“Ko e Hā ʻOku Totonu Ke U Faí?”
1 ʻI ho tuʻunga ko ha talavou ofi ki he tuʻunga fatutangatá, ʻokú ke ʻeke nai: ‘Ko e hā ʻoku totonu ke u faiʻaki ʻeku moʻuí?’ ʻOku loto ʻa e kau talavou Kalisitiané ke fakalahi atu ʻenau ngāue kia Sihová ʻi he ngāue fakafaifekaú. Ka ʻe lava fēfē ke ke fai ʻeni lolotonga ia ʻokú ke maʻu ʻa e ngaahi fatongia ʻo e tuʻunga fatutangatá, ʻa ia ʻoku kau ki ai ʻa e tokonaki maʻa hoʻo ngaahi fiemaʻu fakamatelie pē ʻaʻaú? Ko hono maʻu ʻa e talí ʻoku ʻikai nai ke faingofua.
2 ʻOku hoko ʻo loto-moʻua ʻa e kau talavou ʻe niʻihi ʻi heʻenau sio atu ki he tuʻunga fakaʻikonōmika ʻo e māmaní pea mo e ngaahi fakamatala tokamuʻa ki he kahaʻú. ʻOku nau fifili: ‘ʻOku totonu ke u tulitāupau ki ha ako fakaemāmani lahi ange? ʻOku totonu ke u kau leva ki he ngāue taimi-kakató?’ Koeʻuhi ke fai ha fili totonú, ʻoku fiemaʻu ki ha tokotaha ke ne tali faitotonu ʻa e fehuʻi ko ʻení, ‘Ko e hā ʻeku ʻuluaki meʻa mahuʻinga lahi taha ʻi he moʻuí?’ Kuo pau ke ne sivisiviʻi ʻene ngaahi taumuʻá.
3 Ko e hā kuó ke fakatupulekina ko hoʻo tokanga tefito ia he lolotonga ʻo hoʻo kei talavoú? ʻOkú ke mahuʻingaʻia tefito ʻi he kumi ki he faingamālie fakaepaʻangá, pe ʻokú ke fiemaʻu moʻoni ke ngāueʻaki hoʻo moʻuí ke laka ki muʻa ʻa e ngaahi meʻa mahuʻinga ʻo e Puleʻangá? ʻOku ʻikai fakapapauʻi ha lavameʻa ʻi he ngāue fefakatauʻakí ʻe ha maʻu mataʻitohi ʻi ha ʻunivēsiti. ʻI ha founga kehe, ʻoku maʻu ʻe he tokolahi ʻa e ngaahi pōtoʻi ngāue fefakatauʻakí fakafou ʻi he ngaahi polokalama ako ngāue ko ha ako pe ʻi ha akoʻanga ngāue fakatekinikale, pe ko e ngaahi polokalama ako nounou ʻa ia ʻoku fiemaʻu ki ai ha taimi siʻisiʻi pea mo e kau ki aí.
4 Tui ki he Talaʻofa ʻa Sihová: Ko ha moʻoniʻi meʻa mātuʻaki mahuʻinga ia ke fakakaukau ki ai ko e fakapapau mei he ʻOtua ko Sihová ʻo pehē te ne tokonaki maʻá e faʻahinga ʻoku nau fakamuʻomuʻa ʻi he moʻuí ʻa e ngaahi meʻa mahuʻinga ʻo e Puleʻangá. (Mt. 6:33) ʻOku ʻikai ko ha talaʻofa taʻeʻaonga ʻeni. Tokolahi ʻa e ngaahi tokoua ʻoku kau ki he Akoʻanga Ako Fakafaifekaú naʻa nau maʻu ʻa e ngaahi mataʻitohi fakaeako ʻi muʻa ia ʻi heʻenau ako ki he moʻoní. Ka ko e hā kuo nau fai ki ha ngāue fakaemāmaní? Ko e tokosiʻi ʻaupito kuo nau tulitāupau ki he ngāue ʻa ia naʻa nau ako ki aí. Kuo ngāue ʻa e tokolahi ʻi he ngaahi malaʻe ngāue fakaemonomono, ʻo mātuʻaki tokangaʻi lelei ʻenau ngaahi fiemaʻu fakapaʻangá lolotonga ʻa e ngāue tāimuʻá. ʻI hono fakalahi atu ʻenau ngāue ʻi he ngāue fakafaifekaú, ʻoku nau maʻu ai ʻa e ngaahi tāpuaki ʻo lahi mamaʻo ange ia ʻi ha faʻahinga meʻa fakapaʻanga pē.
5 ʻI hono fakakaukauʻi ʻa e meʻa ʻoku totonu ke ke fai ʻi he hili ʻa e ʻosi ʻa e maʻu tohi fakamoʻoni ako mei he akoʻanga māʻolungá, fakakaukau fakalelei ki he ngaahi tefitoʻi meʻa kotoa pē pea sivisiviʻi fakalelei ʻa hoʻo ngaahi taumuʻá. Ki ha vakai mafamafatatau ki hoʻo ngaahi filí, vakai ki he fakamatala pehē ʻoku hā ʻi he Awake! ʻo Maʻasi 8, 1998, peesi 19-21. Lea ki hoʻo ongo mātuʻá, ko e kau mātuʻá, ko hoʻo ʻovasia fakafeituʻú, pea mo e kau tāimuʻa lavameʻa ʻi ho feituʻú. ʻE tokoni ia ke ke fai ha fili fakapotopoto fekauʻaki mo e meʻa ʻoku totonu ke ke fai ʻaki hoʻo moʻuí.—Koh. 12:1, 13.