ʻOkú Ke Ngāueʻaki ʻa e Lauʻipepa-Tuʻuakí?

ʻI he ʻaho ʻe taha naʻe maʻu ai ʻe ha kiʻi tamasiʻi taʻu 11 ha lauʻipepa-tuʻuaki naʻe tuʻuaki ai ha malanga maʻá e kakaí ʻi he kaveinga ʻo e helí. “Naʻe ʻai au ʻe he meʻá ni ke u mātuʻaki mahuʻingaʻia,” ko ʻene fakamatala ia ki mui aí, “he naʻe hā ngali naʻá ku fai maʻu pē ʻa e meʻa ʻoku halá, pea ko ia naʻá ku hohaʻa lahi ai ʻo fekauʻaki mo e ʻalu ki ha heli ʻoku vela ʻi he taimi te u mate aí.” Naʻá ne ʻalu ʻo maʻu ʻa e malangá, pea ʻi he meimei taʻu ʻe taha ki mui ai, hili ʻa e ngaahi ako taimi lahi ʻo e Tohi Tapú, naʻá ne papitaiso. Ko ia naʻe kamata leva ai ʻa e ngāue tuʻumaʻu faka-Kalisitiane ʻa Karl Klein, ʻa ia naʻá ne ngāue ki mui ʻi he ngaahi taʻu lahi ʻi he tuʻunga ko ha mēmipa ʻo e Kulupu Pule ʻo e Kau Fakamoʻoni ʻa Sihová. Naʻe kamata kotoa ia ʻi ha lauʻipepa-tuʻuaki.

Ko e ngaahi lauʻipepa-tuʻuakí ʻoku hokohoko atu ʻenau hoko ko e meʻangāue faifakamoʻoni ola lelei ia ʻi he ʻahó ni. Ko e kau malanga tokolahi ʻoku nau ʻilo ko hono ʻoange ha lauʻipepa-tuʻuaki ʻe taha ki ha tokotahá ko ha founga lelei ia ke fakafeʻiloaki ai kinautolu pea mo kamata ai ha ngaahi fetalanoaʻaki. ʻE lava ʻe he ngaahi mātuʻá ʻo fakakau ʻa ʻenau fānau īkí ʻi he ngāue fakafaifekaú ʻaki hono ʻai kinautolu ke nau tuku ha lauʻipepa-tuʻuaki ʻi he matapaá. Ko e kau malanga ʻoku nau kau atu ʻi he faifakamoʻoni fakafou he faitohí ʻoku lava ke nau tuʻuaki ʻa e ngaahi fakatahá ʻaki hono ʻave ai ha lauʻipepa-tuʻuaki. Pea, ʻoku moʻoni, ko e ngaahi lauʻipepa-tuʻuakí ko ha founga feʻungamālie ia ke fakaafeʻi ai ʻa e kau ako Tohi Tapú pea mo e niʻihi mahuʻingaʻia kehé ke nau ōmai ki heʻetau ngaahi fakatahá.

ʻOkú ke ngāueleleiʻaki ʻa e ngaahi lauʻipepa-tuʻuakí ʻi hoʻo ngāue fakafaifekaú?