Akoʻi ʻa e Niʻihi Kehé ki he Meʻa ʻOku Fiemaʻu ʻe he ʻOtuá
1 ʻOku kei malava pē ke maʻu ha kakai tokolahi kuo nau masiva fakalaumālie ʻi he “fanongo ki he folofola ʻa Sihova.” (Emosi 8:11) Lolotonga ʻoku tui ʻa e niʻihi ʻoku ʻi ai ʻa e ʻOtua, ʻoku ʻikai te nau ʻilo ʻa ʻene taumuʻá pea mo ʻene ngaahi fiemaʻú. Ko ia ai, ʻoku ʻi ai ʻa e fiemaʻu kiate kitautolu ke akoʻi kiate kinautolu ʻa e moʻoni fakaefakahaofi moʻui ʻo e Puleʻangá. ʻI he hoko ʻo fakanāunauʻi lelei pea teuteuʻi ke faifakamoʻoni ʻi he faingamālie kotoa pē, te tau aʻu ai ki he faʻahinga ʻoku nau saiʻia ke ako ki he meʻa ʻoku fiemaʻu ʻe Sihová.
2 ʻI he lolotonga ʻo ʻEpeleli mo Meé, te tau maʻu ai ʻa e ngaahi tatau ʻo e Taua Leʻo mo e Awake! ʻoku taimi totonu ke tufa atu. Tānaki atu ki ai, ʻi he ʻuluaki taimí, te tau tuʻuaki ai ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? Ko hono ngaahi fakatātā fakatupu tokangá mo hono ngaahi fehuʻi fakatupunga fakakaukaú, ʻokú ne ʻai ai ʻa e polosiua ko ʻení ke fakamānako lahi. ʻOku ʻomai ʻa e ngaahi fokotuʻu ʻoku hoko haké ke tokoniʻi kitautolu ke ngāueʻaki ola lelei ʻetau ngaahi tohi leleí.
3 Kumi ki he Kakaí: ʻI ha ngaahi feituʻu ʻoku ʻikai maʻu ai ʻa e kakai tokolahi ki honau ʻapí ʻi he taimi ʻoku tau ʻaʻahi ai mei he fale ki he falé, ʻoku fakamoʻoniʻi ʻoku ʻaonga ʻa e kumi pea talanoa ki ha kakai ʻi ha feituʻu pē ʻe maʻu kinautolu ki ai. Ko e fakalahi ʻo e ʻEtau Ngāue Fakafaifekau ʻo e Puleʻanga ʻo Sepitema 1996 naʻe fakalototoʻaʻi ai kitautolu ke tau malangaʻi ʻa e ongoongo leleí ʻi he feituʻu kotoa pē—ʻi he halá, ʻi he meʻalele uta pāsesé, pea ʻi he ngaahi paʻaké, ngaahi tauʻanga meʻalelé, pea mo e ngaahi feituʻu pisinisí. Naʻe toe ʻai ai kitautolu ke tau fakakaukau fakamātoato ki he fiemaʻu ke fakatupulekina ha ngaahi faingamālie ke malanga ʻi he founga ʻikai anga-mahení. Ko ha fakatātā ʻo e meʻa ko ʻení, naʻe ʻalu ha tuofefine tāimuʻa ki he suú pea naʻá ne ʻave mo ia ha tatau ʻo e Awake! ʻo ʻAokosi 8, 1996, ʻoku fakakongokonga ai ʻa e “Ngaahi Meʻamoʻui ʻi he Tuʻunga Fakatuʻutāmaki—Ko e Hā ke Tokanga Ai Ki Aí?” ʻI loto ʻi ha houa ʻe taha, naʻá ne tufa ai ha ngaahi tatau ʻe 40 ʻi ha niʻihi ʻo e faʻahinga naʻa nau saiʻia ʻi he fanga manú! Ko e hā ʻa e lavameʻa kuó ke maʻu ʻi hono malangaʻi ʻa e ongoongo leleí ʻi he feituʻu kotoa pē? Ko e Taua Leʻo mo e Awake! pea pehē ki he polosiua Fiemaʻu ʻoku feʻungamālie tautautefito ki he kotoa ʻo ha faʻahinga faifakamoʻoni pē koeʻuhi ʻoku nau fakaeʻa ai ʻa e fakamatala ʻe maongo ki he moʻui ʻa e kakaí pea ueʻi ai ʻenau malava fakaefakakaukaú.
