʻa Sīsū ki he niʻihi kehé, naʻe ongoʻi fakaivi foʻou ʻene kau fanongó, ʻikai fakamanaʻi. (Mt. 11:28, 29) Naʻe ʻikai te ne lōmekina kinautolu ʻaki ʻa e ngaahi akonaki ʻa ia ʻe ʻikai lava ke nau makupusi. Ke fakaivi foʻou ho ngaahi kāingá ʻaki ʻa e vai ʻo e moʻoní, ʻoange tahataha kiate kinautolu ha ipu ʻe taha, kae ʻikai ko ha kane ʻoku fonu! Naʻe pehē ʻe ha ʻovasia fefonongaʻaki: “Ko e ngaahi ola lelei tahá ʻoku maʻu ia ʻe he faʻahinga ʻoku nau langaʻi ʻa e fifili ʻa honau ngaahi kāingá ʻaki ʻa e faifakamoʻoni nounou ka ʻi he founga tuʻumaʻu.” ʻI he founga ko ʻení, naʻa mo e kau fakafepakí te nau kamata nai ke ʻeke ha ngaahi fehuʻi pea faifai atu pē ʻo fakatupulekina ha fieinua ki he moʻoní.—1 Pita 2:2; fakafehoanaki mo 1 Kolinito 3:1, 2.
4 Ko e kau Kalisitiane ʻosi mali tokolahi kuo nau fai ha fakamoʻoni ola lelei ki honau ngaahi hoa mali taʻetuí ʻaki hono hili pē ha tohi pea fakaava ki ha fakamatala ʻe mahuʻingamālie kiate kinautolú. Ko ha tuofefine ʻe taha naʻá ne fai ʻa e meʻá ni, pehē foki ki heʻene ako mo ʻene fānaú kae fanongo ki ai ʻa hono husepānití, ʻo fai ai ha ngaahi fakamatala ʻe ʻaonga nai kiate ia. ʻI he taimi ʻe niʻihi naʻá ne ʻeke nai kiate ia: “Naʻá ku ako ē mo ē ʻi heʻeku ako he ʻaho ní. Ko e hā hoʻo fakakaukau fekauʻaki mo e meʻá ni?” Naʻe faifai atu pē ʻo tali ʻe hono husepānití ʻa e moʻoní.
5 Ke Anga-Fakaʻapaʻapa, ʻIkai Taʻefaʻakātaki: Naʻe fakamatalaʻi ʻe he tokotaha malanga ʻe taha ʻo pehē “naʻa mo e ngaahi kāingá ʻoku ʻi ai ʻenau totonu ki heʻenau ngaahi meʻa ʻoku nau vakai ki aí pea mo ʻenau ngaahi fakakaukaú.” Ko ia ʻoku totonu ke tau fakahā ʻa e fakaʻapaʻapa ʻi he taimi te nau leaʻaki ai ʻenau ngaahi fakakaukaú, pe ʻi he taimi te nau kole papau mai ai kiate kitautolu ke ʻoua te tau toe lea ange kiate kinautolu fekauʻaki mo e moʻoní. (Koh. 3:7; 1 Pita 3:15) ʻI he hoko ʻo faʻa kātaki pea mo ʻofá pea hoko ko ha faʻahinga fanongo leleí, ʻe lava ke tau fakakaukau ai ki he ngaahi faingamālie ʻe lava ke fai ai ha fakamoʻoni pōtoʻi. Ko e faʻa kātaki peheé ʻe lava ke fakapaleʻi, ʻo hangē ko ia naʻe hoko ʻi he fekauʻaki mo ha husepāniti Kalisitiane ʻa ia naʻá ne kātakiʻi ʻa e angakovi ʻa hono uaifi taʻetuí ʻi he taʻu ʻe 20. ʻI he kamata pē ke liliu ʻa e fefiné, naʻe pehē ʻe he tangatá: “Ko ha fakamālō lahi ē kia Sihova ʻi heʻene tokoniʻi au ke u fakatupulekina ʻa e kātaki fuoloá, koeʻuhi ʻoku lava ke u sio he taimí ni ki he olá: Ko hoku uaifí kuó ne kamata ke ʻaʻeva ʻi he hala ki he moʻuí!”
6 Fēfē ho ngaahi kāingá? Mahalo pē, fakafou ʻi ho ʻulungaanga faka-Kalisitiané pea mo hoʻo ngaahi lotu maʻanautolú, “te ke ikunaʻi nai ai kinautolu kia Sihova.”—1 Pita 3:1, 2, NW, fakamatala ʻi laló.