“Malanga Kakato ʻAki ʻa e Folofola ʻa e ʻOtuá”
1 ʻI he taimi ʻokú ke houngaʻia loto-moʻoni ai ʻi hono maʻu ha meʻa lelei, ʻikai ʻokú ke fakahā ia ʻaki hoʻo fakakaukaú mo e ngaahi ngāué? Ko e moʻoni te ke fai pehē! ʻI he fekauʻaki mo e anga-lelei mo e ʻaloʻofa ʻoku fakaaʻu mai ʻe Sihova ki he faʻahinga ʻo e tangatá, fakatokangaʻi ʻa e anga ʻo e tali ki ai ʻa e ʻapositolo ko Paulá. Naʻá ne kalanga: “Fakafetaʻi ki he ʻOtuá ʻi heʻene meʻaʻofa taʻetotongi taʻealafakamatalaʻí”! Ko e hā ʻoku kau ki he “meʻaʻofa taʻetotongi” ko iá? Ko e kotoa ʻo e “ʻofa maʻataʻatā lahi fau ʻa e ʻOtuá” ʻa ia kuo fakahā mai kia kitautolú, ko e fakahāhā lahi taha ʻo iá ko e meʻaʻofa ko hono ʻAló tonu ʻi he tuʻunga ko ha huhuʻi ki heʻetau ngaahi angahalá.—2 Kol. 9:14, 15, NW; Sione 3:16.
2 Ko e kupuʻi lea fakamālō ʻa Paulá ko ha ngaahi foʻi lea tala ngutu pē? ʻIkai ʻaupito! ʻI he ngaahi founga lahi, naʻá ne fakahaaʻi ʻene houngaʻia lolotó. Naʻá ne tokanga lahi ʻaupito fekauʻaki mo e lelei fakalaumālie ʻa hono kaungā Kalisitiané peá ne loto ke fai ʻa e meʻa te ne malavá ke tokoniʻi kinautolu ke nau maʻu ʻaonga kakato mei he ʻaloʻofa ʻa e ʻOtuá. ʻI he fekauʻaki mo e faʻahinga peheé, naʻe pehē ʻe Paula: “I he e mau tokaga ofa kiate kimoutolu, naa mau loto ke atu kiate kimoutolu, ikai koe ogoogolelei oe Otua be, ka koe mau moui foki, koeuhi koe ofeina lahi akimoutolu kiate kimautolu.” (1 Tes. 2:8, PM) ʻI he tānaki atu ki hono tokoniʻi ʻa e faʻahinga kuo nau ʻosi hoko ko e konga ʻo e fakatahaʻangá ke maluʻi honau fakamoʻuí, naʻe malangaʻi taʻehelaʻia ʻe Paula ʻa e ongoongo leleí, ʻo fononga ʻi ha ngaahi lau afeʻi maile ʻi ʻuta mo tahi ke kumi ʻa e faʻahinga ʻoku “hehema totonu ki he moʻui taʻengatá.” (Ng. 13:48, NW) Ko e houngaʻia loloto ʻa Paula ʻi he meʻa kotoa kuo fai ʻe Sihova maʻaná naʻe ueʻi ai ia “ke malanga kakato ʻaki ʻa e folofola ʻa e ʻOtuá.”—Kol. 1:25, NW.
3 ʻIkai ʻoku ueʻi kitautolu ʻe heʻetau houngaʻia ki he meʻa kotoa kuo fai ʻe Sihova maʻatautolú ke tau fai ha tokoni fakalaumālie ki he faʻahinga ʻoku nau fiemaʻu tokoni ʻi heʻetau fakatahaʻangá? (Kal. 6:10) Pea ʻikai ʻoku ueʻi kitautolu ke tau kau kakato ʻi he lahi taha ʻo ʻetau malavá ki hono malangaʻi ʻa e ongoongo lelei ʻo e Puleʻangá ʻi he kotoa ʻo hotau feituʻu ngāué?—Mt. 24:14.
