Ngaahi Founga ke ʻAi ke Lelei Ange Ai ʻEtau Ngāue Fakamalanga Fekauʻaki mo e Puleʻangá
1 ʻOku fakavavevave ange ʻa ʻetau ngāue fakamalangá he taimí ni ʻi ha toe taimi ki muʻa. ʻOku fakatuʻunga ʻa e moʻui pe mate ʻa e kakaí ʻi he ʻenau tali ki he ongoongo leleí. (1 Pita 4:5, 6, 17; Fkh. 14:6, 7) ʻI he ʻuhinga ko ʻení ʻoku totonu maʻu pē ke tau vakai ki ha ngaahi founga ke ʻai ke lelei ange ai ʻetau ngāue fakamalanga fekauʻaki mo e Puleʻangá. Ko e hā ʻa e niʻihi ʻo e ngaahi founga ke ʻai ke lelei angé?
2 Teuteu Lelei: ʻI hono ngāueʻaki ʻa e tatau ʻoku lolotonga maʻu ʻo ʻEtau Ngāue Fakafaifekau ʻo e Puleʻanga, filifili ha founga malanga ʻokú ke fakakaukau ʻe fakamānako ki he tokolahi taha ʻo e kakai ʻi he feituʻu ʻokú ke nofo aí. ʻOku mahuʻinga ke liliu ʻa hoʻo ngaahi fakamatalá ki he ngaahi tuʻunga fakalotofonuá. Pe te ke saiʻia nai ke teuteu ha founga malanga pē ʻaʻau, ʻo ngāueʻaki ʻa e ngaahi fakakaukau mo e ngaahi konga Tohi Tapu kuó ke ʻilo ʻe koe ʻoku ola lelei ange ia. ʻE fiemaʻu kiate koe ha lea kamata ʻokú ne langaʻi ʻa e fiefanongó. (Sio ki he tohi Reasoning, peesi 9-15.) Mahalo ʻokú ke fokotuʻutuʻu ke ʻeke ha fehuʻi fakatupunga fakakaukau pe kole ki he tokotaha ʻapí ke ne fai ha fakamatala ki ha ngaahi meʻa mahuʻinga ʻe niʻihi ʻi he ongoongo fakalotofonuá. ʻI he taimi kuó ke maʻu ai ʻi hoʻo fakakaukaú ʻa hoʻo malanga ʻe faí, ʻahiʻahiʻi ia mo ha mēmipa ʻo e fāmilí pe ko ha tokotaha malanga kehe ʻoku malava ke ne fai atu ha ngaahi fokotuʻu ke lelei ange ai ʻa hoʻo malangá.
3 Fetalanoaʻaki mo e Kakaí: Ko ʻetau taumuʻá ke fakahoko atu ha pōpoaki mahuʻinga. ʻE lava ke fai ʻeni ʻaki ʻa hono ʻai ke kau mai ʻa e tokotaha ʻoku fanongó ʻi ha fetalanoaʻaki mohu ʻuhinga. Kapau ʻoku langaʻi hake ʻe he tokotaha ʻapí ha meʻa ʻoku ʻikai te te loto ki ai pe ko ha foʻi fakakaukau kehe, fanongo tokanga ki he meʻa kuó ne leaʻakí. ʻE tokoni ʻa ʻene ngaahi fakamatalá kiate koe ke ke ʻoatu ai ha tali faka-Tohitapu fekauʻaki mo e ʻamanaki ʻoku ʻiate koé. (1 Pita 3:15) Kapau ʻoku ʻikai ke fehoanaki ʻa ʻene fakakaukaú pea mo e Tohi Tapú, ʻe lava ke ke lea fakapotopoto ʻo pehē: “ʻOku tokolahi ʻa e kakai ʻoku nau fakakaukau tatau mo koe. Ka, ko e toe founga ʻeni ʻe taha ʻo e anga ʻo e vakai ki he meʻá ni.” Te ke lau leva ha konga tohi ʻoku feʻungamālié, pea tuku atu ke ne fakamatala.
4 ʻAi ha Taimi-Tēpile ʻOku Maliliungofua: ʻE ʻikai ke loko ʻaonga ʻa e hoko ʻo mateuteu leleí ʻo kapau ʻoku ʻikai malava ke ke talanoa ki he kakaí. Feinga ke liliu ʻa hoʻo taimi-tēpilé koeʻuhi kae malava ke ke ngāue mei he fale ki he fale ʻi he taimi ʻoku tokolahi ange ai ʻa e kakai ʻoku ʻi honau ngaahi ʻapí. Mahalo te ke ʻilo ko e taimi lelei taha ke ʻaʻahi aí ko e ngaahi fakaʻosinga ʻo e uiké; ʻe lahi ange nai ʻa e fetuʻutaki mo e faʻahinga kehé ʻi he lolotonga ʻo e uiké ka ʻi he houa efiafí. ʻI he ngaahi feituʻu ʻe niʻihi ʻoku ʻilo ʻe he kau malangá ʻoku lelei ke faifakamoʻoni ʻi he ngaahi ʻaho mālōlō faka-puleʻangá, koeʻuhi ʻoku tokolahi ange ai ʻa e kakai ʻoku ʻi honau ngaahi ʻapí. ʻOku faʻa ʻi ha tuʻunga nonga ange ai ʻa e kakaí pea ʻoku nau loto-lelei nai ke fetalanoaʻaki ʻi he ngaahi taimi peheé. ʻE lelei ke liliu ʻa hoʻo lea kamatá ki he tuʻunga ko iá pea toki fakafekauʻaki ki ai ʻa hoʻo fakamatalá pea mo ha kaveinga faka-Tohitapu.
5 Sivisiviʻi ʻa e Tuʻunga Ola Lelei ʻo Hoʻo Malangá: ʻI he hili ʻa hoʻo mavahe mei he ʻapi taki taha, ʻeke hifo kiate koe: ‘Naʻá ku aʻu ki he loto ʻo e tokotaha ʻapí? Naʻá ku ʻilo ʻa e anga ʻo ʻene fakakaukaú pea fai ha tokanga ki he meʻa naʻá ne leaʻakí? Naʻá ku fai ha tali fakapotopoto? Koeʻuhi ko e ngaahi tuʻungá, naʻá ku ngāueʻaki ʻa e founga lelei tahá?’ ʻE hoko nai ko ha tokoni ʻa e ngāue fakataha mo ha tokotaha malanga taukei pe ko ha tāimuʻa ʻi he taimi ki he taimi pea fanongo tokanga ki heʻene ngaahi malangá ʻi he taumuʻa ke ʻai ke lelei ange ʻa hoʻo ola lelei ʻi he ngāue fakamalangá.
6 Kapau ʻokú ke pōtoʻi ʻi hoʻo ngāué, te ke malava ke fakahā atu ʻa e ngaahi moʻoni fekauʻaki mo e Puleʻangá ʻa ia “te ke fakamoʻui koe mo kinautolu foki ʻoku fanongo kiate koe.”—1 Tīm. 4:16; Pal. 22:29.