4 Ko Hono Kamata ha Fetalanoaʻaki: Ko e peesi fakamuimui ʻo ʻEtau Ngāue Fakafaifekau ʻo e Puleʻanga ʻo ʻOkatopa 1996 ʻokú ne ʻomai ʻa e fakaikiiki ki he founga ke teuteu ai ʻa hoʻo tuʻuaki pē ʻaʻau ki he ngaahi makasini Taua Leʻo mo e Awake! Ko e ngaahi fokotuʻu tatau pē ʻe ʻaonga ʻi he taimi ʻokú ke teuteu ai ʻa hoʻo tuʻuaki ki he polosiua Fiemaʻu. Ko e meʻa te tau leaʻakí ke nounou pē ʻo hangē ko ha ngaahi sētesi siʻisiʻi pē, pe lōloa feʻunga ke fakakau atu ki ai ha fakakaukau Fakatohitapu. ʻOku mahuʻinga ke filifili fakalelei ha ngaahi lea kamata, koeʻuhi ke nau fakapapauʻi nai pe ko e tokotaha te ke lea ki aí ʻe hokohoko atu ʻene fiefanongó. Ko e niʻihi kuo nau lavameʻa koeʻuhi ko e lea kamata ko ʻení: “Naʻá ku lau ha kupu naʻe fakalototoʻa kiate au, pea ʻoku ou saiʻia ke vahevahe ia mo koe.” Pe ko ha fehuʻi mahuʻinga ʻe lava ke langaʻi hake ke tohoaki mai ʻa e tafaʻaki ʻe tahá ki ha fetalanoaʻaki.
5 Kapau ʻoku feʻungamālie ʻi ho feituʻú, te ke ʻahiʻahi ʻeke nai ha fehuʻi hangē ko ʻeni ʻoku hoko haké ʻi hoʻo ngaahi tuʻuaki ʻi he māhina ko ʻení:
◼ “ʻI he ʻahó ni ʻoku tau sio ai ki he lahi fau ʻo e tohitohinoaʻiá, fakavevé, mo e ʻulí. Ko e hā ʻe fai ke fakamaʻa ʻa e māmaní pea ʻai ia ko ha feituʻu lelei ange ke nofo ai?” Tuku ke ne tali, pea toki fakamatalaʻi ange ʻokú ke maʻu ha fakamatala ʻoku fakapapauʻi mai ai kiate kitautolu ʻa e founga pea mo e taimi ʻe hoko ai ʻa e māmaní ko ha ngoue ʻi māmani lahi. Fakahā ha fakamatala pau, ha konga Tohitapu nounou, pea mo ha fakatātā fakaʻofoʻofa mei he makasini lolotongá, pea tuʻuaki leva ia ki he tokotaha tāutaha ke ne lau ia. Lave ai ko e tokolahi ʻoku nau fiefia ʻi hono lau ʻetau ngaahi tohí ʻoku nau fai ha tokoni, ʻa ia ʻoku tau fiefia ke ngāueʻaki ia ki heʻetau ngāue ʻi māmani lahí. Ki muʻa ke ke fakangata ʻa e fetalanoaʻakí, feinga ke fokotuʻu ke hoko atu ʻa e fetalanoaʻakí ʻi ha taimi kehe.
◼ “ʻOkú ke fakakaukau naʻe ʻuhinga mai ʻa e ʻOtuá kiate kitautolu ke tau moʻui ʻo takatakaiʻi ʻe ha ngaahi faingataʻa hangē ko ia ʻoku tau fehangahangai mo ia ʻi he ʻaho ní?” ʻI he hili ʻa e tali ʻa e tokotahá, te ke lava ʻo pehē: “Ngalingali ʻokú ke maheni mo e lotu ko ia naʻe akoʻi ʻe Sīsū ki hono kau muimuí ke nau lotuʻakí, ʻo kole ai ʻa e Puleʻanga ʻo e ʻOtuá ke hoko mai. Kuó ke fai ha fakakaukau pe ko e hā moʻoni ʻa e Puleʻanga ʻo e ʻOtuá?” Huke ki he lēsoni 6 ʻi he polosiua Fiemaʻu, pea lau ʻa e ngaahi fehuʻi ʻoku ʻohake ʻi he kamataʻanga pē ʻo e lēsoní. Pehē foki, ʻi hoʻo lau ʻa e palakalafi 1, lave ki he tali ki he ʻuluaki fehuʻí. Fakamatalaʻi ange ko e toenga ʻo e ngaahi fehuʻí ʻe tali ia hangē ko hono fakanounouʻí. Tuʻuaki ʻa e polosiuá, lave ki he fokotuʻutuʻu ki he ngaahi tokoní, pea talaange te mo toe feʻiloaki ke vahevahe atu ha fakamatala lahi ange fekauʻaki mo e Puleʻangá.
