“Mou Fai ʻEni Mōku Fakamanatu”
Fakamanatu ʻa e Pekia ʻa Sīsuú ʻi ʻEpeleli 2
1. Ko e hā ko ha ʻaho mahuʻinga ai ʻa ʻEpeleli 2, 2007?
1 ʻI ʻEpeleli 2, 2007, ʻe fakatahataha ai ʻa e kakai ʻe laui miliona takatakai ʻi he māmaní ke fakamanatu ʻa e pekia fakaefeilaulau ʻa Sīsuú. Naʻe pekia ʻa Sīsū ʻi he tuʻunga ko e tokotaha pouaki ʻo e tuʻunga-hau ʻo ʻene Tamai fakahēvaní, ʻo ʻomai ai e fakamoʻoni naʻe tukuakiʻi loi ʻe Sētane ko e Tēvoló ʻo pehē ʻoku tauhi pē ʻa e tangatá ki he ʻOtuá ʻi he ngaahi fakaueʻiloto siokita. (Siope 2:1-5) ʻOku toe fakamanatu mai ʻe he Kai Efiafi ʻa e ʻEikí, fakafou ʻi heʻene pekia ko ha tangata haohaoa mo taʻehaangahalá, naʻe ‘tuku ʻe Sīsū ʻene moʻuí ke huhuʻiʻaki ha tokolahi, heʻene fetongi kinautolu.’ (Mt. 20:28) Ko ia ai, naʻe fekauʻi ʻe Sīsū ʻa ʻene kau ākongá: “Mou fai ʻeni mōku fakamanatu.” (Luke 22:19) Kuo ueʻi nai koe ʻe he houngaʻia ki he meʻaʻofa maʻongoʻonga ko eni ʻa e ʻOtuá ke ke kamata fai ha ngaahi teuteu ke fakamanatu ʻa e ngāue tuʻu-ki-muʻa ko eni ʻo e ʻofá?—Sione 3:16.
2. ʻE lava fēfē ke tau teuʻi hotau lotó ki he Fakamanatú?
2 Teuʻi Ho Lotó: ʻAki ʻa e fakakaukau ki he meʻa naʻe hoko ʻi he ngaahi ʻaho fakaʻosi taki taha ʻo e moʻui fakaetangata ʻa Sīsuú, ʻoku lava ke tau teuʻi ai hotau lotó ki he kātoanga Fakamanatu ko ení. (Esela 7:10) Ke tokoniʻi kitautolu ʻi he meʻá ni, ʻoku lava ke maʻu ha taimi-tēpile ʻo e lau Tohi Tapu makehe ʻi he Vakaiʻi Fakaʻaho ʻa e Tohi Tapú—2007 mo e 2007 Calendar. Ko e taimi-tēpile lautohi ko ení ʻoku fehoanaki ʻaupito ia mo e ngaahi ʻaho ʻa ia naʻe hoko ai ʻa e ngaahi meʻa felāveʻi mo e pekia ʻa Sīsuú fakatatau ki he tohimāhina ʻoku tau ngāueʻaki he ʻaho ní. Ko e ngaahi ʻaho mo e taimi naʻe lave ki ai ʻi he fakamatala ʻa e Tohi Tapú ʻoku makatuʻunga ia ʻi he tohimāhina faka-Siú, ʻa ia ʻoku fakafuofuaʻi ai ʻa e ʻahó mei he tō ʻa e laʻaá ki he tō ʻa e laʻaá. Ko e faikehekehe ko eni ʻi he lau ʻahó kuo fai e fakakaukau ki ai pea ʻoku fakataimitēpileʻi ia ʻo fakatatau ki ai ʻi he taimi-tēpile lau Tohi Tapu ki he Fakamanatú. Ko hono fakamanatu ʻa e fakamatala ko iá pea fakalaulauloto faʻa lotu ki he lahi ʻa e ʻofa ʻa e ʻOtuá ʻe tokoniʻi ai kitautolu ke tau maʻu ʻaonga kakato mei hono kātoangaʻi ʻa e Fakamanatú.
3. ʻE lava fēfē ke tau tokoniʻi ʻa e kau mahuʻingaʻiá mo e faʻahinga ʻikai longomoʻuí ke nau maʻu ʻaonga mei he Fakamanatú?
