Fili ʻa e Ngaahi Kupu ki Hono Tāketiʻi ʻa e Mahuʻingaʻia Makehe ʻa e Kakaí
1 Hangē ko e kau tangata fana-ngahau ʻoku nau tomuʻa fakataumuʻa tokanga ʻenau ngaahi ngahaú, ko e kau malanga mo e kau tāimuʻa tokolahi ʻi he fakatahaʻangá ʻoku nau fiefia ʻi he lavameʻa lelei ʻaupito ʻi hono filifili ʻa e ngaahi kupu mei he Taua Leʻo mo e Awake! ʻa ia ʻe fakamānako ki he mahuʻingaʻia tefito ʻa e kakai ʻi honau feituʻú. ʻOku nau fakakaukauʻi pe ko hai ʻoku ngalingali te ne saiʻia taha ke lau ha ngaahi kupu pau mei he ngaahi makasiní. ʻOku anga-fēfē ʻenau fai ʻení?
2 ʻUluakí, ʻoku nau lau ʻa e ʻīsiu taki taha mei muʻa ki mui. Pea, ʻoku nau ʻeke hifo kiate kinautolu, Ko e hā ʻa e faʻahinga tokotaha ʻe fakamānako ki ai ʻa e kupu taki taha? ʻOku fai leva ʻa e feinga ke ʻaʻahi ki he tokotaha tāutaha ʻoku ngalingali ʻe mahuʻingaʻia ʻi hono lau ʻa e kupu ko iá. ʻI hono tomuʻa fakakaukauʻi ha ʻīsiu makehe ʻoku ngalingali ʻe lahi hono talí ʻi honau feituʻú, ʻoku nau ʻota leva ha ngaahi tatau lahi ange.
3 ʻOku Tokaʻi Lelei ʻEtau Ngaahi Makasiní: Ko ha taha ʻo ʻetau kau tukuhaú ʻa ia ʻokú ne ngāue ki he makasini ʻoku lau fakavahaʻapuleʻanga lahi taha ʻi Naisīliá naʻá ne lea fekauʻaki mo e Awake!: “Fakamālō atu ki he makasini mahuʻinga lahi taha fakalūkufua ʻi he māmaní.” Ko ha tokotaha lau tohi vēkeveke ʻo ʻetau ngaahi makasiní naʻá ne pehē: “Ko ha ngaahi maka-koloa fakaofo ē ʻo e poto mātuʻaki mahuʻingá! ʻOku faingataʻa ke ʻi ai ha tuʻunga-lea ʻa ē ʻoku ou mahuʻingaʻia ai te u taʻeʻilo ʻoku fakamatalaʻi ia ʻi ha feituʻu pē ʻi he ngaahi peesi ʻo e taha ʻo e [ongo makasini] ko ʻení.”
4 ʻOku kāpui ʻe he ngaahi makasiní ʻa e ngaahi tuʻunga-lea lahi, kau ai ʻa e Tohitapú, ngaahi meʻa ʻoku hoko ʻi he māmaní, tokanga ki he fāmilí, ngaahi palopalema fakasōsialé, hisitōliá, saienisí, moʻui ʻa e fanga manú mo e ʻakaú, ko ha niʻihi pē ia ʻoku fokotuʻu atú. ʻIo, ʻoku hehema lahi ange ha tokotaha ke lau ha meʻa ʻi he taimi ʻoku lave ai ki heʻene ngaahi fiemaʻú, ngaahi tuʻungá, pe lakangá. Koeʻuhi ʻoku tau lea ki ha faʻahinga tāutaha tokolahi, ko kinautolu taki taha ʻoku ʻi ai ʻenau ngaahi fiemaʻu pau mo e ngaahi palopalema pē ʻa kinautolu, ko hono fili ha ngaahi kupu ʻe tautefito ʻene fakamānako ki he kakai ʻoku tau fetaulaki mo iá ʻoku ola lelei ʻaupito ia.
5 Fakatokangaʻi ʻa e meʻa naʻe hoko ʻi he taimi naʻe tuʻuaki ai ʻe he ongo Fakamoʻoni ʻe toko ua ʻa e ʻīsiu ʻo e Awake! ʻo Sepitema 8, 1996, ki ha tokotaha-faʻu-kōlomu ʻi ha nusipepa. Naʻá ne tohi: “Ki muʻa ke u maʻu ha faingamālie ke pehē ange ʻoku ʻikai te u mahuʻingaʻiá, naʻe tānaki mai ʻe ha taha ʻo kinaua: ‘ʻOku ʻi ai ha kupu ki he kau ʻInitia ʻAmeliká. ʻOkú ma ʻiloʻi ʻokú ke faʻa tohi lahi fekauʻaki mo e kaveinga ko iá.’” Naʻá ne ʻave ʻa e makasiní, pea lolotonga ʻa e kai pongipongí, naʻá ne lau ʻa e fakamatala fekauʻaki mo e kau ʻInitiá, ki mui mai aí naʻá ne fakamoʻoniʻi “naʻe lelei ʻaupito ia” pea “faitotonu fakaʻaufuli.”