4 Ko ha Faingamālie ke Fakahaaʻi Ai ʻa e Houngaʻiá: ʻI he taʻu taki taha ko e Fakamanatu ʻo e pekia ʻa Kalaisí ʻoku ʻomai ai kia kitautolu ha faingamālie makehe ke fakahaaʻi ai ʻetau houngaʻiá ki he meʻa kuo fai maʻatautolu ʻe Sihova mo Sīsuú. ʻOku ʻikai ko ha fakataha pē ʻeni ʻe taha pe ko hano fakamanatu pē ʻo ha meʻa naʻe hoko. Naʻe pehē ʻe Sīsū: “Fai eni i he fakamanatu kiate au.” (Luke 22:19, PM) Ko e Fakamanatu ʻo e pekia ʻa Kalaisí ko ha kātoanga ia ke tau manatuʻi ai pe ko e tokotaha fēfē ʻa Sīsū. Ko ha taimi ia ke ʻiloʻi ai ʻokú ne moʻui mo longomoʻui he ʻahó ni, fakataha mo e lāngilangi pea mo e tuʻunga-tuʻi kuo foaki kiate ia ʻi heʻene ʻalunga moʻui mo e feilaulau loto-tōnungá. Ko e kātoanga ko ʻení ko ha toe faingamālie ia ke fakahaaʻi ai ʻetau moʻulaloa ki he tuʻunga-ʻulu ʻo Kalaisí ʻi heʻene tataki ʻa e ngaahi meʻá pea mo e ngaahi ngāue ʻa e fakatahaʻanga Kalisitiané. (Kol. 1:17-20) Ko e kotoa ʻo e kakai ʻa e ʻOtuá ʻoku totonu ke nau fakahā ʻa e fakaʻapaʻapa ʻo ʻi ai ki he Fakamanatu ʻo e pekia ʻa Kalaisí. ʻI he taʻú ni ʻe fai ia ʻi he hili e tō ʻa e laʻaá ʻi he Tuʻapulelulu, Maʻasi 28, 2002.
5 ʻI hono fai ha feinga tōtōivi ki muʻa ʻi he kātoanga ʻo e Fakamanatu ʻo e taʻu kuo ʻosí, naʻa tau maʻu ai ha kau maʻu fakamanatu ʻe toko 480 ʻi he ʻotu motu ʻo Tongá. ʻE toko fiha ʻa e kau fakamanatu ʻo e taʻu ní? Ko e meʻa lahí ʻe fakatuʻunga ia ʻi heʻetau ‘gaue mo kataki,’ ʻi hono tokoniʻi ʻa e tokolahi taha ʻe malavá ke nau haʻu ki ai.—1 Tim. 4:10, PM.
6 Tānaki atu ki hono maʻu ʻa e Kai Efiafi ʻa e ʻEikí, te tau malava nai ke fakalahi ʻetau ngāue ʻi he malaʻe ngāué. ʻOku ʻikai ha veiveiua, ko e laui afe tokolahi ʻo e fanga tokouá mo e fanga tuofāfiné te nau tāimuʻa tokoni ʻi he māhina ʻe taha pe lahi ange. ʻI he ngaahi taʻu ki muí ni maí, naʻa tau fiefia ai ʻi he tokolahi ʻi heʻetau ngaahi fakatahaʻangá naʻa nau feinga ke tāimuʻa tokoni he lolotonga ʻo e faʻahitaʻu Fakamanatú, ʻi Maʻasi ʻo aʻu ki Mē. ʻE lava ke ke fokotuʻutuʻu hoʻo ngaahi meʻá ka ke maʻu ʻa e faingamālie ʻo e ngāue tāimuʻa tokoni ʻi he taʻu ní? ʻE hoko ia ko ha founga lelei ke fakahaaʻi ai hoʻo houngaʻia loto-moʻoni ki he tokonaki anga-ʻofa ʻa e ʻOtuá ko e feilaulau ʻa Kalaisí. ʻE lava ke ke fakapapauʻi ʻa e tāpuaki ʻa Sihová, ʻo hangē ko ia ʻoku fakahaaʻi ʻe he ngaahi meʻa hoko mai naʻe hokosiá.
