“Mou Hoko ko e Kau Fai Fakafetaʻi”
1 Ko e tokolahi taha ʻiate kitautolu naʻe akoʻi hake mei he kei siʻí ke tau lea “kātaki” mo “fakamālō” ʻi he taimi ʻoku fakahā mai ai ʻe ha taha kiate kitautolu ʻa e anga-fakaʻapaʻapá pe anga-ʻofá. ʻOku enginaki maʻu mai pē ʻa Paula kiate kitautolu ke ‘tau hoko ko e kau fai fakafetaʻi,’ pea ʻoku totonu ke tautefito ʻetau fai ʻa e fakamāloó kia Sihova. (Kol. 3:15, 16) Ka ʻe lava fēfē ke tau fakahā ʻa e fakafetaʻí ki hotau Tokotaha-Fakatupu Maʻongoʻongá? Pea ko e hā ʻa e ngaahi ʻuhinga makehe ʻoku tau maʻu ke fakafetaʻi ai kiate iá?
2 Naʻe tohi ʻe he ʻaposetolo ko Paulá: “Fakafetaʻi ki he ʻOtua, heʻene tuku mai ke tau ikuna ʻi hotau ʻEiki ko Sisu Kalaisi!” (1 Kol. 15:57) ʻI he faʻahitaʻu Fakamanatu ʻo e taʻu taki taha, ʻoku fakamanatu mai ai kiate kitautolu ʻa e ʻofa taʻefakangatangata naʻe fakahā fakatouʻosi ʻe he ʻOtuá mo Kalaisi ʻi hono tokonaki mai ʻa e huhuʻí ʻo ne ʻomai ai kiate kitautolu ʻa e ʻamanaki ki he moʻui taʻengatá. (Sione 3:16) Koeʻuhi ko e meimei ko e kotoa ʻo kitautolu kuo mole atu mei ai ʻi he maté ʻa e faʻahinga naʻa tau ʻofa aí, ko ha fakamālō lahi ē ka ko kitautolu ki he talaʻofa ʻa Sīsū fekauʻaki mo e toetuʻú! ʻOku fonu hotau lotó ʻi he houngaʻia he taimi ʻoku tau fakakaukau atu ai ki he ʻamanaki ʻo e hao moʻui atu ʻi he ngataʻanga ʻo e fokotuʻutuʻu ʻo e ngaahi meʻá ni ʻo ʻikai ke toe mate. (Sione 11:25, 26) ʻOku faingataʻa ke maʻu ha ngaahi lea ke fakahā ʻa e fakafetaʻi ki he kotoa ʻo e ngaahi tāpuaki fakaofo kotoa te tau maʻu mei he toʻukupu ʻo Sihová ʻi he māmani Palataisi ka hoko maí. (Fkh. 21:4) Ko e hā ʻa e ngaahi ʻuhinga lelei ange ʻe lava ʻe ha taha ke ‘ne hoko ai ko ha tokotaha fakafetaʻi’ ki he ʻOtuá?
3 Founga ke Fakahā Ai ʻa e Fakafetaʻi ki he ʻOtuá: ʻOku feʻungamālie maʻu pē ke fakahā ʻetau fakamāloó ʻi he lotu kia Sihova koeʻuhi ko ʻene anga-leleí. (Sāme 136:1-3) ʻOku ueʻi foki kitautolu ke fakahā ʻetau fakamāloó kiate ia ʻi ha ngaahi founga pau kehe. Ko e fakatātaá, ʻoku ʻikai ha toe veiveiua te tau haʻu ʻi he Sāpate, Maʻasi 23, ki he Fakamanatu ʻo e pekia ʻa Kalaisí. Ke fakalato ʻa e ngaahi fiemaʻu fakamatelie ʻa e fakatahaʻanga fakalotofonuá pea mo e ngāue ʻi māmani lahí, ʻoku tau fiefia ke ‘fakaʻapaʻapa kia Sihova ʻaki ʻetau koloá.’ (Pal. 3:9) ʻOku tau poupouʻi kakato ʻa e kau mātuʻá pea mo fengāueʻaki fakataha mo kinautolu, ʻo hā ai ʻetau houngaʻia ʻia Sihova ʻi he tokoni ʻokú ne tokonaki ʻo fakafou mai ʻiate kinautolú. (1 Tes. 5:12, 13) ʻI he ʻaho kotoa pē, ʻoku tau feinga mālohi ke tauhi maʻu ʻa e ʻulungaanga anga-tonu ʻokú ne fakahīkihikiʻi ʻa e huafa ʻo e ʻOtuá. (1 Pita 2:12) ʻOku hōifua ʻa Sihova ʻi he ngaahi fakamoʻoni kotoa ko ʻeni ʻo ʻetau loto-houngaʻiá.—1 Tes. 5:18.
4 Ko ʻEtau Fakahāhā Lelei Taha ʻa e Fakafetaʻí: Ko e kau ʻaufuatō ʻi he ngāue malangaʻi ʻo e Puleʻangá, fakalāngilangiʻi ʻa e huafa ʻo Sihová, fakahā ʻa e loto-houngaʻia ʻi he lotú, pea mo e taukapoʻi mateaki ʻa e moʻoní, ko e ngaahi meʻa ia ʻoku fakahāhā lelei taha ai ʻetau fakamālō loto-moʻoni ʻe lava ke tau fai ki hotau Tokotaha-Fakatupú ki he meʻa kotoa kuó ne fai maʻatautolú. ʻOku fiefia ʻa Sihova ke vakai mai kiate kitautolu ʻoku tau fai ange kiate ia ʻa e ngaahi ngāue ʻo e ngāue toputapú ʻi hono poupouʻi ʻa hono finangaló “ke maʻu moʻui ʻe he kakai kotoa pe.” (1 Tim. 2:3, 4) Ko e ʻuhinga ia ʻoku fuʻu tokolahi ai ʻa e kau malanga ʻoku lava ke nau teuteu ki ai ʻi heʻenau tali ʻa e ui ko ia ʻoku hā ʻi he ʻEtau Ngāue Fakafaifekau ʻo e Puleʻanga ʻo Fepueli ke kau ko e kau tāimuʻa tokoní he lolotonga ʻo e māhina ʻe taha pe lahi ange ʻi Maʻasi, ʻEpeleli, mo Meé. Ko hono fai ha feinga makehe ʻi he ngāue fakafaifekaú ko ha founga lelei ia ke ‘tau hoko ko e kau fakafetaʻi’ ki he ʻOtuá. Te ke malava ke kau ai ki he tuʻunga ko e kau tāimuʻá ʻi ʻEpeleli? ʻi Mē?
5 Kuo ʻomai kiate kitautolu ha ʻamanaki papau ko e moʻui taʻengata. ʻI he taimi te tau sio ai kuo fakahokó, te tau maʻu ai ʻa e ngaahi ʻuhinga lahi ange ʻi he ʻaho kotoa pē ke hokohoko atu hono ʻoatu ʻa e ngaahi fakafetaʻi fiefiá kia Sihova.—Sāme 79:13.