3 Fakaafeʻi ʻa e Niʻihi Kehé Ke Nau Maʻu Ia: Ko e konga fakalahi ʻo ʻEtau Ngāue Fakafaifekau ʻo e Puleʻanga ki Fepuelí naʻe fanongonongo ai ha feingangāue makehe ke fakaafeʻi ʻa e kakaí ki he kātoanga mahuʻinga ko ení. Kuó ke fai ha ngaahi fokotuʻutuʻu ke kau kakato ai ʻi he feingangāue ko ení? Kuó ke ʻai ha lisi ʻo e ngaahi maheni te ke fakaafeʻí, pea kuó ke kamata fetuʻutaki kia kinautolu? Fai ha ngaahi fokotuʻutuʻu ke ke ʻi ai tōmuʻa feʻunga ʻi he efiafi ʻo e Fakamanatú ke talitali lelei ʻa e faʻahinga naʻá ke fakaafeʻí pea pehē ki he faʻahinga mahuʻingaʻia kehé. Te ke fie tangutu nai mo kinautolu, ʻo fakapapauʻi ʻoku ʻi ai haʻanau Tohi Tapu mo ha tohi hiva. Fakafeʻiloaki kinautolu ki he niʻihi kehe ʻi he fakatahaʻangá. Hili ʻa e polokalamá feinga ke ke tali ʻenau ngaahi fehuʻí. Fakaafeʻi kinautolu ke nau maʻu ʻa e malanga makehe maʻá e kakaí ʻa ia ʻe fakahoko ʻi ʻEpeleli 15. ʻE tautefito ki he kau mātuʻá ʻenau mahuʻingaʻia ʻi hono fakapapauʻi ʻoku maʻu ha tohi fakaafe ki he Fakamanatú pea mo e malanga makehé ʻe he faʻahinga kuo nau feohi mo e fakatahaʻangá ka kuo nau hoko ʻo ʻikai longomoʻuí.
4. ʻE lava fēfē ke tau tokoniʻi ʻa e kakaí ke nau hokohoko atu ke fai ha fakalakalaka fakalaumālie hili ʻa e kātoanga Fakamanatú?
4 Tokoniʻi ʻa e Kau Mahuʻingaʻia Foʻoú mo e Faʻahinga ʻIkai Longomoʻuí Ke Nau Fai ha Fakalakalaka: ʻE fakamatalaʻi nounou ʻe he tokotaha malanga Fakamanatú ʻa ʻetau fokotuʻutuʻu ki he ako Tohi Tapú pea fakalototoʻaʻi ʻa e faʻahinga mahuʻingaʻia foʻoú ke nau hokohoko ako ʻo kau kia Sihova. ʻE lava ke ke ngāueʻaki ʻene ngaahi fakamatalá ko ha makatuʻunga ia ki hono fai ha toe tokoni fakalaumālie ki he faʻahinga naʻá ke fakaafeʻí. Kapau ʻoku ʻikai te nau lolotonga ako ʻa e Tohi Tapú, fakapapauʻi ke ke ʻaʻahi vave kia kinautolu hili ʻa e Fakamanatú pea fakahāhā ʻa e fokotuʻutuʻu ki he ako Tohi Tapu taʻetotongí. Ke lava ʻo fai ha fakalakalaka fakalaumālie, ʻe toe fiemaʻu ke nau maʻu ʻa e ngaahi fakataha ʻa e fakatahaʻangá. (Hep. 10:24, 25) ʻI he fakakaukau atu ki he meʻá ni, fakalototoʻaʻi kinautolu ke nau kamata maʻu tuʻumaʻu ia. ʻE fokotuʻutuʻu ʻe he kau mātuʻá ke nau ʻaʻahi ki he kau Kalisitiane ʻikai longomoʻui ʻa ia naʻa nau maʻu ʻa e Fakamanatú pea tokoniʻi kinautolu ke nau toe fakakaukau ki he ngaahi fakamatala naʻe ʻomai ʻi he malangá. ʻE fakalototoʻaʻi ai heni kinautolu ke nau toe hokohoko atu ʻenau ngāue ʻi he fakatahaʻangá.
5. ʻE anga-fēfē haʻatau maʻu ʻaonga mei hono kātoangaʻi ʻa e Fakamanatú?
5 Ko e kātoanga Fakamanatú ʻoku ʻomi ai ha faingamālie ke fakalaulauloto fakamātoato ki he meʻa kuo fai ʻe Sihova mo Sīsū maʻatautolú. Ko e fakalaulauloto peheé ʻoku fakalahi ai ʻetau ʻofa kia kinauá pea tākiekina ai hotau ʻulungāangá. (2 Kol. 5:14, 15; 1 Sione 4:11) Ko e taimi eni ke kamata teuteuʻi ai kitautolu mo e faʻahinga mahuʻingaʻiá ki he kātoanga mahuʻinga ko eni ʻa ia te tau ‘fakaha ai ʻa e pekia ʻa e ʻEikí.’—1 Kol. 11:26.