7 Ko ha tuofefine naʻe ngāue fakamāmani taimi-kakato naʻá ne tohi ʻo fekauʻaki mo e meʻa naʻá ne hokosia ʻi heʻene ngāue tāimuʻa tokoni ʻi Maʻasi taʻu kuo ʻosí: “Naʻe fakalototoʻaʻi ʻe he ʻEtau Ngāue Fakafaifekau ʻo e Puleʻanga ʻo Fepueli 2001 ʻa e tokotaha kotoa pē ʻoku fakaʻatā ʻe hono ngaahi tuʻungá ke tāimuʻa tokoni he lolotonga ʻo e faʻahitaʻu Fakamanatú. Koeʻuhi naʻe ʻi ai ʻa e Tokonaki ʻe nima ʻi Maʻasi, naʻe feʻungamālie lelei ʻeni mo ʻeku taimi-tēpilé. Ko ia, naʻá ku fakakaukau ke fakahū ʻeku tohi kolé.” ʻI heʻene kamata ʻi he māhiná, naʻá ne fokotuʻu ha taumuʻa kiate ia ko e feinga ke kamata ha ako Tohitapu ʻi ʻapi. Naʻá ne lavameʻa? ʻIo, ʻi he houa hono 52 ʻo ʻene faifakamoʻoni ʻi he māhina ko iá! Ko e hā ʻa ʻene fakamulitukú? “ʻOku ʻi ai ʻa e ngaahi tāpuaki fakaofo ʻi he taimi ʻoku tau fai ai ha feinga makehé.”
8 Ko e hā ʻa e ngaahi ʻaonga ki ha fāmili ʻa ia naʻa nau tāimuʻa fakataha? Ko ha fāmili ʻo ha toko fā naʻa nau fai pehē ʻi ʻEpeleli taʻu kuo ʻosí naʻa nau ʻilo ko ha māhina ia ʻe manatuʻi maʻu pē. Naʻe pehē ʻe he faʻeé: “He fakakaukau fakafiefia ē naʻa mau maʻú ʻi he ʻaho taki taha, koeʻuhí naʻa mau fāʻūtaha ʻi he ngāue fakafaifekaú! Ko e fetalanoaʻaki ʻi heʻemau ngaahi ngāue fakaʻaho ʻi he ngāue fakamalangá naʻe ʻai ai ʻemau taimi kai efiafí ʻo mātuʻaki fakafiefia.” Naʻe pehē ʻe he fohá: “Naʻá ku fiefia ʻi he ngāue he malaʻe ngāué fakataha mo e tangataʻeikí he lolotonga ʻo e uiké, ʻa ia ʻokú ne anga-maheni ʻaki ʻa ʻene ngāue fakamāmaní.” Naʻe tānaki mai ʻe he tamaí: “ʻI he tuʻunga ko e ʻulu ʻo e fāmilí, naʻá ku ongoʻi fiemālie ʻi he ʻiloʻi naʻa mau ngāue fakataha ʻi he ngāue mahuʻinga lahi taha ʻi hotau taimí.” ʻE lava ke tāimuʻa fakataha ho fāmilí? Ko e hā ʻoku ʻikai ai ke fai ha fetalanoaʻaki fakafāmili pea vakaiʻi pe ʻoku malava ʻa ho fāmilí kotoa ke tāimuʻa tokoni he lolotonga ʻo e faʻahitaʻu Fakamanatu ko ʻení?
9 ʻE Lava Ke Tau ʻAi ʻa Maʻasi ko Hotau Māhina Lelei Tahá Ia? ʻI he kamataʻanga ʻo e 2000, naʻe ʻomai ai ʻi he ʻEtau Ngāue Fakafaifekau ʻo e Puleʻanga ʻa e fehuʻi: “ʻE Lava Ke Tau ʻAi ʻa ʻEpeleli 2000 ko Hotau Māhina Lelei Tahá Ia?” Ko e hā ʻa e talí? ʻI māmani lahi, naʻe aʻusia ai ha ngaahi tumutumu foʻou lahi. ʻOkú ke manatuʻi ʻa e loto-māfana naʻe hoko ʻi hoʻo fakatahaʻangá ʻi he mapuna hake ʻa e ngāue fakalaumālie he lolotonga ʻo e māhina makehe ko iá? ʻE lava ke tau fakatatau, pe naʻa mo hono ʻai ke laka ange ʻi he ngaahi meʻa ko ia naʻe lavaʻí ʻi he taʻú ni? ʻI ha feinga fakataha kotoa, ʻe lava ke hoko ai ʻa Maʻasi 2002 ko “Hotau Māhina Lelei Tahá.” Ko e hā ʻoku fili ai ʻa Maʻasí?
