ʻOku ʻI Ai Haʻo ʻOta Pau?
1 Kuó ke faʻa ʻalu ki ha fakataha ki he ngāue fakamalangá peá ke fakatokangaʻi ai ʻoku ʻikai ke ʻi ai haʻo ngaahi makasini ʻi hoʻo kato malangá? Sai, fakamanatuʻi ʻa e fakalahi ʻo ʻEtau Ngāue Fakafaifekau ʻo e Puleʻanga ʻo Sepitema 1995 ʻoku fakakaveinga “Ngāueʻaki ʻa ʻEtau Lelei Tahá ʻi Heʻetau Ngaahi Makasiní.” ʻOku tala mai ai kiate kitautolu ke “maʻu ha ʻota makasini pau,” ʻo fakahā ai: “ʻAi haʻo ʻota totonu ʻi he tokoua ʻokú ne tokangaʻi ʻa e ngaahi makasiní ki ha lahi pau ʻo e ngaahi tataú ʻi he ʻīsiu taki taha. ʻI he foungá ni, te ke maʻu maʻu pē ai mo ho fāmilí ʻa e ngaahi makasini lahi feʻunga.” Kuó ke fai ʻeni?
2 Ko e hā ʻoku ʻikai ke tuku ai ha ʻota pau ki he ngaahi makasiní? Te ke ongoʻi ko ha fatongia lahi ange ia ke tufa ʻa e ngaahi makasiní ʻi he uike ki he uike, pea te ke hokosia ha fiefia lahi ʻi hoʻo fai peheé. Kapau kuó ke ʻosi maʻu ha ʻota pau, toe fakamahuʻingaʻi pe ʻokú ke maʻu ʻa e lahi ʻokú ke fiemaʻu ki ha ʻavalisi ʻi he māhiná ʻi he ngāue fakafaifekaú. Ko e moʻoni, ʻoku tau loto ke tau faitotonu ʻi hono ʻave ʻetau ʻotá ʻi he taimi taki taha ʻoku aʻu mai ai ʻa e ngaahi makasiní pea ʻoku totonu ke tau ongoʻi ko ha fatongia ia ke fai pehē. Kapau te ke mavahe mei he fakatahaʻangá ʻi ha taimi lōloa, ʻai ke ʻilo ʻe he sevāniti ki he makasiní pe ʻokú ke loto ke tuku atu hoʻo ngaahi makasiní ki ha taha kehe kae ʻoua ke ke foki mai.
3 ʻOku toe pehē ʻe he fakalahi naʻe hā ʻi ʻolungá ʻoku totonu ke tau “fakapolokalamaʻi ha ʻaho makasini tuʻumaʻu.” ʻE lava ke ke poupouʻi ʻa e ʻAho Makasini fakauiké? Hangē ko ia ʻoku hā ʻi he 1999 Calendar of Jehovah’s Witnesses, ko e Tokonaki kotoa pē ia ʻo e taʻú! ʻOua ʻe fakasiʻisiʻi ʻa e mahuʻinga ʻo hono tufa ʻa e Taua Leʻo mo e Awake! ʻI heʻetau fai ha feinga ke kau kakato ʻi he ngāue makasiní, ʻoku tau “ongoongo mai ʻa e lelei” ki hotau ngaahi kaungāʻapí.—Ai. 52:7.