Ngaahi Fakataha ʻOku Fakaʻaiʻai Ai ʻa e Ngaahi Ngāue Leleí
1 Ko e ongo founga ʻe ua ʻoku fiemaʻu ki heʻetau founga-lotú ko hono maʻu maʻu pē ʻa e ngaahi fakataha ʻa e fakatahaʻangá pea kau ki he ngāue fakamalangá. ʻOku fekauʻaki vāofi ʻa e ongo meʻá ni. ʻOkú na felotoiʻaki. Ko e ngaahi fakataha faka-Kalisitiané ʻoku fakaʻaiʻai ai ʻa e ngaahi ngāue leleí, ko e lelei taha ʻo iá ko e ngāue malangaʻi ʻo e Puleʻangá pea mo e ngaohi-ākongá. (Hep. 10:24) Kapau te tau liʻaki ʻa hono maʻu ʻa e ngaahi fakatahá, te tau vave nai ke tuku ʻa e malangá koeʻuhi he ʻe ʻikai te tau hoko ai ʻo fakaʻaiʻai ke fai pehē.
2 ʻI he ngaahi fakataha fakauiké, ʻoku tau maʻu ai ʻa e fakahinohino fakalaumālie ʻoku faʻufaʻu ke ne ueʻi kitautolu ke malanga. Ko e fakavavevave ʻo e taimí ʻoku mei muʻa ʻiate kitautolu, ʻo ueʻi ai kitautolu ke tau ʻave ʻa e pōpoaki fakahaofi-moʻui ʻo e Tohitapú ki he niʻihi kehé. ʻOku fakalototoʻaʻi mo fakaivimālohiʻi kitautolu ke tau kātaki ʻi he ngāue fakamalangá. (Mt. 24:13, 14) ʻI heʻetau ngāueleleiʻaki ʻa e ngaahi faingamālie ke tali ʻi he ngaahi fakatahá, te tau hoko ai ʻo angaʻaki ke fakahā atu ʻetau tuí ʻi he ʻao ʻo e niʻihi kehé. (Hep. 10:23) ʻI he kau ki he Akoʻanga Fakafaifekau Fakateokalatí, ʻoku tau maʻu ai ʻa e ako ke hoko ko e kau faifekau ola lelei ange pea ke fakaleleiʻi ai ʻetau pōtoʻi fakafaiakó.—2 Tim. 4:2.
3 Founga ʻOku Fakaʻaiʻai Ai ʻe he Ngaahi Fakataha Ngāué Kitautolu ke Malangá: ʻOku fakalototoʻaʻi kotoa kitautolu ke tau sio ki he fakamatala ʻi he ʻEtau Ngāue Fakafaifekau ʻo e Puleʻanga ki muʻá. Ko e fakamatala ko ʻení leva ʻe maongo ia ki hotau ʻatamaí ʻi he taimi ʻoku tau kau ai ki he Fakataha Ngāué pea sio ai ki he ngaahi tuʻuaki ʻoku fakahāhaaʻi mei he peletifōmú. ʻI he taimi ʻoku tau ʻi he ngāue fakamalangá aí, ʻe lava ke tau manatu ki he ʻEtau Ngāue Fakafaifekau ʻo e Puleʻanga, ʻo toe fakamanatu ʻa e ngaahi tuʻuaki naʻe fakahāhaaʻi aí, pea ʻe hoko ai ʻo fai ha fakamoʻoni ola lelei ange. Kuo hoko ʻeni ko e ngaahi meʻa ia naʻe hokosia ʻe he kau malanga tokolahi.
4 ʻI he hoko mai ki he Ngaahi Fakataha Ngāué, ʻoku fai ai ʻe he niʻihi ha ngaahi fokotuʻutuʻu mo ha niʻihi kehe ke ngāue fakataha ʻi he ngāue fakafaifekaú. ʻOku manatuʻi ai ʻe he kau malangá ʻa e ngaahi poini ʻaonga ki he ngāue fakamalangá, pea ʻoku ueʻi ai kinautolu ke nau ʻahiʻahiʻi ia koeʻuhi he ko e ngaahi fakataha ko ʻení kuo fakalototoʻaʻi ai ke nau kau ʻi he ngāue fakamalangá ʻi he uike taki taha.
5 ʻOku ʻikai ke ʻi ai ha fetongi ʻi heʻetau ngaahi fakataha faka-Kalisitiané, ʻa ia ʻoku tau fakataha ai mo hotau kaungā-lotú pea fefakaʻaiʻaiʻaki ai ki he ngaahi ngāue lelei. Kapau ko ʻetau ngāue fakafaifekaú ke laka ki muʻa, kuo pau ke tau maʻu maʻu pē ʻa e ngaahi fakataha ʻa e fakatahaʻangá. Ke tau fakahā muʻa ʻa e houngaʻia ki he tokonaki fakaofo ko ʻeni meia Sihová ʻaki ʻa e “ʻoua naʻa tau liʻaki ʻetau ngaahi fakataha.”—Hep. 10:25.