Langa Fale Fakatahaʻanga

¹ ʻI he taimi ʻoku tau vakai atu ai ki he malaʻe malangá ʻi māmani lahí, ʻoku fakalotomāfana ke sio ki he tupulaki kāfakafa kuo hokosia ʻe he kautaha fakaemāmani ʻa Sihová. ʻI he taʻu kuo ʻosí naʻe tānaki mai ʻi māmani lahi ʻa e ngaahi fakatahaʻanga foʻou ʻe 3,288. Ko e lahi taha ʻo e ngaahi fakatahaʻanga ko ʻení ʻi ʻAfilika, ʻĒsia, ʻAmelika Lotoloto mo ʻAmelika Tonga, pea mo ʻIulope Hahake. ʻI he kotoa ʻo e tupulaki ko ʻení, ʻoku ʻikai ha ofo ai ki he fiemaʻu ha ngaahi Fale Fakatahaʻanga lahi ange.

² ʻOku fakahā ʻe he ngaahi tokoua mo e ngaahi tuofāfine tokolahi ʻa e faivelenga mo e poupou tuʻu-ki-muʻa ki he kautaha ʻa Sihová ʻaki ʻenau foaki loto-lelei atu honau taimí pea mo ʻenau koloá ki he langa Fale Fakatahaʻangá. ʻI māmani lahi ko e ngaahi Kōmiti Langa Fakavahefonua lahi ʻoku nau tokanga ki he ngaahi fiemaʻu ʻa e ngaahi fakatahaʻanga kuo vaheʻi ki honau ngaahi feituʻú. Ko e ngaahi kōmiti fakavahefonua ko ʻení kuo tuku ki ai ke nau tokangaʻi ʻa e ngaahi ngāue ko ʻení, pea ʻoku fakahoungaʻi ʻenau ngaahi ngāué. ʻI he ngaahi feituʻu ʻoku tokangaʻi ʻe he vaʻa ʻi Haʻamoa Hihifó ko e ngāue ko ʻení ʻoku tokangaʻi ia ʻe he ʻōfisi vaʻa ʻi ʻApiá. Ko e fokotuʻutuʻu fakalūkufua ki he langa Fale Fakatahaʻangá ʻoku fakahoko ia ʻo fakafou ʻi he laumālie ʻo e foaki mo e feilaulauʻi-kita faka-Kalisitiane​—ʻoku fehangahangai ia mo e laumālie ʻoku ʻiloa hono fakahāhā ʻi he māmaní.​—2 Tim. 3:​2, 4.

³ Ke tokoni ki hono ʻai ke tatau ʻa e ngaahi Fale Fakatahaʻangá, ʻi he konga lahi ʻo e māmaní kuo tokonaki ai ʻe he Sōsaietí ki he ngaahi kōmiti fakavahefonuá ha pēketi palani ʻo e Fale Fakatahaʻangá. Kuo tokoni ʻeni ke ngāue fakapotopotoʻaki ʻa e taimi pea mo e ngaahi koloa ʻa e kau ngāue polé. Kuo toe tokoni foki ia ki he tokangaʻi fakapotopoto ʻo e Paʻanga Fale Fakatahaʻanga ʻa e Sōsaietí. ʻOku fai leva ʻe he kau mātuʻá ʻenau filifilí mei he ngaahi palani tefito ko ʻení. ʻI he hili hono maʻu ʻa e meʻangāue foʻou ko ʻení, naʻe pehē ʻe ha Kōmiti Langa Fakavahefonua ʻe taha: “Naʻa mau fiefia ʻaupito mo ʻohovale moʻoni ke maʻu ʻa e pēketi langá. . . . Ko e ngaahi tokoua ʻoku taukei ʻi he tā palaní mo e ʻenisiniá kuo nau fakafuofuaʻi ʻoku nau fakahaofi ʻa e peseti ʻe 50 ki he 60 ʻo honau taimí ʻaki hono ngāueʻaki ʻa e ngaahi palani foʻou ko ʻení. ʻI hono maʻu ʻa e pēketi ko ʻení ʻe tokoni foki ia kiate kimautolu ke mau lava ai ʻo faʻu ʻa e ngaahi Fale Fakatahaʻangá ʻi ha founga mo e sīpinga meimei tatau.” ʻI he ngāue fakataha ʻa e ngaahi fakatahaʻangá ʻi hono poupouʻi ʻa hono ʻai ke tatau ʻa e ngaahi Fale Fakatahaʻangá, ʻoku tau fakatuʻamelie atu ai ko e ngāue mamafa ʻa e kau ngāue pole ʻosi fakatapui tokolahi ʻe hoko ʻo faingofua ange.