6 Ko e Hā ʻa e Meʻa ʻOku Mahuʻingaʻia Ai ʻa e Kakai ʻi Ho Feituʻú? Ko e hā ʻa e meʻa kuó ke sio ai ʻi he ngaahi makasini ʻi he ngaahi māhina ki muí ni maí ʻa ia ʻoku fakamānako nai ki ha kau tauhi-koloa mo e kakai pōtoʻi ʻi ho feituʻú pe ki ho ngaahi kaungāʻapí, kaungāngāué, mo e kaungāakó? Ko e hā ʻe mahuʻingaʻia tefito ai ʻa e kau fakafofonga laó, kau faiakó, kau faleʻi ki he fāmilí mo e akoʻangá, kau faleʻi ki he toʻutupú, kau tokonaki ngāue fakasōsiale, mo e kau toketā moʻuí? ʻI hono manatuʻi ʻa e kakai ʻokú ke malanga ki aí ʻi hoʻo sivisiviʻi ʻa e ʻīsiu taki tahá, te ne ʻoatu ai kiate koe ʻa e ngaahi founga lelei taha ke fakamafola atu ai ʻa e folofola ʻo e moʻoní.
7 ʻI hono maʻu ha tokotaha ʻokú ne mahuʻingaʻia makehe ʻi ha kupu ʻi ha Taua Leʻo pau pe Awake! pea ʻokú ne tali ʻa e makasiní, te ke pehē nai: “ʻI he taimi ʻe ʻi ai ha kupu ʻi he ʻīsiú he kahaʻú te u ongoʻi ʻe toe mahuʻinga kiate koe, te u fiefia ke ʻomai haʻo tatau.” Te ke malava nai ke fakakau ʻa e tokotahá ki hoʻo tufaʻanga makasini paú, ʻo toutou ʻaʻahi ki ai mo e ngaahi makasini fakamuimuí. ʻOku tatau ia mo e meʻa kuo fai ke maʻu ai ha faingamālie ke fai ha ngaahi toe ʻaʻahi ki he tokotaha tāutaha ʻokú ne mahuʻingaʻia nai ʻi ha ngaahi kupu pau ʻa ia ʻoku hā ʻi heʻetau ngaahi makasiní.
8 ʻAi ha Taumuʻa Fakalaumālie: ʻI he ngaahi taʻu siʻi kuo maliu atú, naʻe maʻu ʻe ha tangata tokanga-ngāue ha makasini Awake! ʻi ha tuʻunga-lea naʻá ne mahuʻingaʻia ai. Kae kehe, ko e tangata lotu ko ʻení naʻá ne toe lau ʻa e ʻīsiu ʻoku ʻalu fakataha mo iá ko e Taua Leʻo, ʻa ia naʻe ʻi ai ha kupu naʻá ne ueʻi ia ke ne siviʻi ʻa ʻene tuí ʻi he kotoa ʻene moʻuí ki he Tolu-Tahaʻi-ʻOtuá. ʻI he māhina ʻe ono ki mui mai ai, naʻá ne papitaiso! Ko ia ai, ʻoua ʻe toumoua ke fakakau ʻa e kau lau tohi ʻo ʻetau ngaahi makasiní ʻi he ngaahi fetalanoaʻaki fakalaumālié. ʻOku lava ke fakaʻaliʻali ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? pea tuʻuaki ange ke ʻi ai ha miniti siʻi ke fakamatalaʻi ai ha lēsoni ʻe taha ʻi he taimi ʻaʻahi taki taha ʻokú ke foki atu aí fakataha mo ha ngaahi makasini foʻou.
9 Fai ha fakakaukau fakalelei ki he faʻahinga ʻi he lotolotonga ʻo hoʻo ngaahi toe ʻaʻahí pea mo e ngaahi felāveʻi fakapisinisi ngalingali te nau houngaʻia lahi taha ke maʻu ʻa e ngaahi ʻīsiu lolotonga ʻo e Taua Leʻo mo e Awake! Pea fai ha feinga fakamātoato ke aʻu kiate kinautolu. Fetuʻutaki ki he tokolahi taha te ke malavá mo e ongo makasini mahuʻinga ko ʻení. Pea ʻoua ʻaupito naʻa ngalo ʻokú ke feinga ke tokoniʻi ʻa e kakai tokolahi ange ke nau lau ʻetau ngaahi makasiní, ʻokú ke ‘li atu hoo ma ki he fukahi vaí.’ Faifai atu pē, te ke lavameʻa nai ʻi hono maʻu ha kaungāākonga ʻi he kahaʻú.—Koh. (Tagata Malaga) 11:1, 6, PM.