Fakamālō ki he ʻAloʻofa ʻa Sihová
Ke Fakamanatu ʻa e Pekia ʻa Kalaisí ʻi Maʻasi 24
1. Kuo anga-fēfē ʻa hono fakahāhaaʻi mai ʻe Sihova kia kitautolu ʻa e ʻaloʻofá?
1 Naʻe kalanga ʻa e tokotaha-tohi-sāmé: “Ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata.” (Sāme 107:8, PM) Ko e ʻaloʻofa ʻa e ʻOtuá ʻoku ʻikai ko ha ongoʻi manavaʻofa pē ia ʻokú ne maʻu ki he kakaí. ʻOku ʻai ia ʻo hā mahino ʻi he lea fakamānavaʻi ʻo e fakahīkihiki: “Ko hoo aloofa, E Jihova, nae boubou hake au.” (Sāme 94:18, PM) He ʻaloʻofa fakaofo moʻoni ia naʻe fakahāhaaʻi ʻe Sihova ʻi heʻene foaki hono ʻAlo tofu-pē-taha-ne-fakatupú maʻa kitautolú!—1 Sione 4:9, 10.
2. ʻE lava fēfē ke tau fakahāhaaʻi ʻa e fakamālō kia Sihová?
2 ʻI he fakaofiofi mai ʻa e Fakamanatu ʻo e pekia ʻa Kalaisí, ʻe lava fēfē ke tau fakamālō ki he “Otua oku aloofa”? (Sāme 59:17, PM) Ko e tokotaha taki taha ʻo kitautolu te tau loto ke vaheʻi ha taimi ke fakalaulauloto ai ki he ngaahi ʻaho fakaʻosi ʻo Sīsū ʻi he māmaní. (Sāme 143:5) ʻE toe ʻaonga foki ke muimui ʻi he lau Tohi Tapu makehe ʻoku fakataimitēpileʻi ki he Fakamanatú, hangē ko ia ʻoku fakahaaʻi ʻi he Vakaiʻi Fakaʻaho ʻo e Tohi Tapú—2005 pea ka malava, fai ha lautohi mo e fekumi lahi ange ʻi he vahe 112-16 ʻo e tohi Moʻungaʻi Tangata Lahi Taha fakataha mo e ngaahi tohi makatuʻunga Fakatohitapu kehé. Fakalaulauloto ki he ngaahi kupu ʻokú ke laú, pea ngāue ki he ngaahi meʻa ko iá. (1 Tim. 4:15) Ko hono ako ʻa e Folofola ʻa e ʻOtuá fakataha mo e lotú ʻoku ʻikai ngata pē ʻi heʻene fafanga hotau lotó ka ʻokú ne toe fakahāhaaʻi ai ʻetau ʻofa kia Sihová.—Mt. 22:37.
3, 4. (a) ʻE lava fēfē ke tau faʻifaʻitaki ki he fakakaukau ʻa hotau fanga tokoua ʻi Laipīliá? (e) Ko hai ʻokú ke palani ke fakaafeʻi ki he Fakamanatú?
3 Fakaʻaiʻai ʻa e Niʻihi Kehé ke Fakamālō ki he ʻOtuá: ʻI he taʻu kuo ʻosí, ko e toko 16,760,607 naʻa nau maʻu ʻa e Fakamanatú ʻi māmani lahí. ʻI ha kiʻi kolo ʻi Laipīlia, naʻe fai ai ʻe he fanga tokouá ha tohi ki he ʻeiki ʻo e koló, ʻo fakahaaʻi kiate ia ʻa ʻenau taumuʻa ke kātoangaʻi ʻa e Kai Efiafi ʻa e ʻEikí ʻi hono koló. Naʻe fakangofua ʻe he ʻeikí ʻa e fanga tokouá ke nau ngāueʻaki ʻa e malaʻe ʻakapulu fakalotofonuá ki he meʻa ʻe faí pea naʻá ne fai ha fanongonongo fekauʻaki mo e meʻá ni ʻi he kotoa ʻo e feituʻú, ʻo fakaafeʻi ʻa e kakaí ke nau kau ki ai. Neongo naʻe toko nima pē ʻa e kau malanga ʻi he kiʻi kolo ko iá, ko e kau maʻu Fakamanatú naʻe toko 636!
