Houngaʻia ʻi he Meesi ʻa e ʻOtuá
1 Ki muʻa ke hoko ko ha Kalisitiané, naʻe fakafepakiʻi anga-fakamālohi ʻe he ʻapositolo ko Paulá ʻa hono fakamafola ʻo e lotu faka-Kalisitiané. Kae kehe, koeʻuhí naʻá ne fai ʻi he taʻeʻilo, naʻe fakahaaʻi kiate ia ʻa e meesi. Naʻe fakahāhā ʻe Sihova ʻa e ʻofa maʻataʻataá, pea naʻe ʻoange kia Paula ha vāhenga-ngāue ke malanga. Naʻá ne koloaʻaki ʻa e vāhenga-ngāue ko iá. (Ng. 26:9-18; 1 Tim. 1:12-14, PM) Ko e houngaʻia ʻi he meesi ʻa Sihová naʻe ueʻi ai ʻa Paula ke ne hoko ʻo feilaulauʻi-kita ʻi hono fakahoko ʻene ngāue fakafaifekaú.—2 Kol. 12:15.
2 Fakatatau ki he meesi ʻa e ʻOtuá, ko kitautolu foki kuo ʻomai ki ai ha ngāue fakafaifekau. (2 Kol. 4:1) Hangē ko Paulá, ʻe lava ke tau fakahāhā ʻetau houngaʻia ki he meesi ʻoku fakahaaʻi mai kia kitautolú ʻaki ʻa e fakafitefitaʻa ʻi hono tokoniʻi ʻa e niʻihi kehé ke nau fakalakalaka fakalaumālie. Ko e founga ʻe taha ʻe lava ke tau fai ai ení ko hono kamata mo hono fai ha ngaahi ako Tohitapu.
3 Ko Hono Kamata ʻa e Ngaahi Ako Tohitapú: Ko ha founga ke kamata ai ʻa e ngaahi ako Tohitapú ko hono fokotuʻu ha tufaʻanga makasini pau. ʻI heʻetau ʻaʻahi tuʻumaʻu ki he faʻahinga ʻi heʻetau tufaʻangá, ʻoku tau hoko ai ʻo maheni lelei ange mo e ngaahi meʻa ʻoku nau tokanga ki aí. Faifai atu pē, ʻe hoko ai ha kupu ʻi he taha ʻo e ngaahi makasiní ko ha kamataʻanga ia ki hono fokotuʻu ange ha ako Tohitapu ʻi he polosiua Fiemaʻu. ʻI he ngaahi ʻaʻahi hoko atu aí, ʻe malava nai ke hokohoko atu ʻa e lāulea ʻi he polosiua Fiemaʻu ʻi heʻetau ʻave ʻa e ngaahi makasiní ki he tokotaha-ʻapí.
4 Fiemaʻu ʻa e Feinga ʻi he Faʻa Lotu: Ko e lotú fakataha mo e feinga tōtōiví ʻe fakaleleiʻi ai ʻetau ngāue fakamalangá. Ko ha tuofefine tāimuʻa ʻa ia naʻe ʻi ai ʻene ako Tohitapu ʻe taha naʻá ne lotu ke tāpuakiʻi ia ʻe Sihova ʻaki ha ako lahi ange. Naʻá ne toe ngāue foki ʻo fehoanaki mo ʻene ngaahi lotú. Naʻá ne sivisiviʻi ʻa ʻene ngāue fakafaifekaú pea fakatokangaʻi naʻe ʻikai te ne tuʻuaki ha ngaahi ako Tohitapu ʻi hono fai ʻa e ngaahi toe ʻaʻahí. Naʻá ne kamata leva ia pea vave ai ʻa ʻene maʻu mo ha toe ongo ako ʻe ua.
5 He monū ē ʻoku tau maʻu ke kau ʻi hono ʻai ke ʻiloa ʻa e “ogoogolelei oe aloofa ae Otua”! (Ng. 20:24, PM) ʻOfa ke hanga ʻe he houngaʻia ʻi he meesi ʻa e ʻOtuá ʻo ueʻi kitautolu ke tau tōtōivi ʻi hono tokoniʻi ʻa e niʻihi kehé ke nau maʻu ʻaonga mei he ʻaloʻofa maʻataʻatā ʻa Sihová.