Ko e Moʻoni Fekauʻaki mo e Puleʻanga ʻo e ʻOtuá
Naʻe akoʻi ʻe Sīsū hono kau muimuí ke nau lotu: “Ko ʻemau Tamai ʻoku ʻi hēvani, ke fakamāʻoniʻoniʻi ho huafá. Ke hoko mai ho Puleʻangá. Ke fai ho finangaló, ʻo hangē ko ia ʻi hēvaní, ke pehē foki ʻi māmani.” (Mātiu 6:9, 10) Ko e hā ʻa e Puleʻanga ʻo e ʻOtuá? Ko e hā ʻa e meʻa ʻokú ne faí? Pea ko e hā ʻoku totonu ai ke tau lotu fekauʻaki mo iá?
Ko Sīsū ʻa e Tuʻi ʻi he Puleʻanga ʻo e ʻOtuá.
Luke 1:31-33: “Te ke fakahingoa ia ko Sīsū. ʻE hoko ʻa e tokotahá ni ko e lahi pea ʻe ui ia ko e ʻAlo ʻo e Fungani Māʻolungá, pea ko Sihova ko e ʻOtuá te ne ʻoange kiate ia ʻa e taloni ʻo Tēvita ko ʻene tamaí, pea te ne pule ko e Tuʻi ki he fale ʻo Sēkopé ʻo taʻengata, pea ko hono Puleʻangá ʻe ʻikai hano ngataʻanga.”
Ko e Puleʻangá ʻa e kaveinga tefito ʻo e malanga ʻa Sīsuú.
Mātiu 9:35: “Naʻe ʻalu takai holo ʻa Sīsū ʻi he kotoa ʻo e ngaahi kolo lalahí mo e fanga kiʻi kolo īkí, ʻo faiako ʻi honau ngaahi sinakoké mo malangaʻi ʻa e ongoongo lelei ʻo e Puleʻangá mo fakamoʻui ʻa e ngaahi mahaki kotoa pē mo e faingataʻaʻia kotoa pē.”
Naʻe ʻoange ʻe Sīsū ki heʻene kau ākongá ʻa e fakaʻilonga ke nau ʻiloʻi ai ʻa e taimi ʻe hoko mai ai ʻa e Puleʻangá.
Mātiu 24:7: “He ʻe tuʻu ʻa e fonua ki he fonua mo e puleʻanga ki he puleʻanga, pea ʻe ʻi ai ʻa e ngaahi nounou fakameʻatokoni mo e ngaahi mofuike ʻi he feituʻu ki he feituʻu.”
ʻOku malanga ʻa e kau ākonga ʻa Sīsuú ʻi he taimí ni ʻo fekauʻaki mo e Puleʻangá ʻi he kotoa ʻo e māmaní.
Mātiu 24:14: “Pea ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai ʻa e ngataʻangá.”