Maʻu ʻa e ʻAonga mei he Polokalama Akoʻanga Fakafaifekau Fakateokalati 1999
1 Ko Sīsuú ko e Faiako Lahí ia. Ko e kakaí naʻe “toʻoa honau loto ʻi he anga o ʻene fai.” (Mk. 1:22) Neongo ʻoku ʻikai ha taha ʻiate kitautolu ʻe lava ke lea mo faiako ʻo lelei tatau mo ia naʻe fai ʻe Sīsuú, ʻe lava ke tau feinga ke faʻifaʻitaki kiate ia. (Ng. 4:13) Ke maʻu ʻa e taumuʻa ko iá, ko ʻetau kau ʻi he polokalama Akoʻanga Fakafaifekau Fakateokalatí te ne tokoniʻi kitautolu ke hokohoko atu hono fakaleleiʻi ʻetau pōtoʻi ʻi he leá mo e faiakó.
2 ʻI he 1999, ko e Konga Fika 1 ʻe makatuʻunga ia ʻi he ngaahi kupu mei he ngaahi Taua Leʻo faka-Tonga ʻo e 1997 mo e ngaahi konga ʻo e tohi “All Scripture” ʻa ia ʻe pulusi ia ko ha polosiua ʻi he lea faka-Tongá. Ko ʻetau mahino ki he ngaahi meʻa fakalaumālié ʻe fakaleleiʻi lahi ia kapau te tau lau ki muʻa ʻa e fakahinohino ko ení pea toki fanongo ki ai ʻi he polokalama ʻo e akó. Ko e faʻahinga ko ia kuo vaheʻi ke nau fai ʻa e ngaahi malanga fakahinohino ko ení ʻoku totonu ke nau ngāueʻaongaʻaki ʻa e fakamatalá, ʻo fakahoko ia ʻi ha founga fakamānako mo longomoʻui. Ko e Konga Fika 3 ʻe makatuʻunga ia ʻi he tohi Ngaahi Talanoa Faka-Tohitapú, pea ko e Konga Fika 4, ʻi he tohi ʻIlo mo e tohi Moʻui Fakafāmilí. ʻOku totonu ke fakakaukau tokanga ʻa e ʻovasia ʻo e akoʻangá ki he fakamatalá ki muʻa ke vaheʻi ʻa e ngaahi kongá. Ko e kau ako kotoa pē kuo vaheʻi ke nau fai ʻa e fakamatala mei he tohi Moʻui Fakafāmilí ʻoku totonu ke nau faʻifaʻitakiʻanga lelei ʻi heʻenau moʻui fakafāmilí tonu.
3 Ngāueʻaki ʻa e Akonakí, pea Teuteu Lelei: Ko e tokotaha kotoa pē ʻoku lava ke ne fai ha fakalakalaka lahi ange ʻi he pōtoʻi he leá mo e faiakó. (1 Tim. 4:13) Mei hení, ʻoku totonu ke tau kumi ki he akonakí pea ʻoua ʻaupito ʻe vakai ki ai ko ha meʻa ke fakaʻehiʻehi mei ai. (Pal. 12:15; 19:20) Ko hono fakahoko ola lelei ʻa e moʻoní ʻi he ngaahi fakatahá pea ʻi he ngāue fakamalangá ʻoku fiemaʻu ki ai ʻa e meʻa lahi ange ʻi he fakamatala pē ki he ngaahi moʻoniʻi meʻá pe lau ʻa e ngaahi konga Tohitapú ʻi ha founga ko e kehe pē ke fai. ʻOku fiemaʻu ke tau aʻu ki he ngaahi lotó pea ueʻi ʻa e faʻahinga ko ia ʻoku nau fanongo mai kiate kitautolú. ʻE lava ke tau fai eni ʻaki ʻetau lea tuipau ʻaki ʻa e moʻoní mei hotau lotó. (Fakafehoanaki mo Ngāue 2:37.) Ko e akonaki ʻoku tau maʻu ʻi he akó te ne tokoniʻi kitautolu ke fakahoko eni.
4 ʻI hoʻo maʻu pē ha konga, fakakaukau fekauʻaki mo e anga ʻo e leá te ke ngāue ki aí hangē ko ia ʻoku fakamatalaʻi ʻi he kiʻi tohi Founga ke Fakaleleiʻiʻaki Hoʻo Pōtoʻi Fakaeleá mo Fakaefaiakó. Fakakaukau ki he meʻa ʻoku fiemaʻu ke ke fai ke ngāueʻaki ai ʻa e akonaki kuó ke maʻu ki muʻá. Fakalaulauloto ki hoʻo kaveingá, ko e fokotuʻutuʻu te ke ngāueʻakí kapau ʻoku fiemaʻu, pea mo e founga te ke ngāueʻaki ai ʻa e ngaahi konga Tohitapu kuo maʻu ʻi hoʻo konga kuo vaheʻi atú. Fakalaulauloto ki he founga lelei taha ke ngāueʻaki ai ʻa e fakamatalá ke faiako ʻaki mo fakaueʻilotó.—1 Tim. 4:15, 16.
5 Kapau ʻokú ke tailiili fekauʻaki mo e kau ʻi he akó, lotu fekauʻaki mo ia pea toki fetalanoaʻaki leva mo e ʻovasia ʻo e akó fekauʻaki mo hoʻo ngaahi ongoʻí. ʻE lava ke maʻu ʻe he tokotaha kotoa ʻa e ʻaongá ʻaki haʻanau ngāuelelei kakato ʻaki ʻa e polokalama ko ia ʻe fakahoko ʻi he Akoʻanga Fakafaifekau Fakateokalatí ʻi he 1999.