Fakatupulekina Hoʻo Fiefia ʻi he Malangá
1 ʻOkú ke hokosia ʻa e fiefia ʻi hono vahevahe atu ʻa e ongoongo leleí—ʻi hoʻo ngāue fakafaifekaú? Kapau ʻe ʻikai ke tau tokanga, ko e māmani fulikivanu takatakai ʻia kitautolú ʻe lava ke ne ʻai kitautolu ke tau loto-siʻi fekauʻaki mo e malangá, ʻo ʻai ai ke mole ʻetau fiefiá. Ko e ngāue ʻi he feituʻu taʻefiefanongó ʻe lava ke ne toe fakalotosiʻiʻi kitautolu. Ko e hā ʻa e ngaahi lākanga ʻaonga ʻe lava ke tau laka ai ke fakatupulekina ʻetau fiefia ʻi he malangá?
2 Fakakaukau Pau: Ko hono tauhi maʻu ha fakakaukau paú ʻoku tokoni moʻoni ia. Ko e founga ʻe taha ke fai ai iá ko e fakalaulauloto ki hotau monū maʻongoʻonga ʻo e hoko ko e ‘kaungāngaue mo e ʻOtuá.’ (1 Kol. 3:9) ʻOku ʻiate kitautolu foki ʻa Sīsū ʻi hono fakahoko ʻa e ngāue ko ʻení. (Mt. 28:20) Pea ʻokú ne poupouʻi kitautolu ʻaki ha kau tau ʻo e kau ʻāngelo. (Mt. 13:41, 49) ʻOku lava leva ke tau fakapapauʻi, ʻoku tataki fakaʻotua ʻetau ngaahi feingá. (Fkh. 14:6, 7) Ko ia, neongo pe ko e hā nai ha tali ʻa e niʻihi ʻo e faʻahinga ʻo e tangatá ki heʻetau ngāué, ko e tali fakahēvaní ʻa e tali ʻoku fakafiefia lahí!
3 Teuteu Lelei: ʻOku tānaki mai foki ki heʻetau fiefiá ʻa e teuteu leleí. Ko e mateuteu ki he ngāue fakafaifekaú ʻoku ʻikai ke kau ki ai ha ngāue lahi. ʻOku fiemaʻu ha ngaahi miniti siʻi pē ke vakai ai ki ha poini fetalanoaʻaki mei he ngaahi makasini lolotongá pe ko e tohi ʻoku tuʻuaki ʻi he māhiná. Fili ha lea kamata mei he “Meʻa ke Leaʻaki Fekauʻaki mo e Ngaahi Makasiní,” ʻi he ʻEtau Ngāue Fakafaifekau ʻo e Puleʻanga. Sio ki he fakalahi ʻo Sanuali 2002, “Ngaahi Tuʻuaki Malaʻe Ngāue ʻOku Fokotuʻu Mai,” pe sio ki he kiʻi tohi Founga ke Kamata mo Hoko Atu ʻa e Fetalanoaʻaki Fakatohitapú ki ha talateu ola lelei. Kapau ʻokú ke faingataʻaʻia ʻi ha fakafepaki ʻoku langaʻi anga-maheni hake ʻe he faʻahinga ʻi he ʻapí, teuteu ha tali ʻa ia ʻe fakahaaʻi ai ʻenau fakamatalá pea fakahanga ʻa e tokangá ki ha kaveinga fakatupu mahuʻingaʻia. ʻOku ʻaonga ʻaupito ʻa e kiʻi tohi Founga ke Kamata mo Hoko Atu ʻa e Fetalanoaʻaki Fakatohitapú ʻi hono fai ʻa e meʻá ni. Ko hono ngāueʻaki ʻa e ngaahi tokoni ko ʻení ʻe ʻomai ai kia kitautolu ʻa e loto-maʻu ʻoku tau fiemaʻú ke malanga ai ʻi he fiefiá.
4 Lotu Fakamātoato: ʻOku mātuʻaki mahuʻinga ʻa e lotú ki he fiefia tuʻuloá. Koeʻuhi ʻoku tau fai ʻa e ngāue ʻa Sihová, ʻoku fiemaʻu ke tau kole kiate ia ʻa hono laumālié, ʻa ia ko e fua ʻe taha ai ʻa e fiefiá. (Kal. 5:22) ʻE foaki mai ʻe Sihova kiate kitautolu ha mālohi ke hokohoko atu ʻaki ʻa e malangá. (Fili. 4:13) Ko e lotu fekauʻaki mo ʻetau ngāue fakafaifekaú ʻe lava ke tokoni ia kiate kitautolu ke tauhi ha vakai totonu ʻi he taimi ʻoku tau hokosia ai ha ngaahi meʻa fakamamahi. (Ng. 13:52; 1 Pita 4:13, 14) Kapau ʻoku tau ongoʻi ilifia, ʻe lava ʻe he lotú ʻo tokoniʻi kitautolu ke tau kītaki loto-toʻa mo fiefia.—Ng. 4:31.
5 Fakatupu ha Ngaahi Faingamālie: Ko e moʻoni, ʻe fakafiefia ange ʻetau ngāue fakafaifekaú ʻi he taimi ʻoku malava ai ke tau maʻu ha kakai pea faifakamoʻoni kiate kinautolu. Ko hono liliu hoʻo taimi-tēpilé ke fai ai ʻa e ʻaʻahi mei he fale ki he falé ʻi ha houa kehe, mahalo ʻi he hoʻatā efiafí pe ʻi he hengihengí, ʻe hoko nai ai ha lavameʻa lahi ange. ʻOkú ke fetaulaki maʻu pē mo e kakaí ʻi he taimi ʻokú ke ʻalu ai ʻi he halá, ʻalu ʻo fakataú, heka ʻi ha pasi, pe ʻeveʻeva ʻi he paʻaké. Ko e hā ʻoku ʻikai ai ke teuteu ha kamataʻanga nounou ʻo e fetalanoaʻakí pea tomuʻa fakaofiofi ki he faʻahinga ʻoku hā anga-fakakaumeʻá? Pe ʻokú ke ngāue nai ʻi ha ngāue fakamāmani pe ʻalu ki he ʻapiako ʻa e Puleʻangá, ʻa ia ʻokú ke fetalanoaʻaki fakaʻaho ai mo e niʻihi kehé. Te ke maʻu nai ha faingamālie ke fai ha fakamoʻoni ʻaki hono langaʻi hake pē ha kaveinga Fakatohitapu ʻoku ueʻi ai ha mahuʻingaʻia. ʻOku maʻu ha ngaahi fokotuʻu lelei ʻi he peesi ʻuluaki ʻo e fakalahi ʻo ʻEtau Ngāue Fakafaifekau ʻo e Puleʻanga ʻo Sanuali 2002. ʻOku lava ke fakatupulekina lahi ʻe ha taha pē ʻo e ngaahi feinga ko ʻení ʻa e tuʻunga ʻo e fiefia ʻa ha taha ʻi he malangá.
6 Koeʻuhi ʻoku tokoniʻi kitautolu ʻe he fiefiá ke tau kātaki, he mātuʻaki mahuʻinga ē ke tauhi maʻu ia! ʻI hono fai iá, te tau utu ai ha pale lahi ʻi he taimi ʻe hoko ai ʻo ngata ʻa e ngāue ʻe ʻikai ʻaupito ke toe fai ko ʻení. Ko e ʻamanaki ko iá ʻiate ia pē ʻe lava ke tupulaki ai ʻetau fiefia ʻi he malangá.—Mt. 25:21.