Kau Talavou—Ngāueʻaongaʻaki Hoʻomou Akó
1 ʻI ʻAokosi mo Sepitemá ʻoku ʻi ai ʻa e ngaahi taimi mālōlō fakaako ʻi he ngaahi fonua he malumalu hotau vaʻá. ʻOku anga-fēfē hoʻo ongoʻi fekauʻaki mo e foki ki he akó he hili ʻa e taimi mālōloó? ʻOkú ke vēkeveke ke hokohoko atu hono maʻu ha ʻaonga mei hoʻo akó? Te ke ngāueʻaongaʻaki ʻa e ngaahi faingamālie ʻoku ʻomai ʻe he akó kiate koé ke fevahevaheʻaki ai ʻa e moʻoní mo ho ngaahi kaungāakó mo e kau faiakó? ʻOku mau falala pau te mou saiʻia ke fai hoʻomou lelei tahá ʻi he ʻapiakó.
2 Hoko ko ha Tokotaha-Ako Lelei: Kapau te ke mateuteu lelei ʻi he taimi ʻokú ke ʻalu ai ki hoʻo kalasí pea tokanga lelei, te ke maʻu ʻa e ngaahi ʻaonga tuʻuloa. Hoko ʻo tōtōivi fekauʻaki mo hono tokangaʻi hoʻo ngaahi homueká, kae ʻoua ʻe fakaʻatā ʻa hoʻo ngāue fakaeakó ke ne uesia ʻa e ngaahi ngāue fakateokalatí.—Fili. 1:10.
3 Kamata ʻa e teemi fakaako foʻoú ʻaki hono toe lau ʻa e polosiua Jehovah’s Witnesses and Education. ʻI he kamata ʻa e taʻu fakaako taki taha, ko koe pe ko hoʻo ongo mātuʻá ʻoku totonu ke na ʻave ha tatau ki he faʻahinga taki taha ʻo hoʻo kau faiakó. Kapau ko e lolotonga ʻo e taʻú ʻokú ke maʻu ha faiako foʻou ʻoku lelei foki ke ʻoange kiate kinautolu ha tatau. ʻAi ke nau ʻiloʻi ko ha ngaahi fehuʻi pē nai te nau maʻu ʻe lava ke tali. ʻE tokoniʻi ai heni kinautolu ke mahinoʻi lelei ange hoʻo ngaahi tefitoʻi moʻoní pea mo e ngaahi tuí pea ngāue fakataha mo koe ʻi hoʻo ngāueʻaki ʻa e meʻa kuo akoʻi koe ki aí. ʻE toe fakapapauʻi ai heni ki hoʻo kau faiakó ko koe mo hoʻo ongo mātuʻá ʻoku mou fakaʻamu ke fengāueʻaki fakataha mo kinautolu ʻi heʻenau tokoniʻi koe ke maʻu ha ako mahuʻinga.
4 Hoko ko ha Fakamoʻoni Lelei: Ko e hā ʻoku ʻikai ke vakai ai ki he ʻapiakó ko hoʻo feituʻu fakafoʻituitui ia ki he faifakamoʻoni ʻi he founga ʻikai anga-mahení? ʻI he hokohoko atu ʻo e taʻu fakaakó, te ke maʻu ai ha ngaahi faingamālie tuʻu-ki-muʻa ke faifakamoʻoni ai. ʻOkú ke maʻu ʻa e ʻilo fakalaumālie fakaofo ʻa ia ʻi he taimi ʻokú ke vahevahe atu aí, ʻoku lava ai “ke ke fakamoʻui koe mo kinautolu foki ʻoku fanongo kiate koe.” (1 Tim. 4:16) ʻI hono tauhi maʻu ha ʻulungaanga faka-Kalisitiane faʻifaʻitakiʻanga lelei pea ʻaki ʻa e faifakamoʻoni ʻi ha feituʻu pē ʻoku feʻungamālie ke fai pehē aí, te ke maʻu ai ʻa e ʻaonga fakatouʻosi kiate koe mo e niʻihi kehé.
5 Ko ha tokoua kei talavou ʻe taha naʻá ne faifakamoʻoni ʻi he founga ʻikai anga-mahení ki ha kaungāako ʻi hono ʻapiakó. ʻI he lotolotonga ʻo e faʻahinga naʻa nau tali loto-leleí naʻe ʻi ai ha Katolika, ko ha tokotaha fakaʻikai ʻOtua ʻokú ne faʻa fakaangaʻi ʻa e faʻahinga ʻoku nau tui ki he ʻOtuá, pea mo ha kiʻi talavou ʻa ia ko ha tokotaha ifi taʻemotu pea mo ha tokotaha inu lahi. Ko hono fakalūkufuá, ko e tokoua kei talavou ko ʻení naʻá ne tokoniʻi ʻa e toko 15 ʻo hono kaungāmeʻá ke fakatapui mo papitaiso!
6 Ko ia ai, kau talavou, angaʻaki ʻa e akó peá ke ngāueʻi ho feituʻu makehe faiʻanga fakamoʻoní. Te ke maʻu leva ai ʻa e ʻaonga lahi taha mei he ʻalu ki he akó.