ʻOua ʻe Holomui!
1 ʻI heʻetau teuteu ke ʻalu atu ʻi he malanga mei he matapā ki he matapaá, ko e fakafaingataʻaʻiaʻanga lahi taha ʻoku tau fetaulaki nai mo iá ko kitautolu tonu. Ko e ongoʻi ʻo e taʻefeʻungá te ne fakaholomuiʻi nai kitautolu mei he ʻalu atu ke leaʻaki ʻa e moʻoní ki he “kakai kotoa pe.” (1 Tim. 2:4) Ka ʻoku totonu ke ʻoua te tau ongoʻi toumoua ke malangaʻi ʻa e ongoongo leleí. Ko e hā ʻoku ʻikai totonu ai ke peheé?
2 Ko e Pōpoaki Ia ʻa Sihova: Kuo ʻomai ʻe Sihova ʻene folofolá ʻo fakafou mai ʻi he Tohitapú. ʻI he taimi ʻoku tau ʻave ai ʻa e pōpoaki ko ʻení ki he niʻihi kehé, ʻoku tau ʻoatu ai ʻene ngaahi fakakaukaú, kae ʻikai ko haʻatautolú. (Loma 10:13-15) ʻI he taimi ʻoku talitekeʻi ai ʻe ha faʻahinga tāutaha ʻa e pōpoaki ʻo e Puleʻangá, ʻoku nau talitekeʻi moʻoni ʻa Sihova. Kae kehe, ʻoku ʻikai te tau loto-siʻi ai. ʻOku tau tuipau ko e pōpoaki ko ʻení te ne ueʻi ha tali ʻoku leleí ʻi he loto ʻo e faʻahinga ʻoku nau fakaʻamu ki ha liliu ʻi he ngaahi tuʻunga ʻo e māmaní pea ʻoku nau tokanga ki heʻenau fiemaʻu fakalaumālié.—Isi. 9:4; Mt. 5:3, 6.
3 ʻOku Tohoakiʻi ʻe Sihova ʻa e Kakaí: Ko ha tokotaha naʻe fakafisi ke fanongo kiate kitautolu ʻi he kuohilí, te ne tali nai he taimí ni koeʻuhi kuo liliu hono ngaahi tuʻungá pea kuo fakavaivai hifo ʻa e tuʻunga ʻo hono lotó. ʻE fakahaaʻi nai heni ʻe Sihova ʻa ʻene loto-lelei ki he tokotaha ko iá pea ‘tohoaki [mai] ia.’ (Sione 6:44, 65) ʻI he taimi ʻoku hoko ai ʻení, ʻoku fiemaʻu ke tau mateuteu ke ngāueʻaki kitautolu ʻe Sihova pea moʻulaloa ki he fakahinohino fakaeʻāngeló ʻi hono kumi ʻa e faʻahinga peheé.—Fkh. 14:6.
4 ʻOku Foaki Mai ʻe he ʻOtuá Hono Laumālié Kiate Kitautolu: ʻOku fakaivia kitautolu ʻe he laumālie māʻoniʻoní ke tau lea “loto-toʻa ʻi he mafai ʻo Sihová.” (Ng. 14:1-3, NW) Ko hono manatuʻi ʻoku tau maʻu ʻa e poupou mālohi ko ʻení ʻi heʻetau ngāue fakafaifekaú, ʻe ʻikai ai te tau toumoua ke leaʻaki ʻa e moʻoní ki he ngaahi kaungāʻapí, kaungāngāué, kaungāakó, ngaahi kāingá pe ki he kakai ako lelei pe tuʻumālié.
5 ʻOku Akoʻi Mai ʻe Sīsū ʻa e Foungá: Naʻe ngāueʻaki ʻe Sīsū ʻa e ngaahi fehuʻi fakatupu fakakaukau, ngaahi fakatātā moʻoni pea mo e fakaʻuhinga Fakatohitapu. Naʻá ne fakamatalaʻi ʻa e moʻoní ʻi ha founga faingofua, mo fakamānako mei hono lotó. ʻOku kei hoko ʻeni ko e ngaahi founga lelei taha ʻi he ʻaho ní. (1 Kol. 4:17) ʻOku kehekehe nai ʻa e ngaahi ātakai ʻoku tau malanga aí, ka ko e pōpoaki mālohi ʻo e Puleʻangá ʻoku kei tatau ai pē.
6 ʻOku tau monūʻia ke ngāueʻaki kitautolu ʻe Sihova ke tokoniʻi ʻa e kakaí ʻi ha founga makehe mo mātuʻaki mahuʻinga. ʻAi ke ʻoua te tau holomui! ʻOfa ke tau loto-toʻa pea fakaʻatā ʻa Sihova ke ne “fakaava mai . . . ha matapa moʻo e folofola” koeʻuhí ke tau lava ai ʻo leaʻaki ʻa e ongoongo leleí ki he niʻihi kehé.—Kol. 4:2-4.