Malanga ʻi ha Māmani Feliliuaki Hokohoko
1 He lava moʻoni ē ke liliu vave ʻa e ngaahi meʻá! ʻOku lava ke hoko fakafokifā ko e tuʻunga-lea ia ʻo e fetalanoaʻakí ha fakatamaki fakanatula, ko ha faingataʻa fakaʻekonōmika, ko ha maveuveu fakapolitikale, pe ko ha meʻa fakamamahi ʻoku ʻiloa lahi. Kae kehe, ʻoku vave tatau pē ʻa e fakahanga nai ʻe he kakaí ki he feituʻu kehe ʻenau tokangá. (Ng. 17:21; 1 Kol. 7:31) ʻI he māmani feliliuaki hokohoko ko ení, ʻe lava fēfē ke tau puke mai ʻa e tokanga ʻa e kakaí koeʻuhí ke vahevahe mo kinautolu ʻa e pōpoaki ʻo e Puleʻangá?
2 ʻIloʻilo ki he Ngaahi Hohaʻa ʻa e Niʻihi Kehé: Ko e founga ʻe taha ʻo hono puke mai ʻa e tokanga ʻa e kakaí ko e lave ki he ngaahi meʻa ʻoku lolotonga hokó. ʻI hono uki ʻene kau fanongó ke fakakaukau fakamātoato fekauʻaki mo ʻenau tuʻu ʻi he tafaʻaki ʻo e ʻOtuá, naʻe lave ai ʻi he taimi ʻe taha ʻa Sīsū ki he ngaahi meʻa fakamamahi ne toki hoko ʻa ia naʻe ʻi heʻenau fakakaukaú. (Luke 13:1-5) ʻI he founga tatau, ʻi hono ʻoatu ʻa e ongoongo leleí, ʻoku lelei ke tau lave ki ha ngaahi ongoongo ʻoku lolotonga hoko, pe ko ha ʻīsiu fakalotofonua ʻa ia ʻoku mahuʻingaʻia ai ʻa e faʻahinga ʻi hotau feituʻú. Kae kehe, ʻi he lāulea ki he ngaahi meʻa peheé, kuo pau ke tau tokanga ke ʻoua ʻe kau ki ha faʻahi ʻi he ngaahi ʻīsiu fakasōsialé.—Sione 17:16.
3 ʻE lava fēfē ke tau tala ʻa e meʻa ʻoku lolotonga fakakaukau ki ai ʻa e kakaí? Mahalo ko e founga lelei tahá pē ke ʻeke ha foʻi fehuʻi pea fanongo leva. (Mt. 12:34) Ko e mahuʻingaʻia ʻi he kakaí te ne ueʻi kitautolu ke fakatokangaʻi ʻa e anga ʻo e vakai ʻa e niʻihi kehé pea toe fakaʻekeʻeke ʻi ha founga pōtoʻi. Ko ha fakamatala ākenoa hake pē ʻa ha tokotaha-ʻapi ʻe fakahaaʻi nai ai ha hohaʻa ʻa ia ʻoku maʻu ʻe he tokolahi ʻi he feituʻú pea ʻe lava ke fakaʻatā ai ha founga ke fai ha fakamoʻoni.
4 Teuteu ʻo ha Tuʻuaki: ʻI he teuteu ki he malaʻe ngāué ʻi ha māmani feliliuaki hokohokó, ʻe lava ke tau ngāueʻaongaʻaki ʻa e tohi Founga ke Kamata mo Hoko Atu ʻa e Fetalanoaʻaki Fakatohitapú. Ko e ngaahi fokotuʻu ʻaonga ki he founga ke fakakau ai ʻa e ngaahi meʻa ʻoku lolotonga hokó ʻi heʻetau tuʻuakí ʻoku fokotuʻu mai ia ʻi he peesi 2 mo e 4, ʻi lalo ʻi he “Faihia/Maluʻanga” mo e “Ngaahi Meʻa ʻOku Lolotonga Hokó.” ʻOku lava ke maʻu ʻa e ngaahi fakamatala meimei tatau ʻi he ʻEtau Ngāue Fakafaifekau ʻo e Puleʻanga ʻo Sepitema 2000, peesi 4. ʻI hono teuteu hoʻo tuʻuakí, fakapapauʻi ke fakakau ai ha konga Tohitapu feʻungamālie.
5 ʻI heʻetau fakatokangaʻi ʻa e ngaahi hohaʻa feliliuaki hokohoko ʻa e faʻahinga ʻi hotau feituʻú, ʻoku fiemaʻu ke feʻunuʻaki ʻetau tuʻuaki ʻo e ongoongo leleí ʻo fakatatau ki ai. ʻI he founga ko iá, ʻoku tau talanoa ai ki he kakaí fekauʻaki mo e meʻa ʻokú ne uesia lahi ʻenau moʻuí. ʻI he founga ko iá, ʻoku tau tokoniʻi ai ʻa e tokolahi ange ke nau hoko ʻo ʻiloʻi ʻa e Tokotaha ʻa ia ʻoku ʻikai feliliuaki ʻi hono ngaahi ʻulungāngá mo ʻene ngaahi tuʻungá.—Sem. 1:17.