10 ʻOku ʻi ai ʻa e ʻuhinga ʻe ua ʻoku totonu ke hoko ai ʻa Maʻasi ko ha māhina makehe ʻo e ngāué. ʻUluakí, ʻe fai ʻa e Fakamanatú ʻi he ofi ki he ngataʻanga ʻo Maʻasí, ʻo ʻomai ai kia kitautolu ha faingamālie feʻunga ʻānoa ʻi he kamataʻanga ʻo e māhiná ke fakaafeʻi ʻa e tokolahi taha ʻe malavá ke nau haʻu ki ai. Uá, ko Maʻasi ʻo e taʻu ní ʻoku ʻi ai ʻa e fakaʻosinga ʻo e uike kakato ʻe nima, ʻo ʻai ai ke faingofua ke tāimuʻa tokoni ʻa e faʻahinga ʻoku nau ngāue fakamāmaní pe ʻoku nau kei akó. Ko e hā ʻoku ʻikai te ke tangutu hifo ai he taimí ni pea fokotuʻutuʻu ha taimi-tēpile ʻe ala ngāueʻí, ʻo ngāueʻaki ʻa e tohi māhina kuo tokonaki mai ʻi he fakalahi ko ʻení? ʻE faingofua ange nai ai ʻa e ngāue tāimuʻá ʻi he meʻa ʻokú ke fakakaukau atu ki aí. Ko e fakatātaá, ʻi hono fakataimitēpileʻi ha houa ʻe 8 ʻo e malaʻe ngāué ʻi he fakaʻosinga ʻo e uike ʻe nima taki taha, te ke fiemaʻu ai ke fakataimitēpileʻi ha toe houa ʻe 10 pē he lolotonga ʻo e toenga ʻo e māhiná ke aʻu ai ki he houa ʻe 50 ʻoku fiemaʻú.
11 Ko e hā ʻe lava ke fai ʻe he kau mātuʻá ke tokoniʻi ai ʻa e tokotaha kotoa pē ʻi he fakatahaʻangá ke “malanga kakato ʻaki ʻa e folofola ʻa e ʻOtuá”? Langa hake ʻa e loto-māfaná fakafou ʻi he ngaahi konga ʻo e fakatahá mo e ngaahi fetalanoaʻaki fakafoʻituituí. Ko e kau faiakó mo honau kau tokoni ʻi he Ako Tohi ʻa e Fakatahaʻangá ʻe lava ke nau tomuʻa talanoa mo e tokotaha taki taha kuo vaheʻi ki heʻenau kulupú pea fai ha tokoni fakafoʻituitui. Ko ha ngaahi foʻi lea anga-ʻofa siʻisiʻi ʻo ha fakalototoʻa pe ko ha ngaahi fokotuʻu ʻaonga ko e meʻa nai pē ia ʻoku fiemaʻú. (Pal. 25:11) ʻE fakapapauʻi ʻe ha tokolahi ko ha ngaahi feʻunuʻaki siʻisiʻi nai ʻi heʻenau taimi-tēpilé, ʻe lava ke nau maʻu ai ʻa e monū ʻo e ngāue ko ha kau tāimuʻa tokoní. ʻI he ngaahi fakatahaʻanga lahi, ko e tokolahi tahá, kapau ʻoku ʻikai ko e kotoa, ʻo e kau mātuʻá mo e kau sevāniti fakafaifekaú pea mo honau ngaahi uaifí ʻoku nau fokotuʻu ha faʻifaʻitakiʻanga lelei ʻaki ʻenau ngāue tāimuʻa tokoni fakataha he lolotonga ʻo e faʻahitaʻu Fakamanatú. Kuo fakalototoʻaʻi ai heni ha kau malanga tokolahi ke nau kau fakataha mo kinautolu. Koeʻuhi ko ha ngaahi fakangatangata fakaesino pe ko ha ngaahi tuʻunga kehe, ʻe ʻikai malava nai ai ha kau malanga ʻe niʻihi ke tāimuʻa, ka ʻe lava ke fakalototoʻaʻi kinautolu ke nau fakahāhā ʻenau houngaʻiá ʻaki hono fai ʻa e lahi taha te nau malavá ʻi he ngāue fakafaifekaú fakataha mo e toenga ʻo e fakatahaʻangá.
