Fakapapauʻi Ke Ke Toe Foki ki Ai!
1 “Ko ha fetalanoaʻaki lelei ē! Te u manatuʻi ke fai ha toe ʻaʻahi ki ai.” Kuó ke ʻosi leaʻaki ʻa e ngaahi foʻi lea ko iá pea ngalo ʻamui ange pe ko fē ʻa e feituʻu ʻoku nofo ai ʻa e tokotahá? Kapau ko ia, ʻokú ke ʻilo ko e founga pē ʻe taha te ke malava ai ke fakapapauʻi ke toe foki ki aí ko hano tohiʻi ia.
2 Tohiʻi Kotoa Ia: ʻI he lolotonga ʻa e kei foʻou ʻi ho ʻatamaí ha fetalanoaʻaki mo ha tokotaha mahuʻingaʻia, ʻai ha kiʻi mōmeniti ke ke tohiʻi kotoa ai ʻa e fakamatala ʻoku kaunga ki he ʻaʻahí. Tohiʻi ʻa e hingoa ʻo e tokotahá pea mo e founga te ke ʻiloʻi ai iá. Tohiʻi hifo mo hono tuʻasilá (pe ko ha fakamatalaʻi ʻo e falé mo hono tuʻuʻangá), kae ʻoua ʻe fakamahaloʻi iá—vakaiʻi ke fakapapauʻi ko e meʻa ʻokú ke hikí ʻoku tonu. Tohiʻi mo e kaveinga naʻá mo talanoa ʻo kau ki aí, ko ha ngaahi konga Tohitapu pē ʻa ia naʻá ke lau, pea mo e tohi naʻá ke tukú.
3 Kapau naʻá ke tuku ki he tokotahá ha fehuʻi ke toki tali ʻi hoʻo ʻaʻahi hono hokó, tohiʻi hifo mo ia. Naʻá ke ʻilo ha meʻa fekauʻaki mo e tokotahá, ko hono fāmilí, pe ko ʻene lotú? Kapau ko ia, hiki ha nouti ʻo e meʻa ko ʻení. Pea ʻi he taimi hoko te ke ʻaʻahi ai ki aí, ko hoʻo lave ki he meʻa ko iá te ne fakahaaʻi ai hoʻo mahuʻingaʻia fakafoʻituitui ʻi he tokotahá. Ko e fakaʻosí, fakakau atu ki ai ʻa e ʻaho mo e taimi naʻá ke fai ai ʻa e ʻuluaki ʻaʻahí pea mo e taimi naʻá ke tala ange ai te ke toe foki ange aí. ʻI hono hiki ʻa e ngaahi nouti leleí, te ke manatuʻi lelei ai pea ʻe ngalingali siʻi ai ʻa e ngalo ʻiate koe hoʻo palōmesi ke toe foki angé.—1 Tim. 1:12.
4 ʻI he kakato pē hoʻo lēkōtí, tuku fakataha ia mo e toenga ʻo hoʻo naunau ki he ngāue fakamalangá—ʻa e kato tohí, Tohitapú, kiʻi tohi ko e Kamata mo Hoko Atu ʻa e Fetalanoaʻaki, tohi Reasoning, pea mo e ngaahi tohí—koeʻuhí ke faingamālie maʻu pē. ʻOku lelei taha ke lēkooti ʻa e faʻahinga ʻikai-ʻi-ʻapí ʻi he ngaahi lēkooti fale-ki-he-fale ʻa ia ʻoku mavahe mei he lēkooti ko ia ʻokú ke ngāueʻaki ke hiki ai hoʻo ngaahi toe ʻaʻahí. Ko ia ai, neongo ʻa e ngāue ʻokú ke fai ʻi hono tauhi ha lēkooti totonu ʻo e ngaahi toe ʻaʻahí, ko e meʻa mahuʻingá ke fakapapauʻi ke ke toe foki ki ai!
5 Fakakaukau Fekauʻaki mo e Tokotahá: ʻI he taimi ʻoku fai ai ʻa e teuteu ki he ngāue fakafaifekaú, toe vakaiʻi ʻa hoʻo ngaahi nouti toe ʻaʻahí. Fai ha fakakaukau ki he tokotaha tāutaha taki taha pea mo e fakaofiofi lelei taha nai ke ngāueʻaki ʻi hono fai ʻa e ʻaʻahi hokó. Fakakaukau ki he founga ke fakatupulekina ai ʻa e mahuʻingaʻia ʻa e tokotahá ki ha ako Tohitapu ʻi ʻapi. Ko e fokotuʻutuʻu peheé ʻe lava ke fakatupulekina ai ʻa hoʻo ola lelei ʻi he tuʻunga ko ha faifekau ʻo e ongoongo leleí pea ʻe tupu mei ai ʻa hoʻo fiefia fakafoʻituituí.—Pal. 21:5a.
6 Ko ia, ʻi he taimi hoko mai te ke maʻu ai ha telinga ʻoku fiefanongó, ʻoua te ke fakaʻuhinga ʻo pehē te ke lava ʻo manatuʻi ngofua ʻa e toe ʻaʻahí. ʻI hono kehé, tohiʻi hifo ia, toe vakaiʻi ʻa hoʻo ngaahi noutí, hanganaki fakakaukau fekauʻaki mo e tokotahá, peá ke fakapapauʻi leva ke toe foki ki ai!