Feinga Uouangataha ʻi Māmani Lahi ke Tuʻuaki ʻa e Fakataha-Lahi Fakavahe “Muimui ʻia Kalaisi!”
ʻE Toe Tufaki ʻe he Kau Malangá ha Lauʻipepa-Tuʻuaki Makehe
1 ʻI he taʻu kuo ʻosí ko e feingangāue ko ia ʻi māmani lahi ke tuʻuaki ʻa e Fakataha-lahi Fakavahe “ʻOku Ofi ʻa e Fakahaofí!” naʻá ne tākiekina mālohi ʻa e faʻahinga mahuʻingaʻiá. Ko e faʻahinga naʻa nau tali ʻa e fakaafe makehé ni pea nau ōmaí, ne nau kau ai ʻi he fuofua taimí he fuʻu kātoanga kai fakalaumālie ʻa e Kau Fakamoʻoni ʻa Sihová. (Ai. 65:13) Naʻa nau fiefia ʻi he feohi mo hotau fanga tokoua Kalisitiane fāʻūtaha mo loto-māfaná. (Sāme 133:1) Ke lava ʻo tokoni ki he tokolahi taha ʻe ala lavá ke nau maʻu ʻa e Fakataha-Lahi Fakavahe “Muimui ʻia Kalaisi!” te tau toe ngāue ʻi hono tufaki ʻi māmani lahi ha lauʻipepa-tuʻuaki makehe.
2 Ngaahi Ola ʻi he Taʻu Kuo ʻOsí: Makatuʻunga ʻi he ngaahi līpooti naʻe maʻu mei he tapa kotoa ʻo e māmaní, naʻe maʻu ʻa e ngaahi ola lelei ʻi hono tuʻuaki ʻa e Fakataha-Lahi Fakavahe “ʻOku Ofi ʻa e Fakahaofí!” ʻI he ngaahi feituʻu lahi naʻa tau maʻu ai ha fakamatala lelei mei he kakaí. Ko e fakatātaá, ʻi ha kolo ʻe taha, naʻe pulusi ai ʻe ha nusipepa ha kupu kōlomu ʻe ono ʻo kau ki he feingangāué, ʻo pehē ai: “Ke aʻu ki he tokotaha kotoa ki muʻa ʻi he fakataha-lahí, kuo fai ʻe he Kau Fakamoʻoní ha feinga tōtōivi makehe ʻi he kaungāʻapí—ʻo ngāue ʻi he ngaahi houa lahi ange, luelue ki he ngaahi feituʻu mamaʻo ange, pea talanoa vave ange.” Ko e tufaki fāʻūtaha ko eni ʻo e lauʻipepa-tuʻuakí naʻe langaʻi ai e mahuʻingaʻia ʻa e mītia fakalotofonua ʻi ha toe kolo ʻe taha, ʻo fakatupunga ai ke fai ha ongoongo fakaʻāuliliki ki ai. Laka hake ʻi he ngaahi nusipepa ʻe tolu naʻe fakamatala lelei ai ki heʻetau ngāue ki muʻa ʻi he fakataha-lahí. Naʻe hiki ʻe ha faiongoongo ha ngaahi kupu lahi naʻe kāpui ʻo laka hake he peesi ʻe ua, ʻi he ʻīsiu he Sāpaté ʻo ha nusipepa ʻe taha. Naʻe fakaikiiki ai ʻetau ngaahi tuí, ko ʻetau fetokouaʻakí, ko hono tufaki ʻa e lauʻipepa-tuʻuakí pea mo e fakataha-lahí. ʻI hono ʻoatu ʻe he tokotaha malanga ʻe taha ʻa e tohi fakaafé ʻi he matapaá, naʻe fakahohaʻasi ʻene leá ʻe he tokotaha-ʻapí ʻo ne pehē ange: “ʻIo. Naʻá ku lau ʻo fekauʻaki mo ia ʻi he pepá!” Naʻe fakamatala ha tokotaha-ʻapi ʻe taha: “Ko e toki ʻosi pē eni ʻeku lau hifo fekauʻaki mo kimoutolu, pea ko eni ʻoku mou ʻi heni! Ko ʻeku tohi fakaafé ia?” Naʻá ne toki tānaki mai, “Ko ha meʻa lelei ʻaupito eni ʻoku fai ʻe he Kau Fakamoʻoni ʻa Sihová.”
