Founga ke Fengāueʻaki Fakataha Ai ʻa e Ngaahi Mēmipa ʻo e Fāmilí ke Kau Kakato—Ki he Ngaahi Fakataha ʻa e Fakatahaʻangá
1 Kuo pau ki he ngaahi fāmili Kalisitiané ke nau tokanga ki he fekau ke fakatahataha fakataha ki he ngaahi fakataha ʻa e fakatahaʻangá. (Hep. 10:24, 25) ʻI he fengāueʻaki lelei fakatahá, ʻe lavameʻa ai ʻa e tokotaha kotoa pē ʻi he teuteu, maʻu, pea kau ki he ngaahi fakatahá. ʻOku kehekehe ʻa e ngaahi tuʻunga ʻo e fāmilí, ka ʻoku ʻi ai ʻa e ngaahi meʻa ʻoku lava ke fai ʻe ha husepāniti Kalisitiane, ko ha uaifi tui, pe ko ha mātuʻa tauhi fānau pē ʻe taha ke poupouʻi ʻa e fāʻūtaha fakafāmili ʻi he ngaahi meʻa fakalaumālié, neongo ʻa e tokolahi ʻo e fānau ʻi ʻapí pea mo honau ngaahi taʻumotuʻá.—Pal. 1:8.
2 Fiemaʻu ha Taimi ke Teuteu: ʻOku ngāue fakataha ʻa e ngaahi mēmipa ʻo e fāmilí ke sio ko e tokotaha taki taha ʻoku teuteu lelei ki he ngaahi fakataha ʻa e fakatahaʻangá. ʻOku lāulea fakataha ʻa e tokolahi ʻi he kupu ki he Ako Taua Leʻo fakauiké. ʻOku teuteu ʻa e niʻihi ki he Ako Tohi ʻa e Fakatahaʻangá pe lau ʻa e lau Tohitapu fakauiké ʻi he tuʻunga ko ha fāmili. Ko e taumuʻá ke maʻu ʻa e ngaahi poini tefitó ʻi he ʻatamaí ki muʻa ke maʻu ʻa e ngaahi fakatahá. ʻI he founga ko iá, ʻe maʻu ʻaonga lahi ange ai ʻa e tokotaha kotoa pē mei he meʻa ʻoku nau fanongo ki aí pea ʻe mateuteu ai ke kau ki ai ʻi he ʻi ai ha faingamālié.—1 Tim. 4:15.
3 Palani ke Kau Ki Ai: ʻOku totonu ki he tokotaha kotoa pē ʻi he fāmilí ke ne maʻu ʻa e taumuʻa ko hono fakahā atu ʻene ʻamanakí ki he niʻihi kehé ʻaki hono fai ha tali ʻi he ngaahi fakatahá. (Hep. 10:23) ʻOku fiemaʻu ʻe ha mēmipa ʻi ha fāmili ha tokoni pe fakalototoʻa ke fai ʻeni? Ko e hā ʻa e tokoni ʻoku fiemaʻu ki he tokotaha taki taha ki hono teuteu ʻa e ngaahi konga kuo vaheʻi ki he Akoʻanga Fakafaifekau Fakateokalatí? ʻOku houngaʻia ʻa e ngaahi uaifí ʻi he taimi ʻoku tokanga ai ʻa e ngaahi husepānití pea ʻoatu nai ha fakakaukau ki ha fakatātā feʻungamālie pe ko ha fokotuʻu ʻaonga. ʻOku ʻikai fiemaʻu ke ongoʻi ʻe he ngaahi mātuʻá ʻoku totonu ke nau teuteuʻi ʻa e ngaahi konga ki heʻenau fānau īkí. ʻI he fai peheé ʻoku taʻofi ai ʻa e tomuʻa feinga ʻa e fānaú. Ka ʻoku malava ki he ngaahi mātuʻá ke tokoniʻi ʻenau fānau īkí pea fanongo ki heʻenau ʻahiʻahiʻi leʻo-lahi iá.—Ef. 6:4.
4 Fokotuʻutuʻu ke Kau Ki Ai: ʻOku lava ke akoʻi ʻa e fānaú mei he kei taʻu siʻí ke nau tui vala pea mateuteu ke ʻalu ki he fakatahá ʻi ha taimi kuo vaheʻi. ʻOku totonu ke fengāueʻaki fakataha ʻa e ngaahi mēmipa ʻo e fāmilí ʻi hono tokangaʻi ʻa e ngaahi ngāue fakaʻapí koeʻuhí ke ʻoua ʻe ʻi ai ha fakatuai.—Sio ki he ngaahi fokotuʻu ʻi he tohi Family Happiness, peesi 112, mo e Young People Ask, peesi 316-317.
5 Ko e ngaahi mātuʻá pea pehē ki he fānaú ʻoku lava ke nau fakakaukau fakamātoato ki he ngaahi lea ʻa Siosiua ʻo e kuonga muʻá, ʻa ia naʻá ne pehē: “Ko au mo hoku fale te mau tauhi ʻa Sihova.” Fakapapauʻi leva ke fengāueʻaki fakataha ke kau kakato ki he ngaahi fakataha ʻa e fakatahaʻangá.—Sios. 24:15.