Hanganaki Felangaʻaki Hake
1 Naʻe fai ʻe he ʻapositolo ko Paulá ʻa e meʻa kotoa pē naʻá ne malavá ke fakaivimālohiʻi ai ʻa e kaungātuí. (Ng. 14:19-22) ʻI he tuʻunga tatau, ʻoku tau hohaʻa ʻi he taimi ʻoku fetaulaki ai hotau fanga tokouá mo e ngaahi tuʻunga faingataʻá, pea ʻoku tau fiemaʻu ai ke tokoniʻi kinautolu. ʻOku fakahaaʻi ʻe he Tohi Tapú ʻoku totonu ki he tokotaha kotoa, ʻo ʻikai ko e kau mātuʻá pē, ke nau mahuʻingaʻia ʻi he niʻihi kehé. (Loma 15:1, 2) Fakakaukau ki he founga ʻe ua ʻa ia ʻe lava ke tau talangofua ai ki he ekinaki anga-ʻofa: “Koia ke mou [hanganaki] fefakafiemalieaki akimoutolu, o felagaaki hake akimoutolu.”—1 Tes. 5:11, PM.
2 ʻIloʻi ʻa e Ngaahi Fiemaʻu ʻa e Niʻihi Kehé: ʻOku līpooti mai ʻe he Folofola ʻa e ʻOtuá ko Toakasé “naʻe mohu ʻi he ngaahi ngaue lelei, mo e fai ʻofa ki he tuʻutamaki.” (Ng. 9:36, 39) Naʻá ne fakatokangaʻi ʻa e faʻahinga naʻa nau fiemaʻu tokoní peá ne fai ʻa e meʻa naʻá ne malavá ke tokoniʻi ai kinautolu. He faʻifaʻitakiʻanga lelei ē naʻá ne fokotuʻu mai maʻatautolú! Te ke ʻiloʻi nai ha tokotaha taʻumotuʻa ʻokú ne fiemaʻu ha meʻalele ke ʻalu ai ki he fakatahá. Pe ʻoku ʻi ai nai ha tāimuʻa ʻoku ʻikai ha taha ke ngāue mo ia ʻi he malaʻe malangá ʻi ha efiafi lolotonga e uiké. Kapau ʻokú ke ʻiloʻi ha fiemaʻu pehē peá ke fai ha tokoni ʻoku ʻaongá, fakaʻuta atu ki he ongoʻi loto-toʻa ʻe maʻu ʻe he tokotaha ko iá!
3 Ngaahi Fetalanoaʻaki Fakalaumālié: ʻE lava ke tau toe langa hake ʻa e niʻihi kehé ʻaki ʻetau leá. (Ef. 4:29) Naʻe fakamatala ha mātuʻa taukei: “Kapau ʻokú ke fiemaʻu ke ke hoko ʻo fakalototoʻa, talanoa ʻo fekauʻaki mo e ngaahi meʻa fakalaumālié. Ke kamata ha fetalanoaʻaki fakatupu langa hake, te ke ngāueʻaki nai ha fehuʻi faingofua hangē ko ení, ‘Naʻe anga-fēfē hoʻo ako ʻa e moʻoní?’” Fakahaaʻi ha mahuʻingaʻia loto-moʻoni ʻi he toʻutupu he fakatahaʻangá. Kakapa atu ki he faʻahinga ʻoku nau loto-siʻí mo e faʻahinga ʻoku nau ongoʻi mā naí. (Pal. 12:25) ʻOua ʻe fakaʻatā ʻa e fetalanoaʻaki ki he fakafiefia ʻo e māmaní ke ne kāpui ʻa e ngaahi fetalanoaʻaki lelei fakalaumālie mo e kaungātuí.—Loma 1:11, 12.
4 Ko ia ko e hā ʻe lava ke ke leaʻaki ke langa hake ai ʻa e niʻihi kehé? ʻI hoʻo lau Tohi Tapú mo e ako fakafoʻituituí, naʻá ke ʻiloʻi ai ki muí ni ha tefitoʻi moʻoni naʻá ne fakalolotoʻi ʻa hoʻo houngaʻia kia Sihová? Naʻe ueʻi koe ʻe ha meʻa naʻá ke fanongo ai ʻi ha malanga maʻá e kakaí pe ʻi ha Ako Taua Leʻo? Pe naʻe maongo ki ho lotó ha hokosia fakaivimālohi tui? Kapau ʻokú ke koloaʻaki ʻa e ngaahi mataʻikoloa fakalaumālie peheé, te ke maʻu maʻu pē ai ha meʻa ʻoku fakalototoʻá ke vahevahe atu ki he niʻihi kehé.—Pal. 2:1; Luke 6:45.
5 ʻAki hono foaki atu ʻa e tokoni ʻoku ʻaongá pea mo hono ngāueʻaki fakapotopoto hotau ʻeleló, ʻofa ke tau hanganaki felangaʻaki hake ai pē.—Pal. 12:18.