⁴ Poupouʻi ʻe he Kau Ngāue Polé ha Ngāue Lelei: ʻOku fakamālō atu ʻa e Sōsaietí ki he kau ngāue pole tokolahi ʻoku nau tokoni ki he langa Fale Fakatahaʻangá. ʻOku fakafiemālie moʻoni ke sio ki he laui mano ʻo e kau ngāue pole ʻi māmani lahi ʻoku nau liʻaki atu kinautolu ki he ngaahi tafaʻaki kehekehe ʻo e langa Fale Fakatahaʻangá. Ko e lavameʻa ʻo e polokalama ko ʻení koeʻuhi ko ha laumālie ʻo e loto-lelei, nima-homo, pea mo e ngāue fakataha ʻi he tafaʻaki ʻo e kau ngāue polé, ʻa ia naʻa nau feilaulauʻi honau taimi naʻe mei fakamoleki lelei ki heʻenau ngaahi fakatahaʻangá pea mo e ngaahi fāmilí. (Sāme 110:3; Kol. 3:23) Ko e tali anga-ʻofa ko ʻení ʻokú ne ʻai ai kinautolu ke nau taau mo ʻetau fakaongoongoleleí, houngaʻiá, pea mo e poupou kakató.​—Loma 12:10; Hep. 13:1.

⁵ ʻAi ke Siʻisiʻi ʻa e Fakamole ki he Langá: Kuo tokangaʻi ʻa e ngaahi Kōmiti Langa Fakavahefonuá ke nau fokotuʻutuʻu ʻa e potungāue fakataú ʻi he malumalu ʻo e tokanga ʻa ha tokotaha mātuʻa taau. Ko e ngaahi tokoua ʻoku nau ngāue ʻi he potungāue ko ʻení, ʻoku nau tōtōivi ʻi heʻenau ngāue fakataú koeʻuhi ke nau kumi ai ha ngaahi totongi feʻunga ʻo fakafou ʻi hono fakafehoanaki ʻa e meʻa ke fakataú pea mo e feʻauhi ke maʻu ʻa e totongi lelei tahá. ʻI he founga ko ʻení, ʻe lava ke fai ha fakapapau pe ko fē ʻa e feituʻu ke ngāueʻakí mo e ngaahi naunau ʻoku totonu ke fakataú. ʻI he taimi ʻe niʻihi, he lolotonga ʻo e ngāue langa ki ha Fale Fakatahaʻanga, ʻoku fakaafeʻi ʻa e ngaahi tokoua taau ʻi he fakatahaʻanga fakalotofonuá ke nau tokoni ki he potungāue ko ʻení.

⁶ Ke fakapapauʻi ʻe ngāueʻaki fakapotopoto ʻa e paʻangá, kuo pau ke loto ʻa e Kōmiti Langa Fakavahefonuá ki he kotoa ʻo e paʻanga hū ki tuʻa mei he paʻanga langá, ʻaki ʻenau fakamoʻoni sieke pe fakamoʻoni ʻi he ngaahi vausiá. Ka ʻo kapau ko ha ngāue langa Fale Fakatahaʻanga, pe langa foʻou pe fakafoʻou, kau ai ʻa e tokoni loto-fiefoaki mei he ngaahi fakatahaʻangá ʻo ʻikai ko e faʻahinga te nau ngāueʻaki ʻa e holó, ʻoku tokangaʻi ʻe he kōmiti fakavahefonuá ʻa e ngāué.

⁷ ʻI ha ngaahi taimi, ko e ngaahi palopalema fakalao lahi ʻe lava ke fepaki mo ia he lolotonga ʻo e langa ʻo ha Fale Fakatahaʻanga foʻou. ʻE lava ke hoko ʻo fuʻu faingataʻa ʻa e ngaahi meʻa hangē ko e ngaahi ngofuá, ngaahi laisení mo e maluʻí. ʻOku malava ke tokoniʻi ʻe he ngaahi Kōmiti Langa Fakavahefonuá ʻa e ngaahi palopalema ko ʻení ʻo taau mo e lahi ʻenau taukeí.