12 ʻOku fakatuʻunga ʻa e lavameʻá ʻi he fokotuʻutuʻu lelei ʻi he tafaʻaki ʻa e kau mātuʻá. Ko e ngaahi fakataha ki he malaʻe ngāué ʻoku totonu ke fakataimitēpileʻi ia ʻi he ngaahi taimi feʻungamālie ʻi he uiké kotoa. Kapau ʻe malava, ʻe vaheʻi ki muʻa ʻe he ʻovasia ngāué ha fanga tokoua taau ke nau tataki ʻa e ngaahi fakataha kotoa pē ki he ngāue fakamalangá. ʻE fiemaʻu ha teuteu lelei koeʻuhi ke ʻoua naʻa laka ʻa e ngaahi fakataha ko ʻení ʻi he miniti ʻe 10 ki he 15, kau ai ʻa hono fokotuʻutuʻu ʻo e ngaahi kulupú, vaheʻi ʻa e feituʻu ngāué, pea mo hono fai ʻo ha lotu. (Sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Sepitema 2001.) Ko ha taimi-tēpile ʻo e ngāue ki he māhiná ʻoku totonu ke fakamatalaʻi mahino ia ki he fakatahaʻangá pea fokotuʻu ia ʻi he papa fakahinohinó.
13 ʻOku totonu ke ʻai ke ala maʻu ha feituʻu ngāue feʻunga. ʻOku totonu ke fakataha ʻa e ʻovasia ngāué mo e tokoua ʻokú ne tokangaʻi ʻa e ngaahi feituʻu ngāué ke fai ha ngaahi fokotuʻutuʻu ki hano ngāueʻi ʻa e ngaahi feituʻu naʻe ʻikai ke tuʻo lahi hono ngāueʻí. ʻOku totonu ke fai ʻa e fakamamafá ki hono ngāueʻi ʻa e ngaahi ʻikai-ʻi-ʻapí, faifakamoʻoni ʻi he ngaahi halá pea mei he falekoloa ki he falekoloá, pea mo hono fai ʻa e fakamoʻoni he efiafí. ʻI heʻene feʻungamālié, ʻe tokoniʻi nai ha kau malanga ʻe niʻihi ke nau faifakamoʻoni ʻi he telefoní.
14 Tokoniʻi Kinautolu Ke Nau Toe Ngāue: ʻOku ʻi ai ha niʻihi ʻi he feituʻu ngāue ʻi hoʻo fakatahaʻangá ʻoku ʻikai ke kei longomoʻui ʻi hono malangaʻi ʻa e ongoongo leleí? Ko e faʻahinga peheé ʻoku nau kei hoko pē ko e konga ʻo e fakatahaʻangá pea ʻoku fiemaʻu kia kinautolu ha tokoni. (Sāme 119:176) Koeʻuhi ʻoku fuʻu ofi ʻa e ngataʻanga ʻo e māmani motuʻá ni pea ʻoku tuʻu mai pē mei muʻa ʻa e māmani foʻoú, ʻoku tau maʻu ʻa e ʻuhinga lelei ke tau fai ʻa e feinga kotoa pē ke tokoniʻi ʻa e faʻahinga kuo nau hoko ʻo ʻikai longomoʻuí. (Loma 13:11, 12) Ko e hā ʻe lava ke tau fai ke tokoniʻi ha faʻahinga tokolahi ange ke toe langaʻi ʻenau ʻofa mo e loto-maʻu naʻa nau maʻu ʻi he kamatá?—Hep. 3:12-14.
