Founga ke Fakalotoʻi Ai ʻa e Niʻihi Kehé
1 Naʻe maʻu ʻe he ʻapositolo ko Paulá ʻa e ongoongo ʻo e hoko ko ha faifekau fakatupu fakalotoʻi. (Ng. 19:26) Naʻa mo Tuʻi ʻAkilipa naʻá ne tala ange kiate ia: “Kuo ke meimei fakahehemaʻi [“fakalotoʻi,” NW] au keu hoko koe Kalisitiane.” (Ng. 26:28, PM) Ko e hā naʻá ne ʻai ʻa e ngāue fakafaifekau ʻa Paulá ke mātuʻaki fakatupu fakalotoʻí? Naʻá ne fakaʻuhinga totonu mei he ngaahi Konga Tohitapú, ʻo fakafeʻunga ʻa ʻene ngaahi fakamatalá ki heʻene kau fanongó.—Ng. 28:23.
2 ʻI he faʻifaʻitaki kia Paulá, ʻoku toe fiemaʻu foki mo kitautolu ke tau hoko ʻo fakatupu fakalotoʻi ʻi heʻetau ngāue fakafaifekaú. Anga-fēfē? ʻAki hono ngāueʻaki ʻa e vavangá ʻi he taimi ʻo e talanoa mo e fanongo ki he niʻihi kehé. (Pal. 16:23) ʻOku ʻi ai ʻa e ngaahi sitepu mahuʻinga ʻe tolu ʻe tokoni kiate kitautolu ke lavaʻi ai ʻa e meʻá ni.
3 Fanongo Tokanga: ʻI he lea ʻa e tokotaha kehé, fanongo ki ha makatuʻunga ʻo e felotoí ʻa ia ʻe lava ke ke kamata mei ai. Kapau ʻokú ne langaʻi hake ha fakafepaki, feinga ke ʻiloʻi ʻa e ʻuhinga ʻoku tuʻu mei mui aí. ʻE tokoni ia ke ke ʻiloʻi ʻa e meʻa tofu pē ko ia ʻokú ne tui ki aí, ʻuhinga ʻokú ne tui ai ki aí, pea mo e meʻa ʻokú ne fakatuipauʻi ai ia ki aí. (Pal. 18:13) Fakapotopoto ʻi hono tohoakiʻi mai ʻa e anga ʻo ʻene fakakaukaú.
4 ʻEke ha Ngaahi Fehuʻi: Kapau ʻoku fakahaaʻi ʻe ha tokotaha ʻa e tui ki he Tolu-Tahaʻi-ʻOtuá, te ke ʻeke nai: “Naʻá ke tui maʻu pē ki he Tolu-Tahaʻi-ʻOtuá?” Hoko atu ʻaki: “Kuó ke fai ha ako fakaʻāuliliki ʻo e meʻa ʻoku leaʻaki ʻe he Tohitapú fekauʻaki mo e kaveingá?” Te ke toe ʻeke nai: “Kapau ko e ʻOtuá ko e konga ʻo ha Tolu-Tahaʻi-ʻOtua, ʻikai ʻe lava ke tau ʻamanekina ʻe lea mahino ʻaki ia ʻe he Tohitapú?” Ko e ngaahi tali te ke maʻú ʻe tokoni ia kiate koe ke ke fakaʻuhinga mo e tokotahá ʻi he meʻa ʻoku leaʻaki ʻe he ngaahi Konga Tohitapú.
5 Ngāueʻaki ha Fakaʻuhinga Lelei: Naʻe ʻeke ʻe ha Fakamoʻoni ki ha fefine ʻa ia naʻá ne tui ko Sīsū ʻa e ʻOtuá: ‘Kapau naʻá ke feinga ke fakatātaaʻi ha toko ua ʻokú na tatau, ko e hā nai ʻa e vahaʻangatae fakafāmili te ke ngāueʻakí?’ Naʻá ne tali mai: “Te u ngāueʻaki nai ha ongo tautehina.” Naʻá ne tānaki mai: “Mahalo pē ko ha ongo māhanga faitatau. Ka ʻi hono akoʻi kitautolu ke tau vakai ki he ʻOtuá ko e Tamaí pea ko iá ʻi he tuʻunga ko e ʻAló, ko e hā ʻa e pōpoaki naʻe ʻomai ʻe Sīsuú?” Naʻe maʻu ʻe he fefiné ʻa e poiní ʻa ia ko e tokotaha ʻoku lahi ange pea ʻokú ne maʻu ʻa e mafai lahi ange. (Mt. 20:23; Sione 14:28; 20:17) Ko hono ʻatamaí mo hono lotó naʻe aʻu ki ai ʻa e pōtoʻi ʻi he fakalotoʻí.
6 Ko e moʻoni, ʻoku ʻikai ke tali lelei ʻe he tokotaha kotoa pē ʻa e moʻoní, ʻo tatau ai pē pe ko e hā nai ʻa e moʻoni mo e totonu ʻo ʻetau lea kamata ʻoku faí. Kae hangē ko Paulá, ʻai ke tau tōtōivi ʻi hono kumi ʻa e faʻahinga loto-totonu ʻi hotau feituʻú, ʻo fakalotoʻi kinautolu ke nau tali ʻa e pōpoaki ʻo e Puleʻangá.—Ng. 19:8.