“Hanganaki Fai Eni”—Fakamanatu ke Kātoangaʻi ʻi ʻEpeleli 5
1. Ko e hā ʻoku mahuʻinga ai ʻa e kātoanga Fakamanatú?
1 “Hanganaki fai eni ko hoku fakamanatu.” (Luke 22:19) ʻI he ngaahi lea ko iá, naʻe fekauʻi ai ʻe Sīsū hono kau muimuí ke fakamanatu ʻene pekia fakaefeilaulaú. ʻI he vakai atu ki he ngaahi meʻa kotoa kuo fakahoko ʻe he huhuʻí, ʻoku ʻikai ha toe ʻaho ʻe mahuʻinga pe maʻongoʻonga ange ki he kau Kalisitiané ʻi he kātoanga fakataʻu ʻo e Fakamanatú. ʻI he fakaofi atu ki he kātoanga ʻo e taʻú ni ʻi ʻEpeleli 5, ʻe anga fēfē haʻatau fakahāhā ʻetau fakamālōʻia ʻa Sihová?—Kol. 3:15.
2. ʻE lava fēfē ke tau fakahāhā ʻetau houngaʻia ki he Fakamanatú fou he akó mo e fakalaulaulotó?
2 Teuteu: ʻOku anga-maheni pē ʻetau teuteu ʻa kitautolu ki he ngaahi meʻa ʻoku tau lau ʻoku mahuʻingá. ʻE lava ke tau teuteu hotau lotó ki he Fakamanatú ʻaki ʻa e lāulea ʻi he tuʻunga ko ha fāmilí ki he ngaahi meʻa naʻe hoko lolotonga ʻa e ngaahi ʻaho fakaʻosi ʻo Sīsū ʻi māmaní pea ʻaki ʻa e fakalaulauloto ki ai. (ʻĒsela 7:10) Ko ha konga ʻo e lisi ʻo e ngaahi potutohí ʻoku hā ia ʻi he tohimāhiná pea ʻi he Ko Hono Vakaiʻi Fakaʻaho ʻa e Tohi Tapú, ka ʻoku ʻi ai ha lisi kakato ia fakataha mo e ngaahi vahe fehoanakimālie mei he tohi Moʻungaʻi Tangata ʻoku tuʻu ia ʻi he peesi 23-24 ʻo e ʻīsiu ʻo e The Watchtower ʻo Fepueli 1, 2011.
3. ʻE lava fēfē ke tau fakahāhā ʻetau houngaʻia ki he Fakamanatú ʻaki hono fakalahi ʻetau kau atu ʻi he ngāue fakafaifekaú?
3 Malanga: ʻE toe lava foki ke tau fakahāhā ʻetau houngaʻiá ʻaki ʻa e kau kakato ʻi he ngāue fakafaifekaú. (Luke 6:45) ʻE kamata ʻi he Tokonaki, Maʻasi 17, ha feingangāue ʻi māmani lahi ke fakaafeʻi ʻa e niʻihi kehé ki he Fakamanatú. ʻE lava ke ke feʻunuaki hoʻo taimi-tēpilé ke fakamoleki ha taimi lahi ange ʻi he ngāue fakafaifekaú, mahalo ʻi he tuʻunga ko ha tāimuʻa tokoni? Ko e hā ʻoku ʻikai ke mou talanoa ai ki ai ʻi he tuʻunga ko ha fāmilí lolotonga hoʻomou efiafi Lotu Fakafāmili hono hokó?
4. Ko e hā ʻa e ngaahi ʻaonga ʻe lava ke tau maʻu mei hono kātoangaʻi ʻa e Fakamanatú?
4 He maʻu ʻaonga lahi ē ko kitautolu ʻi heʻetau kau atu ʻi hono kātoangaʻi ʻo e Fakamanatú ʻi he taʻu taki taha! ʻOku fakautuutu ʻetau fiefia mo ʻetau ʻofa ki he ʻOtuá ʻi heʻetau fakakaukau atu ki he loto-fiefoaki ʻa Sihova ʻi heʻene tokonaki hono ʻAlo tofu-pē-taha-ne-fakatupú ko ha huhuʻí. (Sione 3:16; 1 Sio. 4:9, 10) ʻOku ueʻi ai heni kitautolu ke ʻoua te tau kei moʻui maʻatautolu. (2 Kol. 5:14, 15) ʻOku toe langaʻi ai ʻetau holi ke fakahīkihikiʻi fakahāhā ʻa Sihova. (Saame 102:19-21) Ko e moʻoni, ʻoku hanga vēkeveke atu ʻa e kau sevāniti houngaʻia ʻa Sihová ki he faingamālie te tau maʻu ʻi he kātoanga Fakamanatu ʻi ʻEpeleli 5 ke “fanongonongo ai ʻa e pekia ʻa e ʻEikí.”—1 Kol. 11:26.