15 ʻE fiemaʻu ke lāulea ʻa e kulupu ʻo e kau mātuʻá ki he founga te nau lava ai ke tokoniʻi ʻa e faʻahinga kuo nau hoko ʻo ʻikai longomoʻui he lolotonga ʻo e ngaahi taʻu siʻi kuohilí. (Mt. 18:12-14) ʻOku totonu ke vakaiʻi ʻe he sekelitalí ʻa e ngaahi kaati Congregation’s Publisher Record pea fakaʻilongaʻi ʻa e faʻahinga kotoa kuo nau hoko ʻo ʻikai longomoʻuí. ʻOku totonu ke fai ha feinga makehe fakafou ʻi he fokotuʻutuʻu ʻo e ʻaʻahi fakatauhisipí ke fai ai ha tokoni. ʻE fiemaʻu nai ʻe ha tokotaha mātuʻa ke ne ʻaʻahi ki ha tokotaha malanga pau koeʻuhi ko haʻane maheni mo feohi ki muʻa mo e tokotaha ko iá, pe ʻe kole nai ha kau malanga kehe ke tokoni. Mahalo pē naʻa nau ako mo ha taha ʻoku ʻikai ke longomoʻui he taimí ni pea te nau talitali lelei ʻa e faingamālie ke hoko ai ʻo tokoni makehe ʻi he taimi ko ʻeni ʻo e fiemaʻú. Fakatauange, ʻe ueʻi ʻa e tokolahi ʻo e faʻahinga kuo nau hoko ʻo ʻikai longomoʻuí ke nau toe kamata ke malangaʻi ʻa e folofola ʻa e ʻOtuá. Kapau ʻoku nau taau, ʻoku ʻikai ha toe taimi lelei ange kia kinautolu ke kamata ai ka ko e lolotonga ʻo e faʻahitaʻu Fakamanatú!—Sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Nōvema 2000 ki ha fakaikiiki lahi ange.
16 ʻOku Taau ha Niʻihi ke Malanga? ʻOku hokohoko atu ʻa hono tāpuakiʻi ʻe Sihova ʻa hono kakaí ʻaki hono ʻomai “ʻa e ngaahi meʻa manakoá mei he puleʻanga kotoa pē.” (Hak. 2:7, NW) ʻI he taʻu taki taha, ʻoku taau ai ʻa e laui afe ke hoko ko e kau malanga teʻeki papitaiso. Ko hai ʻa kinautolu? Ko e fānau ʻa e Kau Fakamoʻoni ʻa Sihová pea pehē ki he kau ako Tohitapu fakalakalaká. ʻOku anga-fēfē ʻetau ʻiloʻi ʻoku nau taau ke hoko ko e kau malanga ʻo e ongoongo leleí?
17 Fānau ʻa e Kau Fakamoʻoni ʻa Sihová: Ko e fānau tokolahi kuo nau ʻalu fakataha mo ʻenau ngaahi mātuʻá mei he fale ki he falé ʻi ha ngaahi taʻu, neongo ʻoku teʻeki ke nau ngāue ko ha kau malanga teʻeki papitaiso. Ko Maʻasi ko ha taimi lelei nai ia ke nau kamata aí. ʻOku anga-fēfē hoʻo ʻiloʻi pe ʻoku taau ʻa hoʻo kiʻi tamá? ʻI he peesi 100 ʻo e Organized to Accomplish Our Ministry ʻoku pehē ai “ʻi he taimi ʻoku alafaʻifaʻitakiʻanga ai ʻa e kiʻi tamá ʻi hono ʻulungāngá pea ʻoku malava ke ne fakahaaʻi fakafoʻituitui ʻa ʻene tuí ʻaki ʻa e lea ki he niʻihi kehé ʻo fekauʻaki mo e ongoongo leleí, ʻo ueʻi mei hono lotó ke fai pehē.” Kapau ʻokú ke fakakaukau ʻoku taau ʻa hoʻo kiʻi tamá, lea ki ha taha ʻo e kau mātuʻa ʻi he Kōmiti Ngāue ʻa e Fakatahaʻangá.