◼ “Ko e kakai faʻa fakakaukau tokolahi ʻoku nau kamata ke vakai atu ko e ngaahi lotu ʻo e māmaní ko e tupuʻanga ia ʻo e ngaahi palopalema ʻo e tangatá kae ʻikai ke hoko ia ko ha fakaleleiʻanga. Ko e hā hoʻo fakakaukau ki aí?” ʻI he hili ʻa e fanongo ki he fakakaukau ʻa e tokotahá, fakahā ange ha meʻa mei he taha ʻo e ngaahi makasini lolotongá ʻa ia te ne maʻu mai ʻene mahuʻingaʻiá fekauʻaki mo e tōlalo ʻa e lotú pe ko ʻene fakaofi atu ki hono fakaʻauhá. ʻEke pe te ne saiʻia ke lau ia. Fefakahāʻaki homo hingoá, pea fokotuʻutuʻu ke mo toe feʻiloaki koeʻuhi ke ke lava ʻo fakamatalaʻi ai ʻa e founga ʻoku ʻikai ke tukuhifo ai ʻe he lotu moʻoní ʻa e faʻahinga ʻo e tangatá. Ko fē pē ʻe feʻungamālié, fakamatalaʻi ʻa e founga ʻoku fai nai ai ʻe he tokotaha mahuʻingaʻiá ha tokoni siʻisiʻi.
◼ “Koeʻuhi ko e lahi fau ʻa e ngaahi palopalema ʻi he moʻui fakafāmilí ʻi he ʻaho ní, kuó ke fakakaukau pe ko e hā ʻa e fakapulipuli ki hono maʻu ha fāmili fiefiá?” Tatali ki ha tali, pea fakamatalaʻi ʻo pehē ʻi he Tohitapú, ʻoku fakahā mai ai ʻe he ʻOtuá ʻa e fakapulipuli moʻoni ʻo e fāmili fiefiá. Mahalo te ke lava ke lau ʻa e Aisea 48:17. Huke leva ki he lēsoni 8 ʻi he polosiua Fiemaʻu, pea tuhu ki ha niʻihi ʻo e ngaahi veesi Tohitapu ʻoku fakahā maí ʻa ia ʻoku lave ki ha tataki alafalalaʻanga ki he mēmipa taki taha ʻo e fāmilí. Lau ʻa e fakahokohoko ʻo e ngaahi fehuʻi ʻi he kamataʻanga ʻo e lēsoní. ʻEke pe ʻe saiʻia ʻa e tokotahá ke ne lau ʻa e ngaahi talí. Kapau ko ia, ʻoange kiate ia ʻa e polosiuá pea fakamatalaʻi ange neongo ʻoku ʻikai ha totongi ki ai, ʻoku tau tali lelei ha ngaahi tokoni siʻisiʻi ke tokoni ki heʻetau ngāue ʻi māmani lahí. Talaange te ke toe foki atu ha taimi kehe ke mo vahevahe lahi ange ʻi he tataki ʻaonga ʻoku maʻu ʻi he Tohitapú ki he moʻui fiefia fakafāmilí.
6 Ko e fakalahi ʻi he ʻEtau Ngāue Fakafaifekau ʻo e Puleʻanga ʻo Maʻasi 1997 ʻoku fakalototoʻaʻi mai ai kitautolu ke fai mālohi ʻa hono fai ʻo e ngaahi toe ʻaʻahí. ʻOku fakaongoongoleleiʻi ai ʻa hono ngāueʻaki ʻa e polosiua Fiemaʻu ke kamata ha ngaahi ako Tohitapu, kapau ʻoku ʻikai ʻi he ʻuluaki ʻaʻahí, ʻai ʻi he toe ʻaʻahí. Ko e fiemaʻu lahi taha ki he faʻahinga ʻo e tangatá ko e ako ki he meʻa ʻoku fiemaʻu ʻe he ʻOtuá pea fai foki ki ai. (Kol. 1:9, 10) Te tau ʻai ke maʻu ʻa e ʻaonga lahi ʻe he niʻihi kehé ʻi he lolotonga ʻo ʻEpelelí mo Meé kapau te tau lava ke kamata hono akoʻi kinautolu ki he meʻa ʻoku tau ʻilo fekauʻaki mo e ngaahi fiemaʻu ʻa Sihova ki he moʻuí.—1 Kol. 9:23.