Tokoniʻi ʻa e Niʻihi Kehé ke Maʻu ha Fakafiemālie
1 Tokolahi ʻa e kakai ʻoku nau foʻi ʻi he fanongo fekauʻaki mo e ngaahi fakatamaki fakanatulá, ngaahi taú, faihiá, mo e faingataʻá. Ko e fakafiemālié, neongo ʻa e hā mahino ʻene mole mei he ngaahi ongoongo ʻo e ʻaho ní, ko e meʻa ia ʻoku fiemaʻu moʻoni ki he faʻahinga ʻo e tangatá. Ke fakafiemālié ʻoku ʻuhingá “ke ʻai ke mālohi pea ʻamanaki ki ai” pea “ke ʻai ke nonga ha mamahi pe faingataʻa ʻa ha” taha kehe. ʻI he tuʻunga ko e Kau Fakamoʻoni ʻa Sihová, ʻoku fakanaunauʻi kitautolu ke tokoniʻi ʻa e kakaí ʻi he founga ko ʻení. (2 Kol. 1:3, 4) Ko ʻetau ngaahi polosiua ʻoku makatuʻunga ʻi he Tohitapú ʻa ia te tau tuʻuaki ʻi Siulai mo ʻAokosí ʻoku fonu ia ʻi he ngaahi pōpoaki fakafiemālie ʻo e moʻoní. (Loma 15:4) Ko e ngaahi fokotuʻu ʻeni ʻe niʻihi ki hono tuʻuaki kinautolú ʻi ha ngaahi tuʻunga kehekehe:
2 Ko ha talanoa ongoongo fakamamahi ʻe lava ke ne fakatupu ai ha faingamālie ke fai ha fakamoʻoni pea ʻomai ai ha fiemālie ki he niʻihi kehé, mahalo pē ʻaki hoʻo leaʻaki ha meʻa hangē ko ʻení:
◼ “ʻI he taimi ʻoku hoko ai ʻa e ngaahi meʻa peheé, ʻoku fifili ʻa e niʻihi pe ʻoku ʻi ai moʻoni ʻa e ʻOtuá, pea kapau ʻokú ne ʻi ai, ʻoku ʻi ai nai haʻane tokanga mai fekauʻaki mo kitautolu. Ko e hā hoʻo fakakaukaú? [Tuku ke ne tali.] Ko e founga ʻe taha ke fakapapauʻi ai pe ʻoku ʻi ai ha ʻOtuá ko hono ngāueʻaki ha tefitoʻi moʻoni kuo ʻosi fokotuʻu lelei.” Lau ʻa e Hepelu 3:4. Lave ki he ngaahi meʻa ʻe niʻihi takatakai ʻiate kitautolu ʻoku fiemaʻu moʻoni ai ha tokotaha-ngaohi. Hoko atu leva: “ʻOku ou maʻu ha polosiua ʻa ia ʻoku ou ʻiloʻi te ke maʻu ai ha fiemālie. ʻOku fakakaveinga ia ko e ‘Vakai! ʻOku Ou Fakafoʻou ʻa e Meʻa Kotoa Pe.’ [Lau ʻa e fehuʻi ʻi he peesi 30, lave ai ʻoku tali ʻe he polosiuá ʻa e ngaahi fehuʻi ko ʻení.] ʻOku ʻi ai ʻa e fakamoʻoni tuipau ʻoku ʻikai ke ngata pē ʻi he ʻi ai ʻa e ʻOtuá ka ʻoku vavé ni ke ne fakangata ʻa e ngaahi tuʻunga taʻefaitotonu kotoa pē ʻoku tau fehangahangai mo ia ʻi he ʻaho ní. Te ke saiʻia ke lau ia?” Fokotuʻutuʻu ke toe foki ki ai.
3 ʻI he toe ʻaʻahí, te ke pehē nai:
◼ “Naʻá ta talanoa foki fekauʻaki mo e fakamoʻoni ʻo e ʻi ai ʻa e ʻOtuá ʻi he taimi naʻá ku tuku atu ai ʻa e polosiua ‘Vakai! ʻOku Ou Fakafoʻou ʻa e Meʻa Kotoa Pe.’ Mahalo pē naʻá ke fakatokangaʻi ʻa e poini ko ʻení ʻi he peesi 10. [Fakamatalaʻi fakanounou ʻa e palakalafi 17.] Ko ha fakatātā pē ʻeni ʻe taha ʻoku hā ai ko ha ʻOtua tokanga ʻoku pau pē ʻokú ne ʻi ai. [Lau ʻa e palakalafi 18 ʻi he peesi 10.] Kuo tokoniʻi au ʻe ha ako fakafoʻituitui ʻo e Tohitapú ke u fekuki mo e ngaahi palopalema ʻo e moʻuí ʻi he ʻaho kotoa pē koeʻuhi ʻoku ʻomai ai ʻa e anga ʻo e vakai ʻa e ʻOtuá ki he ngaahi meʻá.” Tuʻuaki ke fakahāhaaʻi ha ako.