18 Kau Ako Tohitapu Taau: ʻI he hili ʻa hono maʻu ʻe ha tokotaha ako Tohitapu ʻa e ʻiló pea maʻu ʻa e ngaahi fakatahá ʻi ha vahaʻa taimi, te ne loto nai ke hoko ko ha tokotaha malanga ʻo e Puleʻangá. Kapau ʻokú ke ako mo ha tokotaha ako pehē, fakakaukau ki he ngaahi fehuʻi ko ʻení: ʻOkú ne fai ha fakalakalaka, ʻo fakatatau ki hono taʻumotuʻá mo ʻene malavá? Kuó ne kamata ke vahevahe ʻa ʻene tuí ʻi ha founga ʻikai anga-maheni ki he niʻihi kehé? ʻOkú ne ʻai “ʻa e tangata foʻou?” (Kol. 3:10) ʻOkú ne aʻusia ʻa e ngaahi tuʻunga taau ki he kau malanga teʻeki papitaisó, ʻa ia ʻoku ʻomai ʻi he peesi 97-99 ʻi he tohi Our Ministry? Kapau ko ia, ʻoku totonu ke ke fetuʻutaki ki he Kōmiti Ngāue ʻa e Fakatahaʻangá koeʻuhi ke lava ʻo fai ha ngaahi fokotuʻutuʻu ki ha mātuʻa ʻe toko ua ke fakataha mo koe pea mo e tokotaha akó. Kapau ʻokú ne taau, ʻe fakahā ange ʻe he mātuʻa ʻe toko uá kiate ia ʻe lava ke ne kamata kau ki he ngāue fakamalanga ki he kakaí.
19 Fēfē ʻa ʻEpeleli mo Mē? Ko e toe ongo māhina makehe ʻeni ki hono fakalahi ʻa e ngāue ʻi he malaʻe fakafaifekaú. Ko e tokolahi ʻoku tāimuʻa tokoni ʻi Maʻasí ʻe lava ke nau toe fai pehē nai ʻi ʻEpeleli mo/pe ko Mē. ʻI he lolotonga ʻo ʻEpeleli mo Meé, te tau fakamuʻomuʻa ai ʻa hono tuʻuaki ʻo e ngaahi makasini Taua Leʻo mo e ʻĀ Hake! ʻi he ngāue fakafaifekaú. Ko ha ngaahi ola ʻaonga ē ʻoku nau ʻai ki he moʻui ʻa e faʻahinga ʻoku nau lau kinautolú! Kuo fakahoko ʻe he ngaahi makasini ko ʻení ha ngafa lahi ʻi hono maʻu ʻa e tupu fakaofo kuo hokosia ʻi māmani lahí. ʻE fai ha feinga makehe he lolotonga ʻo ʻEpeleli mo Meé ke tuʻuaki ʻa e ngaahi makasiní ki he kakai tokolahi taha ʻe malavá. Palani he taimí ni ke kau kakato ki ai.
20 ʻI he palani ke fakalahi ʻa e ngāue fakamalangá, ʻokú ke loto ke fakalahi ʻa e lahi ʻo e ngaahi makasini kuó ke maʻu fakafou mai ʻi he fakatahaʻangá? ʻI he taʻu fakangāué kotoa, te tau tuʻuaki ai ʻa e Taua Leʻo mo e ʻĀ Hake! ʻi he Tokonaki taki taha, ʻa hotau ʻAho Makasini kuo ʻosi vaheʻí. Kae kehe, koeʻuhi ko e tokolahi te nau kau ki he ngāue tāimuʻa tokoní pea ko kitautolu kotoa te tau tuʻuaki ʻa e ngaahi makasiní ʻi he ongo māhiná kakato, ʻe fiemaʻu nai ke fakalahi ʻetau ʻota makasini ʻi he fakatahaʻangá. Kapau ko ia, kātaki ʻo fakahā ki he sevāniti makasini ʻi hoʻo fakatahaʻangá ʻi he vave tahá. ʻI he taimi tatau, ʻoku totonu ke fakapapauʻi ʻe he sevāniti ki he tohí ʻoku ala maʻu ha tatau feʻunga ʻo e tuleki ko e Te Ke Saiʻia ke ʻIlo Lahi Ange ki he Tohitapú? ke ngāueʻaki ʻe he tokotaha kotoa.