⁸ Tokoni mei he Ngaahi Vaʻa Kehé: ʻOku ʻi ai ʻa e ngaahi taimi ʻoku tokoni ai ʻa e ngaahi kōmiti fakavahefonua mei mulí ki he Kōmiti Langa Fakavahefonua fakafeituʻú. Naʻe pehē ʻa e meʻa fekauʻaki mo e langa ʻo e ongo Fale Fakatahaʻanga ʻi Sinamogá pea mo Nukuʻalofá. Ko ha fakahāhā moʻoni ia ʻo e ʻofá ʻi he taimi ʻoku loto-lelei ai ʻa e ngaahi tokoua fua fatongia mei he ngaahi fonua kehé ke nau folau atu ʻi he fakamole pē ʻa kinautolu ke tokoni ki he langa Fale Fakatahaʻanga.

⁹ Koeʻuhi ko e fakautuutu ʻa e fiemaʻu lahi ʻo e ngaahi Fale Fakatahaʻangá ʻi he ngaahi fonua lahi, ʻoku ʻi ai ʻa e fiemaʻu ke ngāueʻaki fakapotopoto ʻa e ngaahi paʻanga ʻoku ala maʻú. ʻI he ngaahi fonua tuʻumālie lahi, kuo fakalototoʻaʻi ai ʻe he Sōsaietí ʻa e ngaahi fakatahaʻanga ʻoku nau tuʻumālie fakapaʻangá ke nau ngāueʻaki fakapotopoto ʻenau malava tahá ʻi hono langa ʻa e ngaahi Fale Fakatahaʻanga foʻou, pea ki hono fakaleleiʻi ha niʻihi ʻoku ʻi ai. Kuo toe fakaafeʻi kinautolu ke nau tokoni fakapaʻanga ki hono langa ʻa e ngaahi Fale Fakatahaʻanga feʻunga ʻi he ngaahi konga kehe ʻo e māmaní. Kuo fakahoko ʻa e kole ko ʻení ʻi he fengāueʻaki fakataha lelei. Ko ia, ʻoku malava ke fai ha nō ki he ngaahi fakatahaʻanga ʻi he ngaahi fonua ʻoku fuʻu fiemaʻu fakavavevave ai ha ngaahi Fale Fakatahaʻangá, ka ʻoku ʻi ai ʻa e fakangatangata ʻi he ngaahi koloá pea mo e ngaahi palopalema fakaʻikonōmika faingataʻa.

¹⁰ Ko e fiemaʻu ʻo ha ngaahi Fale Fakatahaʻanga lahi ange ʻi he ngaahi fonua ʻe niʻihi ʻoku fakamamafaʻi mai ia ʻi he 1997 Yearbook. Ko e fakatātaá, ko e meʻa ʻoku lave ki ai ʻi ʻIukalainé, ʻa ia kuo langa ai ʻa e ngaahi Fale Fakatahaʻanga ʻe 47 ʻo aʻu mai ki he taimí ni pea ko e 56 kehe ai kuo kamata ke toe langa. Ko e fiemaʻu ʻi he ngaahi fonua peheé ʻoku fuʻu fakamoʻoniʻi ʻaupito. ʻOku pehē ʻe he līpootí: “Ko e ngaahi Fale Fakatahaʻanga lahi ange ʻoku fiemaʻu ʻi Lūsia. Ko e tupulaki ʻo e fika ʻo e Kau Fakamoʻoni ʻi aí ʻoku fuʻu tupu vave ʻaupito, ka ko e peseti ʻe 85 ʻo e ngaahi fakatahaʻanga ʻi he vaʻa ʻi Lūsiá ʻoku ʻikai ke ʻi ai ha ngaahi feituʻu faiʻanga fakataha tuʻumaʻu. ʻI Simipāpuē, ʻoku ʻi ai ʻa e ngaahi fakatahaʻanga ʻe 800 nai, kuo fiemaʻu ia ai ki he lahi taha ʻo kinautolu ke fakataha pē ʻi tuʻa. Kuo uesia ai heni ʻa e faʻahinga mahuʻingaʻia foʻou ʻe niʻihi ke nau holomui mei he haʻu ki aí.” Ko e ngaahi tuʻunga tatau pē ʻoku hoko ʻi he ngaahi fonua kehe ʻi ʻIulope Hahake, ʻAfilika, pea mo ʻAmelika Latina pea ʻoku kei fiemaʻu ha ngaahi Fale Fakatahaʻanga lahi ange ʻi Haʻamoa ʻAmelika, Tonga, pea mo Haʻamoa Hihifo.

