ʻAi ke ʻIloa ʻa e Huafa Fakaʻotuá
1. Ko e hā ʻa e ola ʻe lava ke hoko ki he kakaí ʻi hono ʻiloʻi ʻa e huafa fakafoʻituitui ʻo e ʻOtuá?
1 Naʻe anga-fēfē hoʻo talí ʻi he taimi naʻá ke ʻuluaki ʻiloʻi ai ʻa e huafa ʻo e ʻOtuá? Ko e tali ʻa e tokolahi ʻoku meimei tatau ia mo e tali ʻa ha fefine ʻa ia naʻá ne pehē: “ʻI he taimi naʻá ku ʻuluaki sio ai ki he huafa ʻo e ʻOtuá ʻi he Tohitapú, naʻá ku tangi. Naʻe mātuʻaki ueʻi ai au ʻe he ʻilo ʻe lava moʻoni ke u ʻiloʻi pea ngāueʻaki ʻa e huafa fakafoʻituitui ʻo e ʻOtuá.” Kiate ia, ko hono ʻiloʻi ʻa e huafa fakaʻotuá ko ha sitepu mahuʻinga ia ʻi he hoko ʻo ʻiloʻi ʻa Sihova ʻi he tuʻunga ko ha tokotahá pea mo e malava ke langa hake ha vahaʻangatae mo iá.
2. Ko e hā ʻoku fiemaʻu fakavavevave ai kia kitautolu ke akoʻi ʻa e niʻihi kehé fekauʻaki mo Sihová?
2 Ko e Hā ke ʻAi Ai Ia ke ʻIloá? Ko e huafa ʻo e ʻOtuá ʻoku fehokotaki ia mo hono ngaahi ʻulungāngá, ngaahi taumuʻá, mo e ngaahi ngāué. ʻOku toe fehokotaki ia mo e fakamoʻuí. “ʻIlonga ʻa ia ʻe tautapa ki he huafa ʻo e ʻEiki ʻe fakamoʻui,” ko e tohi ia ʻa e ʻapositolo ko Paulá. Ka ‘te nau lava fefe ke tautapa kiate ia,’ ko e fakaʻuhinga ia ʻa Paulá, kae ʻoua kuo ʻuluaki ako ʻa e kakaí fekauʻaki mo Sihova pea ngāueʻi ʻa e tui kiate iá? Ko ia ai, ʻoku fiemaʻu fakavavevave ki he kau Kalisitiané ke nau ʻai ke ʻiloa ʻe he niʻihi kehé ʻa e huafa ʻo e ʻOtuá mo e meʻa kotoa ʻokú ne fakafofongaʻí. (Loma 10:13, 14) Kae kehe, ʻoku ʻi ai ʻa e toe ʻuhinga lahi ange ia kuo pau ai ke ʻai ke ʻiloa ʻa e huafa fakaʻotuá.
3. Ko e hā ʻetau ʻuhinga muʻomuʻa taha ki he malangá?
3 ʻI he 1920 tupú, naʻe ʻiloʻi ai ʻe he kakai ʻa e ʻOtuá mei he ngaahi Konga Tohitapú ʻa e ʻīsiu fakaeʻuniveesi fekauʻaki mo e fakatonuhiaʻi ʻo e tuʻunga-hau ʻo e ʻOtuá pea mo hono fakamāʻoniʻoniʻi ʻa hono huafá. Ki muʻa ke fakaʻauha ʻe Sihova ʻa e fulikivanú ke toʻo ai ʻa e luma kuo hilifaki ki hono huafá, ko e moʻoni fekauʻaki mo iá kuo pau ke “ʻilo ia ʻe mamani katoa.” (Ai. 12:4, 5; Isi. 38:23) Ko ia ai, ko ʻetau ʻuhinga muʻomuʻa taha ki he malangá ke fakahīkihikiʻi fakahāhā ai ʻa Sihova pea ke fakamāʻoniʻoniʻi ʻa hono huafá ʻi he ʻao ʻo e faʻahinga kotoa ʻo e tangatá. (Hep. 13:15) Ko e ʻofa ki he ʻOtuá mo e kaungāʻapí ʻe ueʻi ai kitautolu ke kau kakato ʻi he ngāue ko eni kuo hilifaki mai ʻe he ʻOtuá.
4. Kuo anga-fēfē ʻa e hoko ʻo ʻiloʻi ʻa e Kau Fakamoʻoni ʻa Sihová ʻaki ʻa e huafa ʻo e ʻOtuá?
4 Ko “ha Kakai ke Kau ki Hono Huafa”: ʻI he 1931 naʻa nau ohi ai ʻa e hingoa Kau Fakamoʻoni ʻa Sihová. (Ai. 43:10) Talu mei ai, kuo ʻai ʻe he kakai ʻa e ʻOtuá ke ʻiloa ʻa e huafa fakaʻotuá ʻo aʻu ki ha tuʻunga ʻoku pehē ai ʻe he tohi Proclaimers, peesi 124: “ʻI he māmaní takatakai, ko ha taha pē ʻokú ne ngāueʻaki tauʻatāina ʻa e huafa Sihová ʻoku vave hono ʻiloʻi ia ko e taha ʻo e Kau Fakamoʻoni ʻa Sihová.” ʻOku ʻiloʻi koe ʻi he foungá ni? Ko e houngaʻia ki he anga-lelei ʻa Sihová ʻoku totonu ke ne ueʻi kitautolu ke ‘fakamaloʻia hono huafá,’ ʻo lea fekauʻaki mo ia ʻi he taimi faingamālie kotoa pē.—Sāme 20:7; 145:1, 2, 7.
5. ʻOku anga-fēfē ʻa e kau hotau ʻulungāngá ʻi hono fataki ʻa e huafa ʻo e ʻOtuá?
5 ʻI he tuʻunga ko “ha kakai ke kau ki hono huafa,” kuo pau ke tau pouaki ʻa ʻene ngaahi tuʻungá. (Ng. 15:14; 2 Tim. 2:19) Ko e meʻa ʻoku faʻa ʻuluaki fakatokangaʻi ʻe he kakaí fekauʻaki mo e Kau Fakamoʻoni ʻa Sihová ko honau ʻulungaanga leleí. (1 Pita 2:12) ʻOku ʻikai ʻaupito te tau saiʻia ke fakamāʻulaloʻi hono huafá ʻaki ʻa e paetaku ki he ngaahi tefitoʻi moʻoni fakaʻotuá pe ʻi hono tuku ʻa ʻene lotú ki ha tuʻunga fika ua ʻi heʻetau moʻuí. (Liv. 22:31, 32; Mal. 1:6-8, 12-14) ʻI hono kehé, ʻofa ke fakahaaʻi ʻi heʻetau founga moʻuí ʻoku tau koloaʻaki ʻa e monū ʻo hono fataki ʻa e huafa fakaʻotuá.
6. Ko e hā ʻa e monū ʻe lava ke tau maʻu fakatouʻosi he taimí ni pea taʻengatá?
6 ʻI he ʻahó ni, ʻoku tau sio ai ki hono fakahoko ʻa e fanongonongo ʻa Sihová: “Mei he hopoʻangalaʻa ʻo aʻu ki hono toʻanga, ʻoku fotu hoku hingoa ʻi he ngaahi puleʻanga.” (Mal. 1:11) Tau hokohoko atu ke ʻai ke ʻiloa ʻa e moʻoni fekauʻaki mo Sihová “pea ke fakamaloʻia . . . hono huafa tapuhā, ʻo lauikuonga ʻo taʻengata.”—Sāme 145:21.