21 Kuo fakahaaʻi ʻe he tokolahi ʻa e houngaʻia ʻi he tuʻuaki ʻi he ʻEtau Ngāue Fakafaifekaú ʻa ia ʻoku fakakaveinga ko e “Meʻa ke Leaʻaki Fekauʻaki mo e Ngaahi Makasiní.” ʻOkú ke ngāueʻaongaʻaki ʻa e fokotuʻutuʻu ko ʻení ʻaki hono ako ʻa e ngaahi sīpinga tuʻuaki makasiní? Ko e hā ʻoku ʻikai ai te ke ngāueʻaki ha konga ʻo hoʻo ako Tohitapu fakafāmilí ʻi he uike taki taha ke ʻahiʻahiʻi ai ʻa e ngaahi tuʻuaki ko ʻení?
22 Ngāueleleiʻaki ʻa e Faʻahitaʻu Fakamanatu ko ʻEní: Hangē ko e ʻapositolo ko Paulá, tau fakahaaʻi kia Sihova ʻa e lahi ʻo ʻetau houngaʻia ki “heʻene meʻaʻofa taʻetotongi taʻealafakamatalaʻí” ʻaki ʻetau kau kakato ki he ngaahi ngāue fakalaumālie kuo ʻosi fokotuʻutuʻu ki he faʻahitaʻu Fakamanatu ko ʻení. ʻOku kau heni (1) ʻa hono maʻu ʻa e kātoanga mahuʻinga taha ʻo e taʻú, ko e kātoangaʻi ʻa e Kai Efiafi ʻa e ʻEikí ʻi he Tuʻapulelulu, Maʻasi 28, 2002; (2) tokoniʻi ʻa e faʻahinga kuo nau hoko ʻo ʻikai longomoʻuí ke toe langaʻi hake ʻenau “ʻuluaki ʻofa” (Fkh. 2:4; Loma 12:11); (3) tokoniʻi ʻetau fānaú pea mo ha kau ako Tohitapu pē ʻoku tāú ke hoko ko e kau malanga teʻeki papitaiso; pea (4) kau ki he ngāue fakaʻevangelioó ʻi he kakato taha ʻe malavá, naʻa mo e ngāue tāimuʻa ʻi Maʻasi ʻo faai atu ai.—2 Tim. 4:5.
23 Ko ʻetau lotu fakamātoató ia ke tau kau kakato kotoa ki hono malangaʻi ʻa e ongoongo lelei ʻo e Puleʻangá ʻi he faʻahitaʻu Fakamanatu ko ʻení, ʻo fakahaaʻi ai ʻa e loloto ʻo ʻetau houngaʻia ki he meʻa kotoa kuo fai ʻe Sihova maʻatautolú.
[Puha ʻi he peesi 6]
Taimi-Tēpile Malaʻe Ngāue Fakafoʻituitui ki Maʻasi 2002
Sāpate Mōnite Tūsite Pulelulu Tuʻapulelulu Falaite Tokonaki
1 2
ʻAho Makasini
3 4 5 6 7 8 9
ʻAho Makasini
10 11 12 13 14 15 16
ʻAho Makasini
17 18 19 20 21 22 23
ʻAho Makasini
24 25 26 27 28 29 30
ʻAho Makasini
FAKAMANATU
HILI E
31 TŌ ʻA E LAʻAÁ
ʻE lava ke ke fakataimitēpileʻi ha houa fakakātoa ʻe 50 ke tāimuʻa tokoni ʻi Maʻasi?