¹¹ Neongo kuo ʻosi fai ʻa e meʻa lahi, ʻoku hā mei he līpootí ko e fonua ʻe taha ʻoku ʻi ai ʻa e ngaahi fakatahaʻanga ʻe 568 ʻoku ʻi ai pē ʻa e Fale Fakatahaʻanga ʻe taha. Ko ha fonua kehe ʻoku ʻi ai ʻa e Fale Fakatahaʻanga pē ʻe taha ki he ngaahi fakatahaʻanga ʻe 129. Ko e fonua ʻe taha ko e ngaahi fakatahaʻanga ʻe 41 ki he taha pē. ʻI he ngaahi fonua kehe ʻe niʻihi, laka hake ʻi he ngaahi fakatahaʻanga ʻe 1,000, kuo ʻikai pē malava ia ke langa naʻa mo ha Fale Fakatahaʻanga ʻe taha.

¹² Ko e kole tokoni ki hono langa ʻa e ngaahi Fale Fakatahaʻanga ʻi he ngaahi fonua peheé ʻoku fehoanaki ia mo e 2 Kolinito 8:​14, ʻa ia ʻoku pehē: “Ko e fai ʻaki ʻa e lao ʻo e fakafeʻunga: ʻo pehe, ʻi he taimi ko eni, ke lave atu hoʻomou meʻa hulu ki heʻenau meʻa taʻeaʻu.” Koeʻuhi ko e tokoni pehē mei he ngaahi tokoua ʻi he ngaahi fonua kehé, kuo malava ai ʻe he Sōsaietí ke tokoni ki hono langa ʻa e ngaahi Fale Fakatahaʻanga foʻou ʻe 413 pea fakaleleiʻi ʻa e 727 kehe ʻi he vahaʻa taimi ko e māhina ʻe fā ʻi he ngaahi fonua kehekehe ʻe 75.

¹³ He fakahoungaʻi lahi ē ko e laumālie lelei ʻo e nima-homo ʻa hotau ngaahi tokoua mei mulí! Neongo ʻoku tau maʻu nai ha tokoni pehē, ʻi he taimi tatau pē, ʻofa ke tau fai ha foaki ki he lahi taha ʻe malavá ʻo fakatatau ki hotau ngaahi tuʻunga tāutahá. Ko ʻetau poupou ki he Fale Fakatahaʻanga fakafeituʻú ʻaki hono totongi ʻo e noó, pea tokonaki ʻa e paʻanga ki he monomonó, ʻoku fakahā ai ʻa e laumālie loto-lelei tatau ʻa e kakai ʻa e ʻOtuá ʻi māmani lahi.

¹⁴ Neongo kuo momoko ʻa e ʻofa ʻa e tokolahi taha ʻo e faʻahinga ʻo e tangatá ʻi he ngaahi ʻaho fakaʻosí, ʻoku hokohoko atu ʻa e kakai ʻa e ʻOtuá ke fakahāhā ʻa e fakamoʻoni ʻo ʻenau feʻofaʻakí, ko ha ʻofa ʻoku mamaʻo atu ia ʻi he ngaahi fakangatangata fakamatakalí mo e fakafeituʻú. (Mt. 24:12) ʻI he faʻifaʻitaki ki heʻetau Tamai fakahēvaní, ʻofa ke tau hokohoko atu hono fakahā ʻetau ʻofa peheé ʻo fakafou ʻi heʻetau poupou loto-lelei ki he langa Fale Fakatahaʻangá. Ko ʻetau fai peheé ʻe ʻomai ai ʻa e tāpuaki lahi mo e hōifua ʻa Sihová.​—Mal. 3:10; Hep. 6:10.