3 Naʻe tokolahi ʻa e faʻahinga mahuʻingaʻia ne nau ō ki he ngaahi feituʻu faiʻanga fakataha-lahí mo ʻenau tohi fakaafé. Naʻe fakaʻuli mai ʻa e faʻahinga mahuʻingaʻia ʻe niʻihi mei he ngaahi kolo mamaʻó koeʻuhi ke nau maʻu ʻa e ngaahi kongá. Ko ʻetau ngaahi feinga tōtōivi ke fakaafeʻi ʻa e niʻihi kehé naʻe tokoni ia ki he fakautuutu ʻa e tokolahi ʻo e kau maʻu fakatahá, ʻi he fonua ʻe taha naʻa nau maʻu ʻa e peseti ʻe 27 ʻo e kakai tokolahi ange ne nau ʻi he fakataha-lahí ʻi he taʻu ki muʻa aí.
4 ʻOsiki ʻa e Feituʻu Ngāué: ʻE lava ke mou kamata tufaki ʻa e lauʻipepa-tuʻuakí ʻi he uike ʻe tolu ki muʻa ke kamata hoʻomou fakataha-lahí. ʻOku totonu ke fai ha feinga lahi ke ʻosiki ʻa e feituʻu ngāue kotoa ʻa e fakatahaʻangá. ʻI he ngaahi fakatahaʻanga ʻoku ʻi ai ʻa e feituʻu ngāue lalahí, ʻe lava ke tuku fakapotopoto ʻe he kau malangá ʻa e lauʻipepa-tuʻuakí ʻi he ngaahi ʻapi ʻoku ʻikai ʻi ai ha tahá lolotonga ʻa e uike fakaʻosi ki muʻa ʻi he fakataha-lahí. ʻOku totonu ke feinga ʻa e ngaahi fakatahaʻangá ke nau tufaki ʻa e ngaahi lauʻipepa-tuʻuaki kuo ʻosi vahe maí, pea ʻai ke ʻosi ʻa e lahi taha ʻo e feituʻu ngāué ʻe ala lavá. Ka ʻi ai ha toe, ʻe lava ke ngāueʻaki ia ʻe he kau tāimuʻa ʻi he fakatahaʻangá.
5 Meʻa ke Leaʻaki: Te ke leaʻaki nai ha meʻa hangē ko ení: “ʻOku mau kau ʻi ha feingangāue fakamāmanilahi ko hono tufaki ʻa e tohi fakaafe ko ení ki ha meʻa mahuʻinga ʻoku teuaki ke fai. Ko hoʻo tatau eni. Te ke maʻu ʻa e ngaahi fakaikiiki kehe ʻoku fakamatalaʻi ʻi he tohi fakaafé.” Ko hono ʻai ke nounou ʻa e tuʻuakí ʻe lahi ai ʻa e tohi fakaafe ʻe tufá. Ko e moʻoni, kapau ʻoku ʻi ai ha ngaahi fehuʻi ʻa e tokotaha-ʻapí, fakamoleki ha taimi ke tali ai ia. ʻO ka fakahāhā ha mahuʻingaʻia, hikiʻi ha lēkooti pea toe ʻaʻahi kiate ia ʻi he vave taha ʻe malavá.
6 He mātuʻaki mahuʻinga moʻoni ke tau feinga ke muimui ʻia Kalaisi! (Sione 3:36) Ko ʻetau fakataha-lahi fakavahe ka hoko maí ʻe tokoniʻi ai ʻa e tokotaha kotoa te nau maʻu iá ke nau fai ʻa e meʻa tofu pē ko iá. ʻOku lava ke tau fakatuʻotuʻa moʻoni ki ha faifakamoʻoni lahi ʻe toe fakahoko ko ha ola ia ʻo e feinga uouangataha ko eni ke tuʻuaki ʻa e Fakataha-Lahi Fakavahe “Muimui ʻia Kalaisi!” Ko ia ai, tōtōivi ʻi hono fakaafeʻi ʻa e tokolahi taha ʻe malavá ke nau maʻu ia. ʻOfa ke ʻi hoʻo ngaahi feinga fakafoʻituitui ke kau ʻi he feingangāue fakamāmanilahi fāʻūtaha ko ení ʻa e tāpuaki fakakoloa ʻa Sihová.