Fakatupu Tuipau ʻi Hoʻo Faiakó
1. Ko e hā ʻoku faʻa kau ki ai ʻa hono ngāueʻaki ola lelei ʻo e Folofola ʻa e ʻOtuá ʻi he ngāue fakafaifekaú?
1 Ko e kau faifekau ola leleí, hangē ko e ʻapositolo ko Paulá, ʻoku nau ʻiloʻi ko hono “tofa totonu ʻa e folofola ʻo e moʻoni” ʻoku kau ki ai ʻa e meʻa lahi ange ʻi he lave pē ki he Tohi Tapú. (2 Tim. 2:15) ʻI hono ngāueʻaki ʻo e Folofola ʻa e ʻOtuá, te tau ngāueʻaki fēfē nai ʻa e “fakatupu tuipau” ʻi heʻetau faiakó?—Ng. 28:23, NW.
2. ʻE lava fēfē ke tau ʻai ke lahi ʻa e houngaʻia ʻi he Folofola ʻa e ʻOtuá?
2 Tuku ke Lea ʻa e Folofola ʻa e ʻOtuá: ʻUluakí, fakahanga ʻa e tokangá ki he Tohi Tapú ʻi ha founga ʻoku fakatupunga ai ʻa e fakaʻapaʻapa ki he poto fakaʻotua ʻoku ʻi aí. Ko ʻetau tuipau ki he Folofola ʻa e ʻOtuá ʻe ueʻi nai ai ʻetau tokotaha fanongó ke tokanga lelei ki hono lau ʻo ha konga Tohi Tapu. (Hep. 4:12) ʻE lava ke tau pehē pē: “Kuó u ʻiloʻi ʻoku ʻaonga ke maʻu ʻa e fakakaukau ʻa e ʻOtuá ʻi he meʻá ni. Vakai angé ki he meʻa ʻoku fakahaaʻi ʻi heʻene Folofolá.” ʻI heʻene ala lavá, tuku ke lea ʻa e Folofola ʻa e ʻOtuá ʻaki ʻa e lau fakahangatonu mei ai.
3. Hili hono lau ha konga Tohi Tapu, ko e hā ʻe lava ke fai ke tokoniʻi ʻa ʻetau tokotaha fanongó ke ne mahinoʻi ʻa hono ʻuhingá?
3 Uá, fakamatalaʻi ʻa e konga Tohi Tapu naʻe ngāueʻakí. ʻOku faingataʻa ki he kakai tokolahi ke nau mahinoʻi ha veesi ʻi he ʻuluaki taimi ʻoku lau aí. ʻOku faʻa fiemaʻu ha fakamatala ke fakahaaʻi ʻa ʻene kaungatonú. (Luke 24:26, 27) Fakamamafaʻi ʻa e ngaahi poini tefitó. ʻE tokoni nai ha fehuʻi ke fakapapauʻi ai ʻoku mahinoʻi lelei ʻa e poiní.—Pal. 20:5; Ng. 8:30.
4. Ko e hā ʻa e sitepu fakaʻosi ʻoku fiemaʻu ke hoko ai ʻo fakatupu tuipau ʻi heʻetau faiakó?
4 Fakaʻuhinga mei he Tohi Tapú: Tolú, feinga ke aʻu ki he ʻatamaí mo e lotó. Tokoniʻi ʻa e tokotaha-ʻapí ke sio ki he anga ʻo e kaunga fakafoʻituitui kiate ia ʻa e vēsí. Ko e fakaʻuhinga mei he Tohi Tapú ʻe lava ke fakatupu tuipau ai ki ha tokotaha ke liliu ʻene fakakaukaú. (Ng. 17:2-4; 19:8) Ko e fakatātaá, hili hono lau ʻa e Sāme 83:18 ʻe lava ke tau fakaʻuhinga ki he mahuʻinga ʻa hono ʻiloʻi ʻa e hingoa ʻo ha taha ki hono kamata ha vahaʻangatae fakafoʻituitui. ʻEke ange leva, “ʻOkú ke pehē ko hono ʻiloʻi ʻa e huafa ʻo e ʻOtuá ʻe ʻai ke mohu ʻuhinga ange ai ʻa hoʻo lotú?” Ko hono fakafehokotaki ʻa e konga Tohi Tapú ʻi he foungá ni ki he moʻui fakafoʻituitui ʻa e tokotaha-ʻapí ʻoku fakahaaʻi ai ʻa ʻene ʻaonga moʻoní. Ko e faiako fakatupu tuipau pehē mei he Folofola ʻa e ʻOtuá ʻoku tohoakiʻi mai ai ʻa e faʻahinga loto-totonú ke nau lotu ki he ʻOtua moʻoni mo moʻui ko Sihová.—Sel. 10:10.