4 Pehē foki, ʻoku tau fiemaʻu ke tokoniʻi ʻa e tokolahi taha ʻe ala lavá ke kau fakataha mo kitautolu ʻi hono kātoangaʻi ʻa e Fakamanatú. Fēfē ke ke ʻai ha lisi ʻo e faʻahinga ko ia ʻokú ke loto ke fakaafeʻí? Ko e ngaahi fakatātā ʻi he takafi mui ʻo e Awake! ʻo Maʻasi 8 mo e Taua Leʻo ʻo Maʻasi 15 ʻoku fakaaʻu atu ai ha fakaafe ki he Fakamanatú. Ko e ʻū tohi fakaafe Fakamanatu kuo ʻosi pulusí ʻe lava foki ke ngāueʻaki. Taipeʻi pe hikiʻi fakalelei ʻa e taimi mo e feituʻu ʻo e fakamanatú ʻi he lauʻipepá, pea tuku ha taha ʻi he tokotaha taki taha te ke fakaafeʻí. ʻI he fakaofiofi mai ʻa Maʻasi 24, toe foki ʻo fakamanatu ki he tokotaha taki taha pea fakapapauʻi fakaʻosi ha ngaahi fokotuʻutuʻu pē.
5. ʻE lava fēfē ke tau fakalototoʻaʻi ʻa e kau ako Tohi Tapú ke nau haʻu ki he Fakamanatú?
5 ʻE lava fēfē ke tau tokoniʻi ʻa e kau ako Tohi Tapu ko ia ʻoku teʻeki ai ke nau maʻu ʻa e ngaahi fakatahá ke nau kau ki ai pea maʻu ʻaonga kakato mei he meʻa ʻe faí? Fakamoleki ha ngaahi miniti siʻi he lolotonga ʻa e ako taki taha ke langa hake ai ʻenau mahinoʻi ʻa e mahuʻinga ʻo e kātoangá. ʻE lava ke maʻu ha fakamatala lelei ʻaupito ʻi he Taua Leʻo ʻo Maʻasi 15, 2004, peesi 3-7, mo e tohi Reasoning, peesi 266-9.
6. Ko e hā ʻoku mahuʻinga ai ke talitali lelei ʻa e niʻihi kehé ʻi he Fakamanatú?
6 Talitali Lelei ʻa e Kau ʻAʻahí: ʻI he Fakamanatú, fakaofiofi ki he kau ʻaʻahí ʻo talitali lelei kinautolu. (Loma 12:13) Fokotuʻutuʻu ke tangutu mo e faʻahinga ko ia naʻá ke fakaafeʻí, pea fakapapauʻi ʻoku nau maʻu ha Tohi Tapu mo ha tohi hiva. Te tau mātuʻaki loto ke tamuʻomuʻa ʻi hono talitali māfana ha fanga tokoua pe fanga tuofāfine ʻikai longomoʻui pē kuo nau fai e feinga ke haʻu ki he Fakamanatú. Ko ʻetau mahuʻingaʻia anga-ʻofá te ne tokoniʻi nai kinautolu ke nau toe foki ʻo feohi tuʻumaʻu mo e fakatahaʻangá. (Luke 15:3-7) ʻI he kātoanga toputapu taha ko ení, ʻofa ke tau fai ʻa e meʻa kotoa te tau lavá ke fakalototoʻaʻi ai ʻa e niʻihi kehé ke nau kau fakataha mo kitautolu ʻi he fakamālō kia Sihova ki heʻene “agalelei [pe ʻaloʻofa] fakaofo.”—Sāme 31:21, PM.