4 ʻE lava ke fai ha fakamoʻoni ʻi he founga ʻikai anga-mahení ʻo ngāueʻaki ʻa e polosiua “Laumālie ʻo e Kau Maté.” ʻE lava ke ke fakafeʻiloaki koe peá ke pehē:
◼ “Kuó ke sio ʻi he tohi mahuʻinga ko ʻení? Kuó u fiefia moʻoni ʻi hono lau iá.” Lau ʻa e fehuʻi ʻi he takafi ʻo e polosiuá, ʻo fai ia ʻi ha founga ke langaʻi ai ʻa e mahuʻingaʻia ʻa e tokotahá. ʻEke ange kiate ia pe ko e hā ʻene fakakaukaú, pea tuku ke ne tali. Fakaava ʻa e polosiuá ki he peesi 18 peá ke pehē: “Fakatokangaʻi ʻa e meʻa ʻoku leaʻaki ʻe he 2 Kolinito 11:14. ʻOku fakahā mai ʻe he veesi ko ʻení kuo pau ke tau tokanga ʻaupito ke ʻoua ʻe kākaaʻi kitautolu ʻe Sētane pea mo ʻene kau laumālie koví. ʻOku fakamatalaʻi ʻe he polosiua ko ʻení ʻa e meʻa kuo pau ke tau fai ke fakaʻehiʻehi ai mei hano kākaaʻi ʻe Sētane. Te ke saiʻia ke lau ia?” Feinga ke ʻilo ʻa e hingoa ʻo e tokotahá pea mo e feituʻu ʻokú ne nofo aí koeʻuhí ke lava ke ke toe ʻaʻahi ai ki hono ʻapí.
5 ʻI he toe ʻaʻahí, te ke ʻahiʻahi nai ʻa e lea ko ʻení ke kamata ha ako:
◼ “ʻOku ou saiʻia ke hoko atu ʻeta fetalanoaʻaki fakamuimuí ʻaki hono fakahā ʻa e meʻa ʻoku leaʻaki ʻe he Tohitapú fekauʻaki mo e kahaʻú. [Fetalanoaʻaki ʻi he fakamatala ʻi he peesi 28 ʻo e polosiua Laumālie ʻo e Kau Maté.] ʻOku fakamatalaʻi ʻe he Fakahā 20:1-3 ʻa e meʻa ʻe hoko kia Sētané. [Lau.] Ko e hā ʻa e meʻa ʻe hoko ʻi he māmaní ʻi he taimi ʻe toʻo atu ai ʻa Sētané? ʻE lava ke ke maʻu ʻa e talí ʻaki ʻa hono ako ʻa e Folofola kuo hiki ʻa e ʻOtuá, ko e Tohitapú. Te u saiʻia ke ʻoatu ʻa e faingamālie ko iá maʻau.” Fakamatalaʻi ʻa e founga ʻoku fai ai ʻa ʻetau polokalama ako Tohitapu taʻetotongi ʻi ʻapí, pea fai ha ngaahi fokotuʻutuʻu ke kamata ha ako.
6 Ko e fetalanoaʻaki pau ko ʻení ʻe fakafiemālie nai ki he faʻahinga kuo nau hokosia ʻa e mate ʻa ha taha ʻoku nau ʻofa ai:
◼ “ʻOku ou tokoniʻi ʻa e faʻahinga kotoa pē kuo mole ha taha ʻoku nau ʻofa ai ʻi he maté. Koeʻuhi ko e taha nai ʻeni ʻi he ngaahi meʻa faingataʻa moʻoni kuo fekuki mo ha taha pē ʻiate kitautolu, kuo teuteu ai ʻa e polosiua ko ʻení, ʻI he Mate ha Taha ʻOkú Ke ʻOfa ʻAi. Kuó ne tokoniʻi ʻa e kakai ʻe laui miliona. Te u saiʻia ke fakahā atu kiate koe ʻa e meʻa ʻoku lave ki ai fekauʻaki mo e talaʻofa fakaofo naʻe fai ʻe Sīsū Kalaisí. [Lau ʻa e palakalafi hono nimá ʻi he peesi 26, fakakau atu ki ai mo e Sione 5:21, 28, 29.] Fakatokangaʻi ʻa e fakatātā ko ʻeni ʻi he peesi 29 ʻoku fakahāhā ai ʻa e fakamatala ʻi he Kōsipeli ki hono fokotuʻu moʻoni hake ʻe Sīsū ʻa Lasalosi mei he maté. Kapau te ke saiʻia ke lau ʻa e polosiua fakatupu fakafiemālie ko ʻení, te u fiefia ke tuku ia maʻau.”
7 ʻI hoʻo toe fokí, te ke lava ʻo toe fakahā ange ʻa e fakatātā ʻi he peesi 29 ʻo e polosiua “ʻI he Mate ha Taha ʻOkú Ke ʻOfa Ai” peá ke pehē:
◼ “Toe fakamanatu angé ʻeta pōtalanoa fekauʻaki mo hono fokotuʻu ʻe Kalaisi ʻa Lasalosí. [Lau ʻa e fakamatala ʻo e fakatātā ʻi he peesi 28, pea vakai ki he fakamatala ʻi lalo ʻi he kaveinga tokoni ko e “Naʻe Hoko Moʻoni ʻa e Meʻá Ni?”] Kapau ʻoku fakaʻamu ho lotó ke tui te ke malava ʻo toe sio ki ha taha naʻe mate ʻokú ke ʻofa ai, tuku ke u tokoniʻi koe ke ʻai ʻa e ʻamanaki ʻo e toetuʻú ko hoʻo meʻa.” Tuʻuaki ha ako Tohitapu ʻi ʻapi.
8 ʻOfa ke tau fai hotau lelei tahá ʻi he ngaahi māhina ʻoku hanga mai mei muʻá ke faʻifaʻitaki ai kia Sīsū ʻaki hono ‘fakafiemalieʻi akinautolu kotoabe oku mamahí.’—Ai. [Isaia] 61:2, PM.