Puha Fehuʻi

◼ ʻE taau nai ke fokotuʻutuʻu ha fea pe ko ha ngaahi feinga paʻanga kehe ke tokoni ki he fakatahaʻangá?

ʻOku anga ʻaki ʻe he ngaahi kautaha lotú ʻa e uki ha ngaahi founga tānaki paʻanga, hangē ko e ngaohi falekai, fakatau atu ʻo ha ngaahi meʻa pe ko ha koniseti. Lolotonga ʻe ongoʻi nai ʻe he niʻihi ʻoku fakataumuʻa lelei ʻa e ngaahi meʻa ko ʻení, ko hono moʻoní, ko e ngaahi founga pē ia ʻo e kole paʻangá. Ko e Kau Fakamoʻoni ʻa Sihová ʻoku ʻikai te nau maʻu ʻa e tokoni fakapaʻangá ʻi he founga ko iá.

Ko e ʻīsiu hono ua ʻo e Taua Leʻo ʻo ʻAokosi 1879, naʻe leaʻaki ai heni fekauʻaki mo ʻetau fakafisi ke faʻifaʻitaki ki he ngaahi lotú pea fai ha kole paʻangá: “Ko e ‘Zion’s Watch Tower,’ ʻa ia ʻoku tau tui ko SIHOVA ʻa hono tokotaha-poupoú, pea lolotonga ko e tuʻungá ia ʻe ʻikai ʻaupito ke kole pe fakatangi ki he tangatá ki ha poupou. ʻI he taimi ʻoku ʻikai tokonaki ai ʻe Ia ʻokú ne folofola: ‘ʻOku ʻaʻaku ʻa e koula mo e siliva kotoa ʻi he ngaahi moʻungá,’ ʻa e ngaahi tokoni fakapaʻanga ʻoku fiemaʻú, te tau mahinoʻi leva ai ko e taimi ia ke taʻofi ai ʻa e ngaahi tohí.”

ʻOku hokohoko atu ʻetau muimui ki he tefitoʻi moʻoni Fakatohitapu: “Ke taki taha fai ki he meʻa kuo ne tuʻutuʻuni ʻi hono loto; pea ʻoua ʻe fai ʻi he mamahi, pe ko e puʻia; he ʻoku ʻofa ʻa e ʻOtua ki ha taha ʻoku vekeveke foaki.” (2 Kol. 9:7) Kuo tuku ʻa e ngaahi puha tokoni ʻi he Fale Fakatahaʻangá koeʻuhí ke lava ʻa e tokotaha taautaha ʻo fai ha tokoni loto-fiefoaki ʻo kapau te ne loto ki ai. (2 Tuʻi 12:9) Ko e ngaahi tokoní ʻoku ʻikai ke koleʻi; pe ʻoku foaki mo e fakakaukau ki hano toe maʻu mai ha meʻa.