Puha Fehuʻi

◼ ʻI he faifakamoʻoni ʻi he telefoní, ʻoku totonu ke tau fakamatalaʻi ai ʻa e fokotuʻutuʻu ki he meʻaʻofá?

ʻI he taimi ʻoku tau fai ai ha fakamoʻoni fakahangatonú, ʻe malava nai ai ke fakamatalaʻi ko e ngāue fakaeako Tohitapu ʻa e Kau Fakamoʻoni ʻa Sihová ʻi māmani lahí ʻoku poupouʻi ʻataʻatā ia ʻe he ngaahi meʻaʻofa loto-fiefoaki pea ʻoku tau fiefia ke tali ʻa e ngaahi meʻaʻofa ko iá. Kae kehe, ʻoku ʻikai totonu ke lave ki he ngaahi meʻaʻofá, pe ko e fokotuʻutuʻu ki he meʻaʻofá ʻi he taimi ʻo e faifakamoʻoni ʻi he telefoní, he ʻe lava ke fakaʻuhingahalaʻi eni ko ha founga ʻo e kole paʻanga ʻi he telefoní. Ko e ngāue fakafaifekau ʻa e Kau Fakamoʻoni ʻa Sihová ʻoku ʻikai ke fakakomēsiale ʻi he tafaʻaki kotoa pē.​—2 Kol. 2:​17.

◼ ʻI he faifakamoʻoni he telefoní, ko e hā ʻoku totonu ke tau faí kapau ʻoku kole mai ʻe ha tokotaha ke ʻoua ʻe toe tā ange ʻa e Kau Fakamoʻoni ʻa Sihová?

ʻOku totonu ke tokaʻi ʻa e ngaahi fakaʻamu ʻa e tokotahá. ʻOku totonu ke tuku ha nouti ʻoku ʻasi ai ʻa e ʻahó fakataha mo e hingoa ʻo e tokotahá ʻi he sila ʻo e feituʻú koeʻuhi ke fakaʻehiʻehi ʻa e kau malangá mei he tā ki he fika ko iá ʻi he kahaʻú. ʻOku totonu ke vakaiʻi tuʻo taha ʻi he taʻu ʻa e lisi ʻo e kakai naʻa nau kole ke ʻoua te tau toe tā angé. ʻI he malumalu ʻo e tataki ʻa e ʻovasia ngāué, ʻe lava ke vaheʻi ha kau malanga taukei mo fakapotopoto ke fetuʻutaki ki he kakai ko ení ke fakapapauʻi ʻenau ngaahi fakaʻamu lolotongá.​—Sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Sanuali 1994.